IGIHE

IATA yatanze amabwiriza akwiye gukurikizwa mu gufungura ingendo z’indege hirindwa Coronavirus

1 19-06-2020 - saa 16:27, IGIHE

Ikigo Mpuzamahanga gishinzwe ingendo zo mu Kirere (IATA), cyashyizeho amabwiriza akwiriye gukurikizwa mu gihe ingendo z’indege zatangiye gufungurwa, byose bigakorwa hubahirizwa uburyo bwo kwirinda icyorezo cya Coronavirus.

IATA igaragaza ko Guverinoma zikwiye gushyiraho uburyo bufasha mu gupima umuntu winjiye mu gihugu ku buryo bishobotse igisubizo kiboneka mu gihe gito cyane. Ikindi IATA isaba ni uko ikiguzi cya serivisi zo gupima gikwiye kuba kiri hasi ku buryo kitabera imbogamizi abagenzi.

Umuryango mpuzamahanga ushinzwe ingendo za gisivile, (ICAO) uherutse gutangaza amabwiriza akwiye kwifashishwa n’abantu bagiye gufata indege, aho agomba kubahirizwa na Guverinoma zose.

Umuyobozi Mukuru wa IATA, Alexandre de Juniac, yavuze ko Sosiyete z’indege zirajwe ishinga no kugabanya ibyago byo gukwirakwira kwa COVID-19 binyuze mu ngendo zo mu kirere, ndetse ko gupima COVID-19 bikwiye kubigiramo uruhare rukomeye.

Ati “Ariko bikwiye gukorwa bijyanye n’amabwiriza ya ICAO agamije koroshya ingendo.”

Asaba ko gupima bikwiye kujya bikorwa vuba bishoboka kandi bigatanga ibisubizo byizewe, bigakorerwa ku bantu benshi, aho avuga ko ari ingingo ikwiye ikubiye mu mabwiriza y’urugendo.

IATA isobanura ko gupima COVID-19 bizajya bikorwa mbere y’uko umuntu agera ku Kibuga cy’Indege kandi bigakorwa mbere y’amasaha nibura 24 y’urugendo. Ikindi ni uko abagenzi bazajya bagera ku Kibuga cy’Indege biteguye guhita bagenda ku buryo byagabanya ubucucike bigafasha ko mu gihe hari uwanduye atahura n’abandi ngo abe yabanduza.

Gupima kandi bikwiye gukorwa mu buryo bworohereza abagenzi, ntibibabere umutwaro mu buryo bw’ubukungu, ibi bishingirwa ku kuba mu bihugu bimwe na bimwe by’u Burayi, gupima iki cyorezo bisaba ko umuntu yishyura amadolari nibura 200.

Gupima bigomba gukorwa mbere umuntu ategura urugendo cyangwa se bigakorerwa aho ahagurukira, mu gihe umugenzi apimwe agasanganwa iki cyorezo, ntabwo aba akibashije gukomeza urugendo rwe ahubwo ahita atangira kwitabwaho.

Icyo gihe uwo murwayi yitabwaho hagendewe ku mategeko y’igihugu arimo, ntabwo sosiyete y’indege isabwa kumusubiza aho aturutse cyangwa se ngo ihabwe ibindi bihano mu buryo bw’amafaranga cyangwa se ngo yamburwe uburenganzira bwo gukora ingendo muri icyo gihugu.

Abakora ingendo z’indege muri iki gihe basabwa kujya ku kibuga cy’indege bambaye agapfukamunwa ndetse aho biri ngombwa bakamenyekanisha imizigo yabo bifashishije ikoranabuhanga aho kuza kubikorera ku kibuga cy’indege.

Ku kibuga cy’indege, abantu bagirwa inama yo kwinjira bahanye intera, bagapimwa umuriro, bagera mu ndege nabwo bakibuka gukomeza kwambara udupfukamunwa banirinda kugendagenda mu ndege ahubwo umuntu akaguma hamwe ari nako abashinzwe isuku mu ndege bita cyane ku gukomeza gusukura indege.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Uwa God 2020-06-19 11:27:04

Ahubwo bafungure vuba tugende gushaka umugati

Kwamamaza