IGIHE

Menya ibihugu Umunyarwanda ashobora kwinjiramo adasabye Viza

0 9-10-2021 - saa 14:57, IGIHE

Pasiporo y’u Rwanda iri ku mwanya wa 87 ku Isi mu zikomeye aho ifite amanota 61. Inganya ubushobozi n’iya Benin n’iya Mongolia. Igeze kuri uyu mwanya ivuye ku wa 80 yariho mu gihembwe cya kane cy’umwaka ushize.

Icyegeranyo cyakozwe na Henley Passport Index kigaragaza uko Pasiporo zirutana ni cyo cyabyemeje. Cyakozwe hagendewe ku makuru gikesha Ishyirahamwe Mpuzamahanga rishinzwe ingendo (IATA).

Kuva mu 2006 Henley ikora iki cyegeranyo, icyo mu gihembwe cya kane cy’uyu mwaka cyakozwe hanarebwa ku mbogamizi Isi yahuye na zo zangije ingendo mu mezi 18 ashize Isi yibasiwe na Covid-19.

Kigaragaza ko umuntu ufite Pasiporo y’u Buyapani na Singapore ariwe utunze Pasiporo ikomeye ku Isi kuko aba ashobora kwinjira mu bihugu 192 nta Viza yatswe.

Umunyarwanda ufite Pasiporo ashobora kwinjira mu bihugu 61 atishyuye Viza cyangwa se ayifatiye ku mupaka mu gihe ibyo asabwa guhaguruka ayifite ari 138.

Mu bihugu ashobora kwinjiramo adasabye Viza ni 24, harimo nk’ibyo muri Oceanie nka Micronesie na Vanuatu.

Ibyo mu Burasirazuba bwo hagati, harimo Qatar. Ibyo bivuze ko nk’umwaka utaha, umunyarwanda wifuza kujya gukurikirana imikino y’igikombe cy’Isi i Doha icyo bimusaba ni ukuzashaka ibindi bisabwa birimo itike yo kureba umukino, iy’urugendo n’ibizamutunga ubundi akagenda.

Icyo gihe kujya muri Qatar bizaba byoroshye kuko RwandAir izaba yaratangiye ingendo zayo zigana i Doha.

Ibihugu bitanu byo muri Caraibes aribyo Barbados, Dominique, Grenada, Haiti na Saint-Vincent-et-les Grenadines na byo ashobora kubyinjiramo atatswe Viza.

Muri Aziya, ho ashobora kwemererwa kwinjira mu bihugu bitatu gusa adasabye Viza, ibyo ni Philippines, Singapore na Indonesie.

Muri Amerika y’Epfo, ho ni igihugu kimwe, Equateur gusa mu gihe muri Amerika ya Ruguru nta na kimwe.

Muri Afurika, ho hari ibihugu 12 ashobora kwinjiramo atatswe Viza. Ibyo birimo Angola, Benin, u Burundi, Repubulika ya Centrafrique, RDC, Gambia, Kenya, Ibirwa bya Maurice, São Tomé-et-Príncipe, Sénégal, Tanzania na Uganda.

Ku rundi ruhande, Guverinoma y’u Rwanda yiyemeje gufungurira amarembo abanyamahanga nk’uburyo bwihariye buzayifasha kwagura ubukerarugendo, ishoramari no kugera ku ntego yo kwinjiza amadolari asaga miliyoni 150 buri mwaka aturutse kuri gahunda yo kwakira ibiganiro, inama mpuzamahanga n’ibikorwa bitandukanye.

Muri Werurwe 2020 u Rwanda rwafashe umwanzuro w’ivanwaho ry’ikiguzi cya viza ku baturage bo mu bihugu bigize Umuryango wa Afurika Yunze Ubumwe (African Union), abo mu bihugu bigize Umuryango w’Ibihugu bikoresha ururimi rw’Icyongereza (Commonwealth) n’abo mu bihugu bihuriye ku rurimi rw’Igifaransa (Francophonie) hagamijwe korohereza abanyamahanga kugana u Rwanda.

Umunyarwanda ufite Pasiporo ashobora kwinjira mu bihugu 61 atishyuye Viza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza