IGIHE

Indwara ya kabore, inzitizi ikomeye ku musaruro w’imyumbati mu karere k’Ibiyaga Bigari

0 21-03-2021 - saa 12:35, Mutangana Gaspard

Inzobere mu buhinzi bw’imyumbati mu karere k’Ibiyaga bigari zagaragaje ko hakenewe ingamba zikomeye mu guhashya indwara ya kabore kugira ngo umusaruro w’icyo gihingwa urusheho kwiyongera.

Bagaragaje ko kudahinga imbuto zuzuje ubuziranenge biri ku isonga mu bitiza umurindi kwiyongera kwa Kabore n’izindi ndwara mu buhinzi bw’imyumbati.

Byatangajwe kuwa Gatanu mu nama yagarukaga ku mushinga wo kurwanya Kabore n’indwara y’Ubibembe bw’imyumbati.

Umushinga wo kurwanya izi ndwara zombi mu Rwanda no mu Burundi wiswe CBSD (Cassava Brown Streak Disease) Control Project, umaze imyaka itatu.

Inzobere zitandukanye zitabiriye inama yabaye hifashishijwe ikoranabuhanga ry’amashusho, hagamijwe kurebera hamwe umusaruro w’uyu mushinga. Bavuze ko iteranbere ry’ubuhinzi bw’imyumbati mu karere k’Ibiyaga Bigari cyane cyane mu Rwanda no mu Burundi rikibangamiwe na Kabore, ndetse n’Ububembe.

Bimwe mu byakozwe muri uyu mushinga harimo gukora ubushakashatsi mu bice byiganjemo iyi ndwara. Hashyizweho ingamba zo guhangana n’ingaruka zayo kandi hatuburwa imbuto nshya zihanganira ubu burwayi.

Umuhuzabikorwa w’uyu mushinga mu Kigo cy’Igihugu cy’Iterambere ry’Ubuhinzi n’Ubworozi mu Rwanda, RAB, Dr Nduwumuremyi Athanase, yavuze ko mu Rwanda hari imbuto nyinshi batubuye ariko abahinzi bakaba batitabira kuzihinga.

Ati “Imbuto RAB irazifite zihagije, buri gihembwe cy’ihinga ziba zihari ahubwo tugira ikibazo cy’uko abantu bataza kuzigura ngo bazitere.”

Yakomeje agira ati “Indwara ziterwa na virusi, nta wundi muti uhari wo guhangana nazo uretse gukora imbuto zibasha kwihanganira ubu burwayi. Tumaze gukora amoko menshi y’imbuto z’imyumbati zihanganira izo ndwara.”

Hashize imyaka itatu Ikigega Mpuzamahanga Giteza Imbere ubuhinzi, IFAD, kinyujije inkunga y’amafaranga mu Kigo Giteza Imbere Ubuhinzi muri Afurika yo Hagati, IITA, ahabwa Ikigo cy’Igihugu cy’Iterambere ry’Ubuhinzi n’ubworozi mu Rwanda, RAB, n’Ikigo cy’Ubumenyi mu by’Ubuhinzi i Burundi, ISABU (Institut des Sciences Agronomiques du Burundi) yo guhangana n’indwara ya Kabore mu myumbati mu bihugu byombi.

N’ubwo guhinga imbuto zihanganira ubu burwayi ari bwo buryo bwizewe bwo kuyihashya, abahinga imyumbati mu Rwanda ngo ntabwo bitabira guhinga izo mbuto kandi zihari.

Iterambere ry'ubuhinzi bw'imyumbati mu karere k'Ibiyaga Bigari ridindizwa n'indwara zirimo kabore
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza