IGIHE

Hategekimana Richard yasohoye igitabo kiva imuzi igihango Abanyarwanda bafitanye n’Inkotanyi

1 21-11-2020 - saa 13:01, IGIHE

Umwanditsi Hategekimana Richard yamuritse igitabo cye gishya yise ‘Igihango n’Inkotanyi’ gikubiyemo ubutumwa ku mubano wimbitse Abanyarwanda bafitanye n’Umuryango FPR- Inkotanyi wabohoye igihugu.

Kumurika iki gitabo byabereye muri Kigali Convention Centre ku mugoroba wo ku wa 20 Ugushyingo 2020. Witabiriwe n’abantu batandukanye baturutse mu nzego zinyuranye zirimo sosiyete sivile, inzego za Leta, iz’abikorera n’abanyamadini.

Hategekimana Richard usanzwe ari Perezida w’Urugaga rw’Abanditsi mu Rwanda, yanditse iki gitabo mu gihe cy’umwaka urenga.

Ni igitekerezo yagize nyuma y’ubushakashatsi bwimbitse yakoze ku mateka y’u Rwanda, agasanga yari meza mbere y’umwaduko w’abazungu ndetse na nyuma y’umwaka wa 1994 ubwo rwabohorwaga na FPR Inkotanyi akongera kuba meza.

Perezida w’Icyubahiro w’Urugaga rw’Abanditsi mu Rwanda, Ingabire Marie Immaculée, yashimiye Hategekimana ku bw’umusanzu ukomeye akomeje guha igihugu cye yandika ibitabo.

Yashimangiye ko Abanyarwanda ‘dukwiriye gukomera ku gihango dufitanye n’Umuryango FPR- Inkotanyi.’

Depite Sheikh Harerimana Mussa Fazil wari Umushyitsi Mukuru muri uyu muhango akaba ari na we wasinye ijambo ry’ibanze ry’iki gitabo, yashimiye inkunga y’umwanditsi ku kwibutsa Abanyarwanda umusanzu wabo mu kubaka igihugu no kuzirikana igihango bafitanye n’abakibohoye bagahagarika Jenoside yakorewe Abatutsi.

Hategekimana umaze kwandika ibitabo bine, yashimiye Chairman w’Umuryango FPR- Inkotanyi, Kagame Paul, ku budasa ahora agaragaza mu kubaka u Rwanda.

Yagaragaje ko imiyoborere ye myiza ituma imitwe ya Politiki ikora neza n’Abanyarwanda bagatera imbere.

Yashimiye kandi FPR- Inkotanyi ku bikorwa by’indashyikirwa biranga uyu muryango byo kubaka u Rwanda mu nzego zose.

Abitabiriye uyu muhango basabye umwanditsi kugeza igitabo cye mu mashuri, mu nzego z’abikorera, amadini n’ahandi kugira ngo amasomo n’amateka bikirimo bikomeze byifashishwe mu kubaka u Rwanda rurimo abaturage bafite indangagaciro na kirazira nk’ibyaranze Inkotanyi zabohoye u Rwanda.

Mu gitabo ‘Igihango n’Inkotanyi’, Hategekimana agaragaza uburyo Abanyarwanda babayeho nabi mu gihe cy’ubukoloni na nyuma kuri Repubulika ya Mbere n’iya Kabiri bitewe na politiki y’ivangura n’amacakubiri yaranze ubuyobozi muri icyo gihe.

Uwo murage mubi wakuweho na FPR Inkotanyi ubwo yatangizaga urugamba rwo kubohora igihugu, ikarusoza ihagarika Jenoside yakorewe Abatutsi mu 1994.

Mu gitabo cye agaragaza imbaraga zakoresheje ngo u Rwanda rwongere rwiyubake mu nzego zose zirimo imiyoborere myiza, ubutabera, ubukungu, uburezi, ubuzima n’ibindi.

Hategekimana Richard yasohoye igitabo kiva imuzi igihango Abanyarwanda bafitanye n’Inkotanyi
Hategekimana yashimiye Chairman w’Umuryango FPR- Inkotanyi, Kagame Paul
Hategekimana Richard usanzwe ari Perezida w'Urugaga rw'Abanditsi mu Rwanda, yanditse iki gitabo mu gihe cy’umwaka urenga
Iki gitabo cya Hategekimana cyiswe “Igihango n’Inkotanyi" kijya mu mizi y’amahame n’indangagaciro zaranze FPR Inkotanyi kuva yashingwa ari nabyo byayigejeje ku kubohora u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza