IGIHE

Amahirwe ahishe muri Centrafrique, igihugu cyahaye u Rwanda ubutaka bwa hegitari ibihumbi 200 (Video)

0 4-06-2021 - saa 14:41, Ferdinand Maniraguha

Cyemezo Mata, ni umwe mu rubyiruko rw’abashoramari b’Abanyarwanda uherutse muri Centrafrique kureba amahirwe ahari ngo abyazwe umusaruro. Ni urugendo yagiyemo asa nk’uwitemberera ariko yagezeyo amahirwe ayabona mu mpande zose.

Uyu mukobwa usanzwe afite sosiyete yinjiza mu Rwanda inzoga n’imivinyo bigezweho, agikandagira i Bangui, yakubiswe n’umwuka w’igihugu cyashegeshwe n’intambara, nyamara ibyo ntibyasibanganyije ibyishimo n’icyizere cy’ejo hazaza ku bahatuye.

Mu kiganiro na IGIHE, Cyemezo yavuze ko ku mihanda ya Bangui aho yaciye abaturage babaga bicaye bari kunywa, abenshi binywera inzoga gakondo kuko izo mu nganda zikosha. Reka zikoshe ni mu gihe inyinshi zituruka i Burayi by’umwihariko mu Bufaransa, mu birometero 7,440 uvuye i Bangui.

Yahise abona ko hari amahirwe mu bijyanye no gucuruza ibinyobwa haba kwengerayo inzoga zigezweho mu nganda cyangwa se kuzigezayo mu buryo bworoshye, abahatuye bakanywa ka ‘rufuro’ cyangwa ‘umuvinyo’.

Ati “Abantu baho nta mafaranga bafite ariko bikundira kunywa agasembuye. Igihe cyose usanga bicaye basoma agacupa, nta kuvuga ngo abagore cyangwa abakobwa baratinya. Icyakora nta nganda nyinshi zihari zikora ibyo kunywa, inzoga zaho nyinshi zituruka mu Bufaransa cyangwa Cameroun. Bafite uruganda rukora ibyo kunywa rumwe. Nka Heineken hariya irahenda cyane, ni nka 2500 Frw ku icupa.”

Cyemezo ni umwe mu rubyiruko rwajyanye n’abashoramari b’Abanyarwanda muri Centrafrique muri Mata 2021. Bari bagiye kureba amahirwe ari muri icyo gihugu ku buryo Abanyarwanda bahashora imari, bakagifasha kwiteza imbere nyuma y’imyaka y’imvururu n’umutekano muke.

Abo banyarwanda bagiyeyo ku butumire bwa Perezida Faustin-Archange Touadéra, nyuma yo kubisaba Perezida Paul Kagame. By’umwihariko, Touadéra yemera u Rwanda nk’igihugu cyabashije kwiteza imbere nyuma ya Jenoside yakorewe Abatutsi no kwigobotora ibibazo by’umutekano byakurikiyeho.

Ni igihugu kandi cyamufashije umwaka ushize ubwo inyeshyamba zashakaga kuburizamo amatora yaboneyemo manda ya kabiri. Icyo gihe u Rwanda rwoherejeyo ingabo zisanga izisanzweyo mu butumwa bwa Loni bwo kubungabunga amahoro (MINUSCA).

Abanyarwanda bahawe hegitari ibihumbi 200 z’ubutaka

Abashoramari b’u Rwanda baherutse i Bangui bemerewe ubutaka bw’ubuntu bungana na hegitari ibihumbi 200. Kuri Touadéra wabutanze, ni agatonyaga mu nyanja kuko ubusanzwe icyo gihugu gifite ubutaka bwa hegitari miliyoni 30 budahingwa, nubwo benshi muri miliyoni 5.1 bagituye batabona ibiribwa bihagije.

Abashoramari 50 b’Abanyarwanda bari bagiye muri icyo bavuyeyo bishyize hamwe, bashinga sosiyete bahuriyeho izagira uruhare mu kubyaza umusaruro amahirwe ari muri icyo gihugu. Icyakora ibyo ntibivanaho ko buri umwe mu bagiye yatangiza ibindi bikorwa ku giti cye. Ku ikubitiro bakusanyije miliyoni y’amadolari (miliyari 1 Frw) yo gutangiza kandi akomeje kongerwa.

Shyaka Michael Nyarwaya, na we ni umwe mu rubyiruko rw’u Rwanda rwagiye kureba amahirwe y’ishoramari muri Centrafrique. Yavuze ko ubutaka bahawe, biyemeje kubuheraho babubyaza umusaruro.

Ati “Abantu bakiva mu ntambara baba bafite inzara birumvikana. Ubutaka twahawe na Perezida wabo ni ubwo guhingaho, ariko dukeneye aho twubaka amazu, amashuri amavuriro, amabanki. Aho buri ni nk’amasaha abiri uvuye mu mujyi Bangui, niho na Perezida avuka. Ni ahantu hakeneye gutezwa imbere. Tuzahahinga ariko hakenewe no kureba ibindi byahakorerwa.”

Centrafrique ni igihugu gifite ibikorwa remezo bike haba mu mahoteli, amabanki, imihanda, umuriro ufitwe na 3 % by’abaturage n’ibindi.

Shyaka yavuze ko yabonye icyo wahashoramo imari cyose cyakunguka. Ati “Ni igihugu gifite inzara, kikiva mu ntambara. Bakeneye imyambaro, ibyo kwa muganga, farumasi […] kubera ko bamaze imyaka myinshi bari mu kintu kimeze nk’ubukoloni ntacyo bigezaho, ubu rero hari amahirwe menshi, icyo bakifuza mu rwego rwose wagikorerayo kandi ugatera imbere bikanagufasha guteza imbere igihugu cyawe.”

Yatanze urugero rw’abantu bayobotse ubucuruzi mu Rwanda Jenoside ikirangira uburyo ababigiyemo bashikamye bungutse ku rwego rwo hejuru. Yavuze ko na Centrafrique ikiri muri ibyo bihe.

Shyaka yavuze ko nta mpungenge z’umutekano zikwiriye kubaho kuko ingabo z’u Rwanda zizewe cyane muri icyo gihugu

Nk’umuntu uri mu bijyanye no korohereza ibicuruzwa kugera aho bicururizwa (Logistics), Shyaka yavuze ko yasanze hari amahirwe menshi muri Centrafrique, igihugu kidakora ku nyanja.

Icyambu cya hafi cyatuma ibicuruzwa bigera muri Centrafrique kiri i Douala muri Cameroun. Kuhava ugera muri Centrafrique harimo ibirometero bigera ku 1400.

Yavuze ko biyemeje gufungura ishami i Douala kugira ngo bajye borohereza imenyekanisha ry’ibicuruzwa by’Abanyarwanda maze bigere i Bangui vuba. Ni mu gihe kandi bashaka gufungura ububiko bw’ibicuruzwa i Bangui kugira ngo ibihageze bibone aho bipakururirwa n’aho bibikwa.

Ibanga ni ukubaha abenegihugu

Cyemezo Mata yavuze ko no mu bijyanye n’imyidagaduro n’ubukerarugendo, naho hari amahirwe ku bashoramari b’Abanyarwanda by’umwihariko urubyiruko.

Ati “Mbere yo kugenda muri Bangui baduhitishijemo amahoteli abiri gusa, urumva ko abashoramari bafite kujyayo ngo bubakeyo amahoteli. Naganiriye n’abatuye hariya bambwira ko aho kwidagadurira hadahagije, usanga aho gusohokera ari hamwe kandi igihugu ni kinini cyane.”

“Ujyanyeyo resitora idahenze ariko nziza yakunguka, benshi bibwira ko bisaba igishoro gihambaye ariko make na yo arunguka kandi ukoranye n’abandi biba byiza kurushaho.”

Icyakora Cyemezo yavuze ko Abanyarwanda bashaka gushora imari muri icyo gihugu, bakwiriye kugenda mu kinyabupfura ku buryo batereka abenegihugu ko babarenze kugira ngo bitazamura ibindi bibazo.

Ati “Ntabwo twajya muri kiriya gihugu tugiye kubereka ko tubarenzeho, ahubwo tugomba kugenda tugafatanya kugira ngo batatubonamo imbogamizi kuko ntiwajyayo ugiye gukora ubuhinzi ngo ujyane n’abaguhingira.”

Ibyo akenshi nibyo bishwanisha abenegihugu n’abanyamahanga, bagatangira kubona ko baje kubanyunyuza imitsi aho kubafasha kwiteza imbere.

Nubwo amahirwe y’ishoramari ahari, ikibazo cy’amabanki akora nabi kandi agafunga kare, umuriro n’amazi bidahagije, uburyo bwo gutwara abantu n’ibintu budateye imbere byose ni bimwe mu mbogamizi ugiyeyo akwiriye kwitega, nubwo ari nayo mahirwe ku bashoramari.

Mu byo Perezida Touadéra yemereye Abanyarwanda harimo ko ibikorwa byabo bizasonerwa imisoro mu gihe gishobora kugera ku myaka 10. Ab’inkwakuzi bamaze gutangizayo ubucuruzi bafatirana ayo mahirwe.

Shyaka yavuze ko nta mpungenge z’umutekano zikwiriye kubaho kuko ingabo z’u Rwanda zizewe cyane muri icyo gihugu, kandi by’umwihariko zikaba arizo zirinda umutekano muri Bangui.

Yagize ati “Twamazeyo iminsi itanu ariko twarinze tugaruka ntawe bariye n’urwara. Twagiye no mu ntara tunyura mu mashyamba ariko ntacyo twabaye. Urebye uburyo igihugu cyacu kirinze umutekano muri kiriya gihugu biguha icyizere cyo kujya kuhashora imari.”

Uru rubyiruko rwavuze ko Abanyarwanda bakwiriye gutinyuka, bakajya kubyaza umusaruro ayo mahirwe muri Centrafrique haba abafite igishoro n’abafite ubumenyi.

Cyemezo ati “bareke ubwoba kuko ntaho wagera udafashe risques, bakorere hamwe kugira ngo barusheho kwaguka. Ntibagatinye gutangira, ibintu bihera hasi bikagenda bizamuka.”

Centrafrique yemeye ko mu gihe Abanyarwanda bazaba batangiye gukora, bazahabwa aho gukorera, bakoroherezwa kubona ibyangombwa byo gutura ndetse n’ubwenegihugu ku babushaka.

Cyemezo Mata yavuze ko ku rubyiruko, Centrafrique hari amahirwe menshi yo gutera imbere haba ku bafite ubumenyi n'abafite igishoro cy'amafaranga
Mu Mujyi wa Bangui ni hamwe muri hake ku isi ushobora kubona ingorofani ihetse imodoka
Isoko ry'imyenda n'ubundi buconco mu mujyi wa Bangui
Marché de Combatant, agace gakorerwamo ubucuruzi cyane muri Bangui
Stade Nkuru y'Igihugu yitwa '20 000 Stades'. Yafunguwe mu 2006. Ijyamo abantu ibihumbi 20 nkuko izina ryayo ribivuga
Bangui ni umujyi urimo ibikorwa remezo bike kubera imyaka igihugu cyamaze mu ntambara
Lac Ubangui ni ikiyaga gitandukanya iki gihugu na RDC. Mu nkengero zacyo Ingabo z'u Rwanda zarahageze mu ntambara ya Congo yakuyeho Perezida Joseph Desire Mobutu
Ubangui Hotel ni imwe muri hotel ziyubashye mu Mujyi
Iyi nyubako byitezwe ko izakoreramo Banki
Muri aka gace hitwa PK 0, niho batangirira kubara ibilometero bya Bangui. Uduce twose duhabwa amazina hagendewe ku ntera uvuye muri PK0Muri aka gace hitwa PK 0, niho batangirira kubara ibilometero bya Bangui. Uduce twose duhabwa amazina hagendewe ku ntera uvuye muri PK0
Mu Mujyi rwagati, abantu bakunda gukoresha moto mu ngendo za hato na hato
Ku musozo wa Ubangui, harimo ibiti bimaze imyaka n'imyaniko. Ibinini biba bifite nimero biziranga, ku buryo ugomba kuzagira icyo atema aba azi nimero yacyo. Bivugwa ko bitemwa bikajyanwa mu mahanga
Iyi nyubako iherereye Ubangui yahoze ituyemo François Bozizé, umwe mu bayoboye iki gihugu
Ibikorwa remezo birimo inyubako z'ubucuruzi byatangiye kuzamurwa hirya no hino kuva iki gihugu cyatangira kugaragaramo agahenge
Muri Marché de Combatant mu muhanda uturuka ku Kibuga cy'Indege, uhasanga abantu uruvunganzoka, bacuruza. Hacururizamo abiganjemo abakirisitu

Amafoto: Girinema Philbert

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza