IGIHE

Kurasaga, imyotso, kurumika, kugombora: Uburyo gakondo bwamamaye mu kuvura indwara z’amayobera

1 8-11-2019 - saa 13:23, Nsanzabera Jean de Dieu

Kurumika no kurasaga, imyotso no kugombora, ni imigenzo nyarwanda yakorwaga mu buvuzi gakondo no kurinda ibyago Abanyarwanda, bityo uwabikoraga akaba afite imyerere y’uko iyo bikozwe byanze bikunze birinda kandi bikanavura.

Gusa kuri ubu Abanyarwanda benshi ntibabyemera, ndetse bavuga ko ari imihango ya gipagani, n’ubwo hari abaganga bemeza ko iyo migenzo yabaga ari ingirakamaro.

Nk’uko tubikesha igitabo “Umuco mu Buvanganzo’’ cyanditswe n’Umusizi Nsanzabera Jean de Dieu, Inzobere ku muco, amateka n’ubuvanganzo nyarwanda, tugiye kubataturira imwe mu mihango n’imigenzo yakorwaga mu kuvura no kurinda indwara mu muco w’Abanyarwanda.

Kurasaga (Guca indasago, gukeba gahoro gahoro ku mubiri) umuntu byaterwaga n’uko bashaka nko kumushyiramo imiti yo kumuvura ikintu arwaye, cyangwa kumutsirika bavuga ngo batazamuroga, bakarasaga rero bagashyiramo iyo miti. Hari n’aho bikengeraga ko umwana wavutse azahura n’akaga, nako bakagatsirika bakoresheje kumuca indasago, ukazasanga koko bibaye impamo, ibyago baketse, akabicika.

Hari kandi n’indasago bacaga ku mugore ugiye gushaka cyangwa umugabo, bagashyiramo imiti ituma bahamya umubano uzira kidobya.

Niyo mpamvu uzasanga abantu bakuru benshi bafite indasago ku mubiri, ku gikanu, mu gatuza, ku bibero ku gahanga, mu biganza n’ahandi. Umumaro w’indasago ahanini, wari uwo gutsirika ushyiramo umuti aho barasaze, bakungikanya n’imitongero runaka yo kuvura, imitongero igakurwa n’indi maze umuntu akaba mutaraga.

Kurumika ho bacaga indasago nko mu gikanu cyangwa mu mugongo , bagashyiraho ikintu bita ingunga. Ingunga kari agacuma bakebye katagira ijosi.

Kurumika babikoraga bashaka gusohora amaraso mabi ari mu mubiri. Hari nk’ubwo imitsi yipfundikaga ikabuza umuntu kuba yagenda, ugasanga aho yipfunditse habaye nk’umukara, uwo byabayeho agakunda kugira ibinya bimufata bya hato na hato. Barasagaga ya maraso agasohoka, nyuma bagasigamo imiti yo kugira ngo homoke hasubirane, ariko na none igakiza ubwo burwayi ntibuzagaruke.

Hari n’aho barumikaga bakoresheje ihembe rikiyomeka ku mubiri rikajya rikurura amaraso, ryamara kuzura bakarikuraho bakayamena bakongera bagasubizaho.

Kurasaga no kurumika, bifite itandukaniro benshi badakunze kumenya. Kurasaga byakorerwaga ku ruhu inyuma , basharuragaho gato, hakava amaraso makeya. Naho kurumika, byakorwaga binjiye mu mubiri imbere ku buryo bashyikira umutsi ujyana amaraso mu mubiri, akaba ariwo bakomeretsa amaraso bashaka kumena akava.

Ubuvuzi gakondo bwo kotsa ( imyotso) amateka atugaragariza ko bwaba bukomoka mu Gisaka, aho bwadutse ku ngoma y’umwami waho Kimenyi II Shumbusho, watway I Gisaka ahasaga mu wa 1312.

Muri icyo kibariro, mu Gisaka hadutse indwara y’amaso yafataga abana bakiri bato bakundaga kuvukana bitewe n’uburwayi bwafataga Ababyeyi batwite, urukingo rukaba gufata abo bana bakabotsa ku gahanga no mu misaya, bagahita bakira. Noneho biba nk’umugenzo wo muri ako gace, abantu babona ari byiza, uvutse wese kabone n’ubwo yaba atarwaye amaso bakamwotsa.

Gushyira imyotso ku gahanga no mu misaya, nibwo buvuzi gakondo bw’Abanyarwanda bifashishaga bavura icyorezo cy’uburwayi bw’amaso, haba ku bana no ku bantu bakuru

Uwo mugenzo wo guca imyotso ku bana b’Abanyagisaka, wageze aho uba ikirango mwihariko wabo, uhinduka umugenzo wo guca imanzi z’ubwiza ku mwana uwo ariwe wese uvukiye mu Gisaka, ku buryo byabaye n’ikimenyetso cyakoreshwaga mu ntambara y’I Gisaka n’u Rwanda kugira ngo Abanyagisaka babashe gutandukanya abaturage babo n’Abanyarwanda.

Ubuvuzi gakondo bw’Abanyarwanda bugombora uwakomwe ( uwarumwe) n’inzoka, akabasha kuyirokoka, ni bumwe mu buvuzi gakondo bumaze igihe kirekire mu Rwanda, kuko bwahanganywe n’u Rwanda rukiri amashyamba y’inzitane adapfa kwisukirwa.

Kugombora, hakoreshwaga uburyo bwo gushyira umuti witwa : ‘’Umukubayoka’’ ahakomwe ( aharumwe) n’inzoka, cyangwa se bagashyira ifu y’inzoka y’inkazi babaga baraseye ( nk’impiri, uruziramire n’izindi) mu gikomere cy’aharumwe n’inzoka.

Kugombora byaherekezwaga n’imitongero ivugwa muri ubu buryo :

Ndakugombora impiri , ndakugombora idubi,
Ndakugombora insana n’inkomyi,
Habyimbirwa imbwa, habyimbirwa impyisi,
Ubwo bugomboro nabugomboje Ruganzu,
Bwagomboye Rwabugili na Rudahigwa.
Ndakugombora byunga na barihuta,
N’inyenzi na buhoma !
Murahura , ntikurya ! urajye kuvoma ,
Ntikurya ! urajya ku ryama!ntikurya !
Murahura , ikaraba , ikarabirana , ikabura ubwenge,
Ikabura ubwinyo , ikaba imbwa biseseme !

Ubuvuzi gakondo bw’Abanyarwanda bushingiye ku kurumika, kotsa, guca indasago no kugombora, bwari bwuje igenantekerezo zisobetse rwose, ku buryo ritabashaga kugerurwa n’abahisi. Ku buryo na n’ubu hari aho bugikoreshwa mu kuvura indwara zimwe na zimwe.

Gushyira imyotso ku gahanga no mu misaya, nibwo buvuzi gakondo bw’Abanyarwanda bifashishaga bavura icyorezo cy’uburwayi bw’amaso, haba ku bana no ku bantu bakuru
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Sabushimike 2019-11-08 11:11:37

uwakoze iyi nkuru ndamushimiye cyane, nsanzemo inkomoko y’amagambo najyaga numva bari kugombora uwarumwe n’inzoka
menye n’impamvu banyokeje (imyotso) yo mu gahanga nubwo ntavukiye mu Gisaka ariko narahakuriye bakabona ndi uwabo .

Kwamamaza