IGIHE

U Rwanda rwatangiye gukora dosiye isaba ko Pariki ya Nyungwe ishyirwa mu murage w’Isi

0 10-06-2021 - saa 08:54, Prudence Kwizera

U Rwanda rwatangiye gukora dosiye isaba ko Pariki y’Igihugu ya Nyungwe yashyirwa ku rutonde rw’Umurage w’Isi rukorwa n’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO), hagamijwe kurinda no kumenyekanisha ibikorwa bibumbatiye amateka, umuco n’umurage hirya no hino.

Inzego zifite aho zihurira n’umuco, kubungabunga urusobe rw’ibinyabuzima n’abashinzwe gukora iyo dosiye bateraniye mu Karere ka Huye kuri uyu wa Gatatu tariki ya 9 Kamena 2021, bungurana ibitekerezo barebera hamwe ibibaza biyikubiyemo n’uburyo yakwihutishwa.

Izo nzego zirimo abahagarariye Pariki ya Nyungwe, Pariki y’Ibirunga, Inteko Nyarwanda y’Umuco, Ikigo cy’Igihugu cy’Iterambere (RDB), Komisiyo y’Igihugu Ikorana na UNESCO, Ikigo cy’Igihugu cyo Kubungabunga Ibidukikije (REMA), Ikigo cy’Igihugu cy’Ubutaka n’imiryango yigenga ikora ibikorwa byo kubungabunga ibidukikije n’urusobe rw’ibinyabuzima.

Umunyamabanga Mukuru wa Komisiyo y’Igihugu Ikorana na UNESCO, Mutesa Albert, yavuze ko Pariki y’Igihugu ya Nyungwe niramuka ishyizwe mu murage w’Isi ari inyungu ikomeye ku Rwanda, kandi bari gukora ibishoboka byose ngo dosiye izabe yarangiye mu ntangiriro z’umwaka utaha kugira ngo ihite yoherezwa.

Ati “Iyo turebye abahanga ba UNESCO bari hano bazi pariki n’inzira binyuramo twumva ko bishobora kuba byamara nk’imyaka ibiri [kugira ngo dosiye yemerwe muri UNESCO] kuko biramutse bigenze neza twayigezayo nko mu kwezi kwa Mbere cyangwa ukwa Kabiri k’umwaka utaha.”

Umwe mu bakozi bakuru b’ikigo cya UNESCO, gikurikirana ibijyanye n’umurage w’Isi Dodé Houehounha, yavuze ko kuba u Rwanda rufite ubushake bwo gusaba ko Pariki y’Igihugu ya Nyungwe ishyirwa mu murage w’Isi kandi ikaba ifite umwihariko w’imiterere yayo n’ibinyabuzima biyibonekamo, hari amahirwe menshi ko dosiye nikorwa neza izemerwa bidatinze.

Ati “Kugira ngo yemerwe, icya mbere ni ubushake bw’u Rwanda bwo kubisaba no kubikorera dosiye neza hakerekanwa ko yujuje ibisabwa kandi ifite umwihariko w’imiterere yayo n’ibibonekamo birimo urusobe rw’ibinyabuzima n’ibindi kandi ari ahantu habungabunzwe neza hafite imbibi zigaragara zemewe.”

Ambasaderi w’u Rwanda mu Bufaransa akaba anaruhagarariye muri UNESCO, Dr François-Xavier Ngarambe, yavuze ko hari icyizere ko Pariki y’Igihugu ya Nyungwe izemerwa igashyirwa mu murage w’Isi.

Ati “Iyo tuvuze ngo Pariki ya Nyungwe tuyishyire mu murage w’Isi mu by’ukuri tuba tubwira abatuye Isi ngo nimuze tubasangize, ibi ni ibyacu turagira ngo bibe ibyacu twese. Navuga rero ko amahirwe yo kugira ngo izemerwe ari menshi cyane.”

Pariki y’Igihugu ya Nyungwe igizwe n’ishyamba cyimeza riri ku buso kilometero kare 1019, iherereye mu Burengerazuba bw’Amajyepfo y’u Rwanda. Ibamo urusobe rw’ibinyabuzima birimo inyamaswa n’ibimera bitandukanye. Ni ishyamba ry’inzitane ryo mu misozi miremire muri Afurika.

Iri shyamba rifatwa nk’ikigega cy’amazi y’u Rwanda kuko ritanga 70% by’amazi y’u Rwanda kandi ribonekamo isoko ya kure y’uruzi rwa Nil. Ribonekamo amoko y’Inguge atandukanye, amoko y’ibimera arenga 1000, inyamabere zirenga 90 n’amoko y’inyoni arenga 320. Habamo kandi ubwoko bw’inyamaswa zikurura ba mukerarugendo nk’Impundu n’Inkomo zidakunze kuboneka ahandi ku Isi.

Zimwe mu nyungu u Rwanda ruzagira Pariki ya Nyungwe nimara gushyirwa mu murage w’Isi ni uko bizaba ari ishema ku gihugu, abayisura baziyongera hamwe n’amafaranga batanga.

U Rwanda kandi ruzarushaho kumenyekana ku rwego mpuzamahanga birwongerere amahirwe yo kuganwa n’abarusura baje no gushora imari, abantu benshi bazabona akazi gakomoka ku ishoramari kandi hazaboneka n’inkunga nyinshi zigamije kwita kuri Nyungwe no kuyibungabunga.

Bizongera ubukungu bw’u Rwanda buturuka ku bidukikije (Green economy) haba ku nguzanyo cyangwa mu mpano bishingiye ku kuba rwarabungabunze ibidukikije n’ibinyabuzima muri rusange.

Kugeza ubu UNESCO imaze kugira site z’Imirage y’Isi zigera ku 1 121 ziva mu bihugu 167. U Butaliyani n’u Bushinwa ni byo bihugu bifite site nyinshi zanditswe ku rutonde.

Pariki y’Igihugu ya Nyungwe igizwe n’ishyamba cyimeza riri ku buso kilometero kare 1019
Umukozi w’Ikigo cya UNESCO gikurikirana ibijyanye n’umurage w’Isi, Mr Dodé HOUEHOUNHA, yavuze ko kuba u Rwanda rufite ubushake bwo gusaba ko Pariki ya Nyungwe ishyirwa mu murage w’Isi biruha amahirwe yo kwemerwa
Ambasaderi w’u Rwanda mu Bufaransa akaba anaruhagarariye muri UNESCO, Dr François-Xavier Ngarambe, yavuze ko hari icyizere ko Pariki y’Igihugu ya Nyungwe izemerwa igashyirwa mu murage w’Isi
Umunyamabanga Mukuru wa Komisiyo y’Igihugu ikorana na UNESCO, Mutesa Albert, yavuze ko Pariki y’Igihugu ya Nyungwe niramuka ishyizwe mu murage w’Isi ari inyungu ikomeye ku Rwanda
Hasobanuwe ko zimwe mu nyungu u Rwanda ruzagira Pariki ya Nyungwe nimara gushyirwa mu murage w’Isi ari uko bizaba ari ishema ku Rwanda, abayisura baziyongera n’amafaranga batanga yiyongere
Hasobanuwe ko Nyungwe nishyirwa mu murage w'Isi u Rwanda ruzarushaho kumenyekana ku rwego mpuzamahanga birwongerere amahirwe yo kuganwa n’abarusura baje no gushora imari

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza