IGIHE

Umusaruro w’ubuki mu Rwanda wageze kuri toni 5,200 ku mwaka

0 14-11-2019 - saa 09:55, Twarabanye Venuste

Urwego rw’ubuvumvu rwakunzwe kuvugwamo ibibazo bitandukanye byiganjemo ibijyanye n’imihindagurikire y’ikirere, imiti yica udukoko n’ikendera rya bimwe mu bimera, inzuki zihovwaho bikabangamira umusaruro w’ubworozi bw’inzuki.

Kuba hari inzuki zipfa bitewe n’uko zegereye ibikorwa by’ubuhinzi bikoresha imiti yica udukoko n’ubuke bw’imizinga ya kijyambere ni bimwe mu bigaragazwa n’abavumvu nk’imbogamizi ku musaruro.

Inganda zimwe zashyiriweho kongera agaciro umusaruro ukomoka ku nzuki ntizibona umusaruro uhagije wo gutunganya.

Uruganda rw’ubuki rwa ‘Gishwati Natural Honey’ ruherereye mu Karere ka Rutsiro, rwatangiye gukora muri Mutarama 2018, ruteganya kujya rutunganya ubungana na toni 160 ku mwaka, nyamara ngo ntirwigeze rurenza Toni 13 umwaka ushize.

Umuyobozi w’uru ruganda, Nyirakamineza Marie Chantal, yatangarije IGIHE ko “Mu mwaka ushize rwatunganyije ubugera kuri toni 13 gusa muri toni zigera ku 189 rwateganyaga.”

Yakomeje agira ati “Ahanini hari imihindagurikire y’ikirere, kuko imvura igenda igwa mu gihe kitari icyayo, igihe bagombye guhakura imvura ikaba iraguye ubuki bukaba burabuze, inturusu zarumye kandi burya ubuki bwo mu Rwanda akenshi ni inturusu inzuki zikuraho ibyo kurya, ikindi ni uko nk’imizinga iri hafi y’ibihingwa hari igihe batera imiti inzuki zigapfa.”

Imibare iheruka y’ikigo gishinzwe ubuhinzi n’ubworozi, RAB, igaragaza ko umusaruro watangiye kuzamuka aho wavuye kuri Toni 5,105 mu 2016 ugera kuri Toni 5,200 mu 2017. U Rwanda rufite intego yo kugera kuri Toni 8,000 mu 2024.

Umuyobozi w’Ishami rishinzwe ubworozi muri Minisiteri y’Ubuhinzi n’Ubworozi, Dr Rutagwenda Théogène, yabwiye IGIHE ko ukwiyongera k’umusaruro guterwa no kuvugurura politiki y’ubworozi hagamijwe kongera umusaruro no kuvugurura imikorere bikajyana no gukangurira abantu kwibumbira mu makoperative.

Ati “Habayeho ubukangurambaga no kongera ubumenyi, ibikoresho bishya n’ishoramari mu buvunvu kuko umusaruro ugera ku isoko mpuzamahanga. Ingufu zashyizwe muri buziranenge n’ibisabwa kugera ku isoko mpuzamahanga.”

Muri Kamena 2014 ubwo u Rwanda rwemererwaga kohereza ubuki i Burayi rwoherejeyo Toni 12.

Ubuki bwoherejwe mu mahanga hagati ya Kamena 2018 na Nyakanga 2019 ni ibilo 2,651 bwinje $ 1,991 nkuko bitangazwa n’Ikigo gishinzwe ibyoherezwa mu mahanga bikomoka ku buhinzi n’ubworozi, NAEB.

Mu Rwanda abavumvu bamaze kuba 83,000, ariko abakora cyane ni 45%.

Imibare y’ihuriro ry’abavumvu y’umwaka ushize yerekana ko hari imizinga ya kijyambere 90,000 n’iya gakondo 200,000 mu gihugu.

Ibyo nabyo ni imbogamizi kuko nko mu makoperative 13 akorana n’uruganda rw’i Rutsiro rufite iya kijyambere itagera kuri 200, mu gihe yakagombye kuba igera ku 1,000.

Ikilo cy’ubuki kigura hagati ya 2,000 na 3,000Frw ku muvumvu no hagati ya 4,000 na 5,000Frw ku buki butunganyije.

Kuvugurura politiki hagamijwe kongera umusaruro ni bimwe mu bituma umusaruro w'ubuki wiyongera
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza