IGIHE

Byagenze bite ngo zahabu u Rwanda rwohereza mu mahanga yiyongere kuri 754,6%?

0 24-11-2020 - saa 05:43, Rabbi Malo Umucunguzi

Imibare ya Banki Nkuru y’u Rwanda, BNR, iheruka kugaragaza ko ibyo u Rwanda rwohereza mu mahanga byagabanutseho 15.2% mu ngano, nubwo agaciro kabyo kiyongereyeho 15.1% kugeza muri Kamena 2020.

Ni ubucuruzi ahanini bwazamuwe cyane n’umusaruro wavuye muri zahabu, wazamutseho 754,6%. Nibyo, ni izamuka riri mu binyejana brindwi. Byagenze bite ngo uyu mutungo kamere w’imbonekarimwe uzamuke bigeze aha?

Raporo yakozwe n’ikigo IMPACT gikora mu bucuruzi bwa zahabu mu karere, iheruka kugaragaza ko u Rwanda mu 2014 rwatangaje ko rwavanye miliyoni 8,1$ mu "yandi mabuye y’agaciro" yoherejwe mu mahanga arimo na zahabu, yaje kugera kuri miliyoni 80,06$ mu 2016.

Igenzura ryakozwe n’Ikigo cy’Abanyamerika ku musaruro wa zahabu mu Rwanda ryagaragaje ko wari 160 kg mu 2014 na 319 kg mu 2015. Naho itsinda ry’impuguke z’Umuryango w’Abibumbye ziheruka kuvuga ko u Rwanda rwohereje mu mahanga 2163 kg bya zahabu mu 2018.

Iri zamuka ryatumye mu 2019 mu Rwanda hatangizwa uruganda rutunganya zahabu ruzwi nka Aldango Ltd., rugaragaza ko rufite ubushobozi bwo gutunganya 220 kg ku munsi na toni 6 ku kwezi.

Uru ruganda rwahinduye ubu bucuruzi

Guverineri wa Banki Nkuru y’u Rwanda aheruka gutangaza ko kuba inyungu ya zahabu u Rwanda rwohereje mu mahanga yarazamutse bihambaye, byaturutse ku kuba rusigaye rufite uruganda ruyitunganya, ikoherezwa mu mahanga nka zahabu iturutse mu Rwanda.

Yagize ati "Urebye uko kuzamuka, ni uguhera hafi kuri zeru, ntabyo twakoraga mu Rwanda. Aho dutangiriye uko gutunganya zahabu, imibare igaragaza zahabu zituruka hanze ziza gutunganyirizwa hano yarazamutse, noneho iyo bamaze kuyitunganya bakayohereza mu mahanga, nabyo byarazamutse.”

“Ni yo mpamvu ubona harimo iyo mibare idasanzwe, ni uko ari ikintu gishyashya kije mu mibare yacu kitari gisanzwe, kubera ruriya ruganda rutunganya zahabu zoherezwa mu mahanga."

Iyi zahabu yinjira mu Rwanda iba ari uruvangavange rurimo umwanda, yasohoka mu ruganda imaze gutunganywa, ikagurishwa ku isoko mpuzamahanga yitwa ko ari zahabu yo mu Rwanda kuko iba yatunganyijwe ku kigero cya 99 ku ijana, ari nayo mpamvu ibarirwa muri zahabu zaturutse mu Rwanda, bitandukanye no kuba ariho yacukuwe.

Uretse zahabu, andi mabuye y’agaciro yo umusaruro wavuyemo waragabanutse cyane mu mafaranga byinjije, ndetse ibiciro biragwa urebye uko bihagaze ku isoko mpuzamahanga.

Zahabu yabaye imari mu bihe by’amage

Mu gihe andi mabuye ibiciro byayo byahungabanye kubera ibihe bya COVID-19, ibya zahabu byo byakomeje gutumbagira, kuko mu buryo ibihugu byizigamira amafaranga y’ingoboka mu bubiko, bamwe banabika ubwizigame bwabo muri zahabu.

Nko muri Kamana uyu mwaka, igiciro cyageze ku 2.047$ kuri ‘ounce’ imwe (=garama 28.3), ubwo abashoramari bari batangiye kugira ubwoba bw’uko Coronavirus ishobora kubahindukirana, ku buryo aya mabuye bahise bayafata nk’ahantu hizewe ho kuba babitse ubutunzi bwabo.

Ikigo Mpuzamahanga Gishinzwe Ubucuruzi bwa Zahabu, World Gold Council, giheruka gutangaza ko mu gice cya mbere cy’uyu mwaka wa 2020, abashoramari mu bijyanye n’imari bongereye toni 734 zifite agaciro ka miliyari 39,5$ mu bubiko bwabo bwa zahabu, ari nayo zahabu nyinshi yaguzwe mu gice cy’umwaka.

Icyo gihe byabarwaga ko ibiciro bya zahabu byazamutse kuri 53% mu mezi 14 yari ashize, birenga igiciro kinini cyaherukaga, cyagezeho mu 2011 ubwo ‘ounce’ imwe yaguraga $1,943.

Umwalimu muri Kaminuza ya Kigali akaba n’impuguke mu bucuruzi n’ishoramari, Dr. Rusibana Claude, yabwiye IGIHE ko ubusanzwe mu bihe by’ubukungu butifashe neza, amabuye y’agaciro ari mu bicuruzwa bigirwaho ingaruka, ariko ibiciro bya zahabu byagumye hejuru kubera ko nubwo uruhererekane rw’amafaranga rwahungabanye, ntabwo ari igicuruzwa cyapfa kuba cyinshi ku isoko bitewe n’uko itaboneka ahantu henshi.

Ibyo ngo bigatuma abayifite babasha gusuzuma uko isoko rihagaze, bakabasha gushyiraho igiciro gihanitse, bitandukanye n’ibindi bicuruzwa.

Dr Rusibana yakomeje ati “Igiciro cya zahabu giterwa n’ingano ya zahabu n’abayishaka, uguta agaciro kw’ifaranga, ukugabanuka kw’amafaranga yo kwizigamira mu bigo by’amabanki, ibikorwa by’ubukwe n’ibindi bihuza abantu benshi, uburyo ibigo by’amabanki ndetse na banki nkuru nabyo bikenera kuyigura, uburyo ibihugu biyohereza hanze mu bindi bihugu, uburyo isoko mpunzamahanga n’uburyo ibiciro byaho bihindagurika.”

“Ariko uyu munsi ukuzamuka kwayo guterwa n’uburyo ubukungu ku Isi yose bwahungabanye kandi ibyiciro byose by’ubucuruzi ndetse n’ishoramari bikaba bitizewe, bityo kubika amafaranga muri zahabu kuri bo niho honyine hizewe inyungu kandi mu gihe kirambye.”

Kugeza ubu mu Rwanda hari ikigo kimwe gifite ubushobozi bwo kohereza mu mahanga zahabu itunganyije, ari nabyo bituma gutanga imibare y’ingano yoherejwe bidakorwa n’Ikigo cy’Igihugu cy’Ibarurishamibare, kuko byahita bigaragaza ishusho y’ikigo runaka mu bijyanye n’imari.

Zahabu itunganywa n'uruganda Aldango Ltd yariyongereye cyane
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza