IGIHE

Barindwi bahoze muri RUD Urunana basabiwe igifungo cya burundu

0 24-11-2021 - saa 13:10, Ntabareshya Jean de Dieu

Ubushinjacyaha bwa Gisirikare bwasabiye abahoze mu mutwe w’iterabwoba wa RUD urunana igifungo cya burundu nyuma yo kuburanishwa ku byaha bitandukanye bifitanye isano n’ibikorwa by’iterabwoba.

Kuri uyu wa 24 Ugushyingo 2021, Ubushinjacyaha ni bwo bwasabiye ibihano abaregwa 37 bahoze ari abarwanyi ba RUD Urunana n’umutwe w’iterabwoba wa P5, mu Rukiko Rukuru rwa Gisirikare i Kanombe.

Selemani Kabayija wari Umuyobozi wungirije wa RUD Urunana aregwa icyaha cyo kugirira nabi ubutegetsi buriho hakoreshejwe intambara gihanishwa igifungo cya burundu, ubujura bukoresheje intwaro gihanishwa imyaka 20 y’igifungo.

Hari kandi kuba mu mutwe w’ingabo zitemewe gihanishwa igifungo cy’imyaka 10, icyaha cy’iterabwoba gihanishwa imyaka 20, ubwicanyi n’ubwinjacyaha mu bwicanyi gihanishwa igifungo cya burundu, ubujura bukoresheje intwaro gihanishwa imyaka 20 ndetse no kugirana umubano na Leta y’amahanga gihanishwa imyaka 25.

Capt. Kayihura wari uhagarariye Ubushinjacyaha, yasabye urukiko ko rwakwemeza ko ibi byaha byabaye impurirane mbonezamugambi maze rukazashingira ku ngingo ya 61 na 62 z’itegeko riteganya ibyaha n’ibihano igena ko uwahamijwe ibyaha ahanishwa igihano kirusha ibindi gukomera ari cyo gufungwa burundu kuri Selemani Kabayija.

Uretse Kabayija ariko na bagenzi be bareganwa banabanye muri uyu mutwe uko ari barindwi basabiwe guhanishwa igifungo cya burundu.

Ababuranyi batakambiye urukiko

Nyuma yo gusabirwa ibi bihano, abaregwa bahawe umwanya kugira ngo bagire icyo babivugaho maze batakambira urukiko barusaba ko hazabaho kugabanyirizwa ibihano bitewe n’uko bemera ibyaha bakoze ndetse bakabisabira imbabazi.

Kabayija Selemani yagaragaje ko yizeye ubutabera budashobora kugendera ku busabe bw’ubushinjacyaha cyangwa ibitekerezo bye ku giti cye kuruta uko bakurikiza ukuri kuriho n’inyungu z’umuryango nyarwanda ndetse n’impamvu nyoroshyacyaha.

Yemeye ko hari ibikorwa yagizemo uruhare by’umwihariko ibitero byo mu Kinigi mu Karere ka Musanze byabaye mu 2019 nubwo avuga ko yabikoze biturutse ku mategeko y’abamukuriye.

Ati “Nijeje Abanyarwanda bose ko aho nazasoreza ibihano nzagaragaza impinduka, nzaharanira icyanteza imbere, kwicungira umutekano mfatanyije n’uwo ari wese ukeneye kubaho mu mahoro. Ndicuza cyane ku mugambi nagize kandi ndabisabira imbabazi.”

Bagenzi be barimo Habumukiza Theoneste, Hakizimana Emmanuel, Ntigurirwa Jean Damascène, Ndayisaba Alex, Nzabonimpa Fidèle na Bahati bagaragaje ko bagabanyirijwe ibihano bazahinduka bagaharanira kubaka umuryango nyarwanda.

Umwunganizi wabo yagaragaaje ko ibyaha birindwi bakurikiranyweho babisabira imbabazi kandi babyemera bityo ko bakwiye kugabanyirizwa ibihano. Yagaragaje ko bakiri urubyiruko kandi bicujije bakanihana, bityo akabona ko bigishijwe bahinduka bakaba abaturage beza.

Barindwi bahoze muri RUD Urunana basabiwe igifungo cya burundu
Selemani Kabayija yasabye imbabazi avuga ko yizeye ubutabera
Abahoze muri RUD Urunana na P5 ubwo bari bari mu rukiko
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza