IGIHE

Ubuzima butoroshye bwa Kurawige wiciwe se mu maso muri Jenoside yakorewe Abatutsi

0 21-01-2021 - saa 15:38, Karirima A. Ngarambe

Kurawige Aline Umutoni w’imyaka 32 yanyuze mu buzima bushaririye. Ku myaka itanu yabuze se umubyara wiciwe mu maso ye mu gihe cya Jenoside yakorewe Abatutsi mu 1994.

Kuva icyo gihe yatangiye ubuzima bwo gushaka aho yerekeza, ku bw’amahirwe ahungana n’umuryango wo kwa nyirakuru ariko ntiyawutekaniyemo kuko yahahuriye n’ibibazo birimo no gufatwa ku ngufu.

Mu kubika ayo mateka no kuba umuhamya wayo, Kurawige yanditse igitabo yise ‘From Bondage to Freedom’ bishatse kuvuga ugenekereje mu Kinyarwanda ‘Gufatwa bunyago ukaza kwibohora’ cyashibutse ku nzira y’inzitane yanyuzemo muri Jenoside.

Mu kiganiro yagiranye na IGIHE, Kurawige yavuze ko igitabo cye yacyanditse ashaka gutanga ubuhamya bw’ibyamubayeho muri Jenoside yakorewe Abatutsi ubwo yicirwaga se umubyara bikozwe n’Interahamwe.

Yagize ati “Ni igitabo nanditse kugira ngo abahakana Jenoside yakorewe Abatutsi, nkanjye wiciwe Data mu maso, mbibere umuhamya hatazagira ubeshya abatabizi kandi turiho. Ni igitabo nanditse mpawe imbaraga n’ubuhamya numvise muri filime mbarankuru ‘La Traverse du Génocide’ bituma nanjye numva nzasubira aho nababariye nkahakora filime mbarankuru.”

Yavuze ko iki gitabo nacyo mu minsi iri imbere ateganya gusinya amasezerano y’uko cyakorwamo filime mbarankuru muri Leta Zunze Ubumwe za Amerika.

Yakomeje agira ati “Mu byo niyemeje rero ni ukuvuga amateka nabayemo n’abo tuyahuje kugira ngo abagenda babeshya kubera inyungu ntazi bafatwe bahanwe.”

Umutoni avuga ko ku myaka itanu ubwo Interahamwe zicaga se Dr Kurawige Jean Baptiste, yabanje kumuhisha munsi y’intebe.

Uyu mukobwa wari ukiri umwana yarungurutse munsi abona uko bamutema, abona amaraso atemba, ariko mu bitekerezo yari afite ku myaka ye yumvaga ko umubyeyi we ari bugaruke akamukura aho yamubwiye kwihisha, ariko siko byagenze.

Umutoni avuga ko yaje kuhavanwa na nyirakuru ubyara nyina babasha guhunga bagera muri Uganda mu nkambi, bahava berekeza muri Burkina Faso, tariki ya 3 Ugushyingo 1994.

Avuga ko bavuye muri Burkina Faso agana muri Afurika yepfo, mu mwaka wa 2011, avuyeyo yasubiye mu Rwanda bwa mbere mu 2012, ariko izi nzira zose ntabwo byari byoroshye, kuko guhera igihe se yicwaga kugeza 2011 yari mu bibazo bikomeye.

Umutoni avuga ko byamubabaje cyane kuko abishe se ari abo mu muryango wo kwa nyina ndetse no mu guhunga ajyana na nyirakuru ubyara nyina yakomeje kubabamo batamukunda, uretse gusa nyirakuru wahoraga amubwira ati “Mwana wanjye ujye uhora wimenya ntibagukunda’’

Bageze muri Burkina Faso, nyina wabo wari warashatse muri icyo gihugu yamushumuriye umugabo we akajya amufata ku ngufu ku myaka 16.

Ati “Bari barabuze urubyaro bashaka ko umugabo we yambyaraho umwana, ku buryo yamfataga ku ngufu byibura gatanu mu cyumweru. Uyu mugabo yari akomeye cyane muri kiriya gihugu kuko yari inshuti ya Perezida waho icyo gihe, ku buryo na Perezida basuranaga mu ngo, ibi bikamuha imbaraga zo gukora icyo ashaka muri iki gihugu.”

Yakomeje avuga ko “Byaje no kumenyekana ko mfatwa ku ngufu mu Banyarwanda batuye muri icyo gihugu ariko bagira uwo babibwira mu butegetsi bwaho bigafata ubusa.”

Umutoni avuga kandi ko muri icyo gihugu yahagiriye amakuba y’uko umugabo witwa Athanase wishe se, yahageze babana atamuzi.

Yagize ati “Turabana ntamuzi, nzi ko ari umuntu nyine wo mu muryango nkumva mukunze, akamperekeza ku ishuri tukaganira nk’umwana nashakaga kumenya byinshi. Nyuma Interpol yaje kumushaka nibwo namenye ko ariwe wishe Papa, nakwibuka ukuntu nari naramugize umuntu numva nkunze ngashengukira mu mutima.”

Igihe cyarageze nyirakuru yitaba Imana, atangira gushakisha uko yahunga ariko biramugora kuko yari yakumiriwe.

Yakomeje ati “Nasigaye nsa nk’aho ntaho ndi, nshakisha uko nahunga birangora cyane. Bari barashyize amatangazo ku kibuga cy’indege ku mipaka y’ibihugu byose bikikije Burkina Faso ko ntashobora gusohoka mu gihugu. Nabiganirije umwe mu basirikare bakuru baho, ambwira ko bagiye kumfasha ariko azangira inama y’uko nzabigenza bigakunda.’’

Yamusabye guhindura amazina, ashaka ibindi byangombwa ndetse amufasha guhungira muri Afurika y’Epfo, aho yatangiriye ubuzima bushya.

Kurawige yize muri Kaminuza ya Pretoria mu bijyanye na Géologie, ahasoje amasomo mu 2016, yasabye kwimenyerereza umwuga mu Rwanda aho yagarutse afite imyaka 23.

Avuga ko yahuye n’umwe mu bafunzwe uri mu bohereje abishe umubyeyi we ariko ngo amugeze imbere aramusuzugura cyane yanga kwemera ibyo yakoze.

Akomeza ati “Na n’ubu ntiyemera ibyo yakoze, ariko njye mu masengesho yanjye nahisemo kubabarira kugira ngo nduhuke uwo mutwaro.’’

Kurawige kuri ubu utuye muri Leta Zunze Ubumwe za Amerika, mu Mujyi wa Dallas, yavukiye i Ngoma mu Karere ka Huye mu Ntara y’Amajyepfo mu 1988. Ni umwe mu bayobozi b’ikigo gikomeye gikora ibijyanye n’ubucukuzi bw’amabuye y’agaciro.

-  Reba ikiganiro IGIHE yagiranye na Umutoni

Kurawige Aline Umutoni w’imyaka 32 yanditse igitabo yise ‘From Bondage to Freedom’ gikubiyemo ubuhamya bw’inzira y’umusaraba yanyuzemo muri Jenoside yakorewe Abatutsi mu 1994
Ubwo Kurawige yamurikaga igitabo cye muri Leta Zunze Ubumwe za Amerika
Umutoni ari kumwe na se Dr Kurawige Jean Baptiste
Kurawige yagiye kuganira n'umwe mu bicishije se muri gereza
Jenoside yakorewe Abatutsi mu 1994, yabaye Kurawige akiri muto
Kurawige yanditse igitabo ‘From Bondage to Freedom’ nyuma y’uko abuze se wishwe muri Jenoside yakorewe Abatutsi mu 1994
Kurawige akiri umwana, aha yari kumwe n'ababyeyi be
Dr Kurawige yishwe muri Jenoside yakorewe Abatutsi
Igitabo ‘From Bondage to Freedom’ gifite igisobanuro kigusha ku ‘Gufatwa bunyago ukaza kwibohora’
Kurawige atuye muri Leta Zunze Ubumwe za Amerika mu Mujyi wa Dallas, avuga ko yishimiye ubuzima abayemo
Kurawige ni umwe mu bayobora ikigo gikora mu bijyanye n’amabuye y’agaciro muri Amerika

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza