IGIHE

Ubuzima bw’ukutagoheka n’urupfu bya Kizito Mihigo na HRW mu Rwanda

2 21-08-2020 - saa 20:17, Gatete Nyiringabo Ruhumuliza

Ku wa 17 Kanama 2020, Human Rights Watch (HRW) yahagaritse uguceceka yari imaranye iminsi ku bireba u Rwanda, maze isohora itangazo: ‘U Rwanda: Amezi 6 arashize, Nta butabera burahabwa Kizito Mihigo.”

Mu nkuru yanjye itaha mu rukurikirane rw’izigaruka ku guhakana Jenoside yakorewe Abatutsi, nzagaruka ku bintu bikomeye byateye HRW guceceka ku Rwanda. Muri aka kanya, ndashaka kugaruka ku itangazo riheruka.

Muri iryo tangazo bavuga ko: “Ku wa 26 Gashyantare 2020, Ubushinjacyaha Bukuru bw’u Rwanda bwanzuye ko urupfu rwa Mihigo ‘rwatewe no kwiyahura yimanitse’ kandi ko isuzuma rya muganga ryemeje ko icyateye urwo rupfu ari ukubura umwuka, gushobora guterwa no kuba yariyahuye yimanitse.".’”

Nyamara batesha agaciro iri suzuma ryakozwe mu buryo bw’amategeko hamwe n’abaganga, ikavuga ko “ari ngombwa gukora iperereza rifatika, ryigenga, ku bufatanye n’inzobere z’abanyamahanga (bivuze bo ubwabo) zirimo Intumwa yihariye y’Umuryango w’Abibumbye ku bikorwa binyuranye n’amategeko cyangwa iby’ubwicanyi.’

Nk’uko yakunze kubigenza, HRW ivuga izina rya buri muyobozi mukuru ku ruhare mu rupfu rwa Mihigo: Perezida, Umuyobozi w’Inteko Ishinga Amategeko, Minisitiri, Umukuru wa Polisi, Umuyobozi w’Ibiro bya Perezida, n’abandi, nk’aho Guverinoma yose yahagaritse ibyo yakoraga byose ngo igambanire Kizito.

Mudge yagize ati “Kizito Mihigo yashinje ibintu bikomeye by’iyicarubozo n’ihonyorwa ry’uburenganzira bwa muntu, abayobozi muri guverinoma bari mu myanya ikomeye.”

Uwo Mudge ni muntu ki, kandi ni gute ijambo rye rihabwa agaciro kurusha iry’urwego rw’ubucamanza?

Igitangaje, bavuga ko bandikiye Minisitiri w’Ubutabera ku wa 10 Kanama basaba amakuru ku iperereza ryakozwe ku rupfu rwa Kizito Mihigo waguye muri kasho, ariko nta gisubizo babonye. Nyine barirengagijwe. Guverinoma y’u Rwanda ntabwo ibaha agaciro, ariko njye ngiye kubasubiza kubera ko ndi umuturage usanzwe.

Ni nko kuvuga ko Nyiramwiza uhagarariye umuryango w’urubyiruko utari uwa leta urengera uburenganzira bw’imfungwa ukorera i Kigali (ni izina ryahimbwe), watangaje ko ibyo Umushinjacyaha Mukuru wa Leta Zunze Ubumwe za Amerika yavuze ku rupfu rwa Jeffrey Epstein waguye muri kasho atari ukuri, bityo uyu muryango w’urubyiruko urasaba iperereza ryigenga rigizwemo uruhare n’inzobere mpuzamahanga.

Ni ibintu bitangaje, Mihigo ntiyari umuntu wari ku rwego Mudge n’abandi bahakana Jenoside bamushyiragaho, kandi niba ari uko bamugize mu buzima bwe bwose, nibo babaye imbarutso yo kwishyira hejuru no kwiyahura.

Icyatumye bakunda Mihigo ni uko bari basangiye ubutumwa: bwo kwirengagiza ibyo David Brooks yita ikintu kitagaragara ariko kigenga sosiyete.

Kimwe n’abandi bantu banyuze mu mateka ashaririye, Abanyarwanda bagira kirazira: Nta we ushobora guhakana Jenoside, ntawe ushobora kuyigereranya n’urupfu rusanzwe kandi kubungabunga ubumwe bw’Abanyarwanda ni intego y’ingenzi.

Ahandi mu itangazo, HRW yemera ko Kizito yemeye ibyaha byose yaregwaga, ariko aho kugaruka ku byaha yemeye, ishyiraho inzira iganisha ku nyandiko y’ibyaha bishinjwa Guverinoma y’u Rwanda.

Muri aya mashusho, Mihigo arimo kuganira n’itangazamakuru, ubwo yari amaze gutabwa muri yombi, aho yemera ibyaha byose yaregwaga birimo kugambirira kugirira nabi umukuru w’igihugu.

Yaje kuburanishwa, acibwa urubanza, arafungwa. Muri aya mashusho, arimo gushimira perezida nyuma yo kumufungura, ku mbabazi yahawe mbere yo kurangiza igihano yakatiwe.

Muri aya mashusho kandi: umuturage wo hafi y’umupaka arabwira Ijwi rya Amerika uburyo bamenye ndetse bagata muri yombi Mihigo ubwo yashakaga gutoroka anyuze mu Burundi, ngo ajye kwifatanya n’imitwe yitwaje intwaro.

Muri ayo mashusho yose uko ari atatu, Mihigo aravugana ya kamere ye yo kwigirira icyizere, nta kimenyetso agaragaza cy’igihunga. Ku nshuro zose yafashwe, Mihigo yemeye ibyaha bye akizeza ko agiye guhinduka. Naje kuganira n’abarokotse Jenoside mbabaza impamvu batamwegera ngo bamugire inama ngo abe umuturage wubahiriza amategeko.

Bambwiye ko atakibikoza. Banyeretse inkuru ebyiri: Imwe ni iya Ambasaderi Wellars Gasamagera, agira inama umuntu yafataga nk’umwana watannye, ateguza ko ashobora kuzagira iherezo ribi mu buzima bwe. Iyo nkuru yanditswe mu 2014, mbere y’imyaka itandatu ku iherezo ribi rye.

Ubwo Mihigo yari avuye kwiga mu Burayi, yakiriwe n’abapadiri muri Kiliziya Gatolika. Ntekereza ko ariho ukuvangirwa mu ngengabitekerezo kwakuriye. Ubwo yatabwaga muri yombi ku nshuro ya mbere, Mihigo yemereye imbere ya za camera ko yayobejwe n’ubuhanuzi bwa Magayane”, umuntu umaze igihe apfuye, wahanuye amahano ku Rwanda. Yagize ati “Igisubizo cyonyine banyumvishaga cyari ukwica perezida,”

Mperuka kuzenguruka igihugu mu bushakashatsi ku bwiyunge, nza kubwirwa n’abarokotse Jenoside ko abapadiri bajya bababwira ngo ‘nutababaria, ntaho uzaba utaniye n’abantu bishe umuryango wawe,’ ngira ubwoba kubera ko kubabarira ari amahitamo y’umuntu, bidakorwa mu kumvisha umuntu wahemukiwe ko yicira urubanza, cyangwa igitutu cya ya kiliziya abayobozi bayo bagize uruhare mu gutegura no gushyira mu bikorwa jenoside. Ariko ni uko ibintu bimeze…

Birashoboka ko inkuru igaragaza neza uwo Mihigo yari we yanditswe n’umwanditsi ubizobereyemo, Yolanda Mukagasana, ku ihinduka rya Mihigo ryamugejeje ku kuyobywa n’abajenosideri n’abambari babo.

Hari aho yavuze ati “ntabwo nakwibagirwa ko rimwe na rimwe hari ubwo nakubitaga ku meza kugira ngo muhindure intekerezo kubera ko yari yatangiye kuririmba mu bikorwa bitandukanye birimo ibyo kwibuka biba ku wa 6 Mata, bitegurwa n’abahakana Jenoside bagamije kubiba urujijo ku bikorwa byo Kwibuka Jenoside yakorewe Abatutsi biba ku wa 7 Mata.”

Igitangaje, mu gihe Mihigo yaririmbaga mu bikorwa by’abahakana Jenoside, yanze kuririmba mu bikorwa by’abarokotse Jenoside kubera ko batashoboraga kumwishyura.

Ibyo byashavuzaga abarokotse Jenoside, ndetse Mukagasana akomeza ati “Kizito, wajombye icyuma mu nkovu z’abarokotse Jenoside nka njye bagukundaga, bakwizeraga. Hejuru ya byose, wahindanyije urupfu rwa So ndetse ugambanira ukwibuka Jenoside yakorewe Abatutsi.”

Asoza ati “Ntabwo nguciriye urubanza. Reba uburyo urupfu rwawe rurimo kuririrwaho n’abanzi b’ubutaka bwakwibarutse. Nta kintu gisenya kurusha kutigera na rimwe unyurwa n’uwo uri we n’ibyo ufite.”

Kandi koko urupfu rwa Mihigo rukomeje gukoreshwa ukundi n’abagize uruhare muri Jenoside kimwe n’abayihakana: Mu ibaruwa yo ku wa 21 Gashyantare 2020, abantu bavuga ko barokotse Jenoside baba muri diaspora, banditse basaba “iperereza mpuzamahanga rihuriweho ku rupfu rwa Kizito Mihigo.”

Ikibazo ni uko benshi mu basinye ubwo busabe ari abantu bazwi bagize uruhare muri Jenoside bategereje koherezwa aho bakoreye ibyaha ngo babiryozwe ndetse abana babo bakoze ishyirahamwe ry’abahakana Jenoside mu Burayi.

Ubwo Kizito yarekurwaga, namuhaye inama ku buntu, hamwe na mugenzi we bari bafunganywe, Ingabire Victoire, mbashishikariza kurushaho kubahiriza amategeko, ariko mfite impungenge ko bahisemo gutega amatwi abarimo HRW n’abahakana Jenoside.

Babonye ibyo bashakaga, nkeka ko Kizito ashobora kuba abafitiye akamaro mu rupfu rwe kurusha uko byari bimeze akiri muzima. Ni ikimwaro gikomeye.

Kwamamaza
Kwamamaza
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza