IGIHE

Amasezerano na Arsenal no Kwita ku ngagi: Ibyazamuye ubukerarugendo mu Rwanda mu myaka 10 ishize

0 13-09-2021 - saa 06:29, Muhonzire Sylvine

Abazi ibisakuzo, iyo bavuze bati ‘havamo umwe ntitwarya’ barasubiza ngo ‘ishyiga ry’inyuma’! Mu bukungu bw’u Rwanda ubukerarugendo bwabaye iryo shyiga ry’inyuma kuko rifatiye runini umusaruro w’igihugu, aho mu 2019 bwari bugize 15.1% by’umusaruro mbumbe w’u Rwanda.

Muri raporo y’Akanama Mpuzamahanga kita ku bukerarugendo n’ingendo (WTTC) ya 2020, hagaragajwe ko mu 2019 ubukerarugendo bwazamuye GPD y’u Rwanda ku kigero cya 10.9% birugira urwa kabiri muri Afurika yo munsi y’Ubutayu bwa Sahara mu bihugu bifite urwego rw’ubukerarugendo ruri gutera imbere cyane.

Ibi byose ni umusaruro w’imbaraga igihugu cyashyize mu kumenyekanisha u ibyiza by’u Rwanda binyuze muri ‘Visit Rwanda’, kubungabunga ingangi zo mu Birunga zari mu zigiye kuzimira, kubaka ibikorwaremezo birubashisha kwakira inama mpuzamahanga zikomeye ku Isi, kongera umubare w’inyamaswa z’inkazi no kwita kuri parike z’igihugu

Kuva mu 2000 u Rwanda rwashyize imbere ubukerarugendo ndetse rwiyemeza ko ruzaba rwinjiza miliyoni 800$ mu 2024 avuye mu bukerurarugendo, nubwo iyi ntego ishobora gukomwa mu nkokora n’icyorezo cya Covid-19 cyahagaritse ingendo n’inama mpuzahamahanga.

Ayo bwinjije yikubye kabiri kuva mu 201o kugeza mu 2019

Mu bushakashatsi bwakorewe mu Rwanda bukozwe na Kaminuza Nyafurika y’Imiyoborere [ALU] ku ruhare rw’ubuzima bw’inyamaswa ku bukungu bwa Afurika, bwagaragaje ko ubukerarugendo bw’u Rwanda bwagiye buzamuka , aho mu 2010 bwarwinjirizaga arenga miliyoni 200$, mu 2019 yikuba akabiri arenga miliyoni 400$.

Ubu bushakashatsi bugaragaza ko mu basura u Rwanda harimo abaza kwishimisha bareba ibyiza birutatse, gusura imiryango, abajya mu rugendo shuri, abaza ku mpamvu z’akazi n’abaza kururambagiza ngo batangire imishinga y’ubucuruzi cyane ko u Rwanda ari kimwe mu bihugu bya Afurika bisurwa cyane n’abaje ku mpamvu z’ubucuruzi.

Mu 2019, u Rwanda rwabaye urwa mbere muri Afurika mu kwakira inama zitandukanye ndetse kuva mu 2014 kugeza mu 2019 amafaranga rwinjizaga avuye mu kwakira inama yiyongereyeho 47.3%, aho mu bantu bose baje muri izo nama 25% bari baje ku mpamvu z’ubucuruzi.

Amasezerano na Arsenal, mu byazamuye ubukerarugendo

Mu 2018, benshi batangajwe no kumva ko Urwego rw’Igihugu rushinzwe iterambere RDB, rwasinyanye amasezerano y’imyaka itatu n’ikipe ya Arsenal yo mu Bwongereza, ihabwa miliyoni 30 z’Amayero, aho abakinnyi b’iyi kipe bambara ‘Visit Rwanda’ ku kuboko kw’ibumoso haba mu ikipe nkuru, iy’abatarengeje imyaka 23 no mu ikipe y’abagore.

Nubwo benshi babinenze ariko byatanze umusaruro ugaragara cyane ndetse muri uwo mwaka abakerarugendo baturuka mu Bwongereza biyongeraho 20%, ndetse mu mwaka wakurikiyeho wa 2019 umubare w’abasura u Rwanda baturutse mu Bwongereza wariyongereye baza ku mwanya wa kabiri mu bantu benshi basuye igihugu.

Kubera umusaruro w’aya masezerano, muri Kanama 2021 RDB yatangaje ko yongereye amasezerano n’iyi kipe, igaragaza ko gukorana nayo byazamuye umusaruro w’ubukerarugendo bw’u Rwanda ku rugero rwa 17% ugera kuri miliyoni 498$ mu 2019 uvuye kuri miliyoni 425$ mu 2018.

Uretse iyi mikoranira na Arsenal, ubu bushakashatsi bugaragaza ko kwita ku ngagi zo muri parike y’Igihugu y’Ibirunga no kuzibungabunga nabyo biri mu bikurura ba mukerarugendo baturutse hirya no hino, aho imibare yerekana ko mu 2019, 91.7% by’amadevise yavuye muri parike z’igihugu uko ari enye yaturutse muri parike y’Igihugu y’Ibirunga ndetse 50% by’abayisuye bose bari baje kureba ingagi.

Umuhango wo Kwita Izina abana b’ingagi uba buri mwaka guhera mu 2005, nawo wagize uruhare runini mu kuzana abakerarugendo cyane cyane ibyamamare biba byaje kwita izina, binagira uruhare mu kuzimenyekanisha no kwamamaza ibikorwa by’u Rwanda mu mahanga ku bijyanye no kubungabunga ubuzima bw’ingangi.

Ubu bushakashatsi bwerekana ko uyu muhango ari umwe mu yubashywe ku Isi ndetse mu 2018 wateranyije abantu 65.000 kuko uhamagarira Isi kwita ku rusobe bw’ibinyabuzima.

Ubu mu Rwanda hari kubakwa ikigo i Musanze cyitiriwe umunyarwenya Ellen DeGeneres, aho cyitezweho kuzaba igicumbi cy’ubushakashatsi n’uburezi ku ngagi.

Kubungabunga parike byatanze umusaruro

Nyuma y’imyaka mike, Jenoside yakorewe Abatutsi mu 1994 isize icyasha u Rwanda, rwahinduye isura ruzamura izina ryarwo mu mahanga binyuze mu bikorwa byinshi birimo kureshya ba mukerarugendo n’abashoramari, hashyirwa imbere umutekano, hubakwa ibikorwaremezo birimo n’amahoteli, kubungabunga za parike, no kongera isuku.

Mu 2008, u Rwanda rwaciye amashashi, nyuma ibikorwa by’isuku birakazwa ndetse uyu munsi Kigali ni imwe mu mijyi irangwamo isuku ku Isi.
Uretse isuku, u Rwanda rwashyize ingufu mu kubungabunga parike, abaturage bari bazituyemo Jenoside ikirangira barimurwa, iy’Akagera yongerwamo inyamaswa eshanu z’inkazi [Intare, inzovu, inkura, ingwe n’imbogo] ku buryo ziri mu bakurura abayisura ndetse niyo isurwa na benshi nubwo itinjiza nk’iy’Ibirunga.

Imibare ya 2019 igaragaza ko mu madevise yavuye muri Parike z’igihugu, y’Akagera yinjijemo 5.9%, iya Nyungwe yo yinjiza 2.4% mu gihe asigaye yose yinjijwe na Parike y’igihugu y’ibirunga.

Ubu gusura Parike y’ibirunga byarorohejwe, kubera Covid-19 amafaranga yaragabanyijwe, aho Abanyarwanda ndetse n’abatuye mu Karere ka Afurika y’Iburasirazuba bishyura amadorali 200 ku muntu, abanyamahanga batuye mu Rwanda bakishyura 500$ naho abanyamahanga baturutse hanze bakishyura 1500$.

Ibyamamare hirya no hino ku Isi bijya mu Rwanda mu muhango wo Kwita Izina ingagi
Amasezerano ya Arsenal n'u Rwanda yatumye Abongereza barusuraga biyongeraho 20% mu 2018
Umunyarwenya akaba n'umunyamakuru Ellen DeGeneres ni umwe mu bashyigikiye gahunda ya Visit Rwanda
Binyuze muri Arsenal abatuye Isi barushijeho kumenya u Rwanda
Gahunda ya Visit Rwanda yatanze umusaruro ndetse amasezerano u Rwanda rwari rwaragiranye na Arsenal arongerwa
Pariki y'Ibirunga iza ku isonga mu zinjiriza u Rwanda akayabo
Ikiraro kiri hejuru ya Nyungwe nacyo gisurwa na benshi
Inkura nazo ni imwe mu nyamaswa eshanu z'inkazi zituma abantu bava i bwotamasimbi bakajya kuzisura mu Rwanda
Intare zari zisigaye ari nke mu Parike y'Akagera zarongerewe ubu ni zimwe mu zikurura ba mukerarugendo
Kubungabunga ingagi zo mu birunga biri mu byazamuye ubukungu bw'u Rwanda
Isuku ni kimwe mu byamenyekanishije u Rwanda mu mahanga
Mbere ya COVID-19 u Rwanda rwari ku isonga muri Afurika mu kwakira inama mpuzamahanga zikomeye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza