IGIHE

Byararangiye! Uko ibice binini by’u Rwanda byometswe buhumyi ku bindi bihugu

0 15-09-2020 - saa 07:32, Ferdinand Maniraguha

Mbere y’inama yabereye i Berlin yarangiye muri Gashyantare 1885, igasiga ibihugu by’i Burayi byigabanyije Afurika, u Rwanda rwari rufite ubuso bukubye hafi inshuro eshatu ubwo rufite ubu.

Uduce tumwe by’u Rwanda iyo nama yasize byometswe ku bihugu bituranye narwo nk’u Bufumbila n’i Ndorwa twabaye utwa Uganda, utundi turimo Ijwi na Bwishya tujya muri Congo.

Mu 1910, u Budage bwakolonizaga u Rwanda rwasinyanye amasezerano n’u Bwongereza bwakolonizaga Uganda, bemeranya ko tumwe mu duce tundi twari utw’u Rwanda nka Kisoro na Mbarara tujya muri Uganda.

Inzobere mu mateka, Nizeyimana Innocent, yabwiye IGIHE ko ayo masezerano ya kabiri icyatumye u Budage buyasinya, ari uko imbaraga zabo nyinshi batifuzaga kuzishyira mu bihugu bakolonizaga.

Ati “U Rwanda rwahawe u Budage butifuzaga kugira ibihugu byinshi bukolonije, ahubwo bwashakaga kuba igihugu gikomeye ku mugabane w’u Burayi, mu gihe u Bwongereza bwo bwifuzaga kugira ibihugu byinshi bukolonije. Niyo mpamvu twatakaje igice kinini mu majyaruguru, hatwawe n’u Bwongereza buhasabye u Budage burahatanga ntakujijinganya. Ni nako byagenze ku Bubiligi butwara igice kinini cy’u Rwanda cyari muri Congo.”

“Umwami w’u Bubiligi yifuzaga igihugu kiburuta inshuro 100. Ababiligi rero basabye ko umupaka uca mu Kiyaga cya Kivu, Abadage ntibigeze bajya impaka. Ikindi kandi, kubera imitekerereze ishingiye ku bwoko, Abadage bumvaga imipaka idakwiriye kurenga ikiyaga cya Kivu kuko byaba ari ukuvanga amoko menshi. Niyo mpamvu ibirindiro byabo bya mbere byari Cyangugu na Gisenyi ntibyambuke i Kivu.”

Senateri Dr Havugimana Emmanuel yavuze ko hari n’igice cy’u Rwanda kigana muri Tanzania cyatwawe nyuma y’umwaka wa 1900, kigatwarwa n’Abongereza kugira ngo bahanyuze gari ya moshi yagombaga kuva i Cairo mu Misiri, ikagera Cape Town muri Afurika y’Epfo.

Ati “Akarere ka Kirehe kigeze gufatana na Tanganyika. Baragafashe kuko bari bafite umushinga wo kubaka gari ya moshi ihuza Cairo na Cape Town, bagasanga izaca mu Gisaka, nibwo Abarundi nabo batwawe agace k’u Bugufi kakajya Tanzania. Igisaka cyagarutse mu 1922 Abadage baratsinzwe, kuko Ababiligi basinye andi masezerano agarura Kirehe.”

Iyi myaka igera kuri 40, yasize u Rwanda ari kimwe mu bihugu bito ku Isi, ariko isiga imiryango ivuga Ikinyarwanda n’igendera ku mico nyarwanda ikwiriye hirya no hino mu karere.

Innocent Nizeyimana avuga ko uretse gutakaza ubutaka, byanabaye intandaro y’ibibazo bihora mu Karere, cyane cyane muri Repubulika Iharanira Demokarasi ya Congo, aho abanyarwanda gakondo bahatuye bafatwa nk’abanyamahanga.

Ati “Hari abaturage bari bamaze igihe barayobotse u Rwanda kandi banavuga ururimi rw’Ikinyarwanda. Bakundaga ubuyobozi bwabo, bahabwa abandi bayobozi batiyumvamo, aribyo byatangiye kuba intandaro n’amakimbirane muri aka karere.”

Senateri Havugimana yabwiye IGIHE ko kuri ubu umunyarwanda muri Congo agenda yigengesereye kuko batamufata nk’umwenegihugu, nyamara ari ubutaka bamwe bavukiyeho na basekuruza babo batuyeho.

Ati “Nizo ngaruka za politiki tubona. Ubu muri Congo kwitwa umunyarwanda ni nko kwitwa umwanzi, kandi abanye-Congo harimo n’abize, ntabwo bemera ko hari umunyarwanda w’umunye-Congo. Buriya abanyarwanda bahatuye barimo ibice bitatu, harimo kavukire, ab’impunzi bagiyeyo 1959, n’abanyarwanda bagiye bimurwa n’ababiligi bagiye gukora mu mirima yabo cyangwa mu mabuye y’agaciro.”

Dr Havugimana kandi yavuze ko u Rwanda rwanahombye ubutaka burimo umutungo kamere, bwanashoboraga no guturwaho ntikibe igihugu gifite ubucucike bwinshi nkuko bimeze ubu.

Ati “U Rwanda twabuze igice kinini cy’intara yacu irimo n’ubukungu, harimo ubuhinzi. Za Masisi harera, harimo amabuye y’agaciro. Ku mibanire nabwo usanga abantu badafite ubwisanzure muri kiriya gice kandi ari abacu. Mu gice cy’u Rwanda haratuwe ariko hakurya aho ntabwo hatuwe.”

Utu duce dushobora kugaruzwa?

Muri Nzeri 2018, bamwe mu badepite mu Nteko Ishinga Amategeko y’u Rwanda batanze icyifuzo, babaza niba ntacyo u Rwanda rwakora ngo rusubirane uduce twahoze ari utwarwo tukajya mu mahanga.

Dr Havugimana yavuze ko ibyo bidashoboka kuri ubu. Yavuze ko mu nama ya mbere y’Umuryango wa Afurika Yunze Ubumwe (OUA) yabaye mu 1963, ibihugu bya Afurika byose byemeranyijwe ko bizagumana imipaka abakoloni bashyizeho mu rwego rwo kwirinda imvururu zishingiye ku mipaka.

Ibyo byaterwaga n’uko hafi ibihugu byose byari byagiye bihabwa imipaka itandukanye n’iyo byahoranye, ku buryo kongera kuyivugurura byari guteza ibibazo birenze ibyari bihari.

Dr Havugimana ati “Byararangiye kubera ko icyo kibazo cyari mu bihugu byinshi bya Afurika, OUA bashyizeho ingingo ko nta n’umwe uzasubira gusaba ivugururwa ry’imipaka ku mipaka twasigiwe n’abadukolonije”.

Yavuze ko ubu icyakorwa ari umubano mwiza n’ibihugu by’ibituranyi, by’umwihariko abanyarwanda bakishimira ko hari bagenzi babo bo mu bindi bihugu bavuga ururimi rumwe bafite n’imico imwe.

Gupfa kugabana Afurika ntacyo bitayeho, kwatumye Afurika yisanga mu makimbirane adashira ashingiye ku bwoko, kureba ay’ingwe kw’ibihugu bipfa imipaka n’ibindi.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza