IGIHE

Hari gukorwa ubushakashatsi buzagaragaza ifumbire iberanye n’ubutaka bwa buri gace mu Rwanda

0 25-11-2021 - saa 07:32, Ferdinand Maniraguha

Ikigo cy’Igihugu gishinzwe Ubuhinzi n’Ubworozi (RAB), cyatangije ubushakashatsi bugamije gusuzuma imiterere y’ubutaka bwa buri gace mu Rwanda no kumenya ifumbire iberanye n’ibihingwa bihera.

Ubu bushakashatsi buri gukorwa binyuze mu mushinga Rwanda Soil Information Services (RwaSIS) ugamije kumenya ingano n’ubwoko bw’ifumbire ikenewe mu butaka bitewe n’agace.

Guhera muri Gashyantarre uyu mwaka, buri gukorerwa mu turere 27 ku bihingwa byatoranyijwe birimo umuceri, ibigori, ibishyimbo, ingano, imyumbati n’ibirayi.

Ubuyobozi bw’umushinga RwaSIS buvuga ko bwatangiye gakusanya ibipimo by’ibanze (samples) by’ubutaka mu duce 60 dutandukanye mu gihugu, bugakorerwa isuzuma harebwa imyunyu bukeneye n’iyo budakeneye.

Ubusanzwe mu buhinzi, akenshi abahinzi bifashisha ifumbire ya NPK, uruvange rwa Azote, Phosphore na Potassium, nyamara ugasanga ubutaka bwabo rimwe na rimwe bukeneye kimwe mu bigize iyo fumbire cyangwa se bikaba byaba ngombwa ko kimwe cyongerwa aho kuba ku kigero kimwe.

Umushakashatsi muri uyu mushinga, Kayumba John, yagize ati “Turebye nka NPK 17-17-17, ni uburyo busanzwe bwakoreshwaga mu gihugu cyose ariko ukibaza uti ese igishanga cya Nyagatare koko, kirasa n’icy’Amajyepfo cyangwa icya Rusizi?”

“Nibwo twavuze ngo reka tugerageze amafumbire agiye atandukanye. Hari ifumbire imwe ishobora kuberana n’igishanga cya Cyabayaga, indi ikaberana n’igishanga cya Rusuri gutyo.”

Nsanzimana Emmanuel, umuhinzi w’umuceri mu gishanga cya Cyabayaga mu Murenge wa Rukomo i Nyagatare, yabwiye IGIHE ko bakurikije ubushakashatsi buri gukorwa ku ifumbire bakoresha, bigaragaza ko iyo bakoreshaga mbere atari yo fumbire yari ibereye igishanga cyabo.

Ati “Ubusanzwe ku musaruro twari turi kuri toni eshanu kuri hegitari ariko umuntu abirebye, dukoresheje imwe muri izi fumbire yagaragaje ko iberanye n’iki gishanga, twagera kuri toni umunani.”

Uzasabimana Vestine, umuhinzi w’umuceri mu gishanga cya Rugeramigozi mu Karere ka Muhanga, na we yavuze ko akurikije ibyo amaze kubona mu murima we ukorerwamo ubushakashatsi, hari itandukaniro ry’ifumbire yakoreshaga n’iyo bari kugerageza.

Ati “Burya umuceri iyo wawuteye ukagira imibyare myinshi, uba wizeye ko uzagira umusaruro. Aha hari uturima turimo ifumbire yagaragaje ko ituma umuceri ubyara cyane. Kubera ko igishanga cyacu kirimo ubusharire bwinshi cyane, twasaruraga nka toni 4,5 kuri hegitari ariko urabona ko aha bibaye byiza twazagera no kuri toni esheshatu.”

Umuyobozi w’Umushinga RwaSIS, Dr Jules Rutebuka, yavuze ko ubutaka bw’u Rwanda hejuru ya 50 % busharira, bukeneye ifumbire ibufasha kugaruka mu murongo.

Yavuze ko ari ngombwa ko hagaragazwa ifumbire ibereye buri gace aho gukoresha ifumbire isa hose nk’uko byari bisanzwe.

Ati “Ubwabyo abaturage ntibaramenya ko ishwagara ishobora gukemura ikibazo, rero ibi bikorwa by’umushinga biramenyekanisha ko hari ikindi kintu kitari ifumbire wakoresha ukongera umusaruro. Ntabwo gukoresha ishwagara bisimbura imvaruganda, nta n’ubwo gukoresha imvaruganda bisimbura ishwagara, kimwe gifite umumaro wacyo mu butaka.”

Rutebuka yavuze ko ubushakashatsi niburangira mu myaka ibiri iri imbere, bazatoranya ifumbire yagiye igaragaza umusaruro mu gace runaka bitewe n’igihingwa, abe ariyo basaba Minisiteri y’Ubuhinzi n’Ubworozi, ko ako gace kose kakoresha ku gihingwa runaka.

Ati “Tubabwire tuti nushaka gukorera mu gace k’imisozi miremire, uzakoresha ishwagara ingana itya , ukoreshe n’ifumbire ingana itya, hanyuma tubihuze n’ifumbire yose izakoreshwa mu gihugu hose.”

Kimonyo Innocent, Umunyamabanga Nshingwabikorwa w’Umurenge wa Kansi mu Karere ka Gisagara, yavuze ko nk’akarere karimo ubutaka bushaririye, biteze inyungu nyinshi kuri ubu bushakashatsi.

Ati “Ubutaka ntabwo bwaguka ariko umuntu ashobora gukoresha ifumbire neza ku butaka buto umusaruro ukaba mwinshi. Iyo bibonetse umuhinzi wacu arihaza akanasagurira ku isoko.”

Abahinga umuceri mu gishanga cya Cyabayaga muri Nyagatare bavuze ko ifumbire nimara kuboneka, icyo bifuza ari uko bakunganirwa na Leta kugira ngo ibagereho ihendutse
Ibi bigori byo mu karere ka Nyagatare biri kugeragerezwaho ifumbire ngo haboneke iberanye n'ako gace
Uzasabimana Vestine uhinga umuceri muri Muhanga yavuze ko nibabona ifumbire iberanye n'igishanga cya Rugeramigozi umusaruro uziyongera
Dr Jules Rutebuka asobanura icyo biteze ubushakashatsi niburangira
Ubuyobozi bw'umurenge wa Kansi bwagaragaje ko abaturage nibabona ifumbire ijyanye n'ubutaka bwabo, bizongera umusaruro
Ibi bishyimbo biherereye mu Karere ka Gisagara bihinze mu bipande bitandukanye, aho buri kimwe cyagiye gishyirwamo ifumbire itandukanye n'iyo mu kindi ngo harebwe iyo ubutaka bwishimira
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza