IGIHE

Ba nenge itirora: Icyemezo cy’u Bwongereza cyo gukumira abava mu Rwanda giteye kwibaza

0 29-01-2021 - saa 19:12, Musangwa Arthur

Umunyarwanda yaciye umugani ati ‘Banegurana ari inege ba nenge itirora’. Ku mugoroba wo kuri uyu wa Kane, Abanyarwanda batunguwe n’umwanzuro waturutse i Londres, uvuga ko abaturage baturutse mu Rwanda, u Burundi na Leta Zunze Ubumwe z’Abarabu batemerewe kwinjira mu bihugu biri mu bwami bw’u Bwongereza.

Imvano y’iki cyemezo cy’u Bwongereza ngo ni uburyo bwo guhagarika ikwirakwira ry’ubwoko bushya bwa Coronavirus bwabonetse muri Afurika y’Epfo.

Igitangaje si uko hafashwe uwo mwanzuro, igitangaje ni uwawufashe n’abo yawufatiye. U Bwongereza ni cyo gihugu cyo ku Mugabane w’u Burayi kimaze gupfusha abantu benshi kuko hashize iminsi mike barenze ibihumbi 100.

Ibitaro byo muri iki gihugu byuzuye abarwayi, barimo benshi b’indembe ku buryo byageze aho abaganga biyuha akuya babuze abo bafasha n’abo bareka. Kugeza ku wa Kane ubwo uyu mwanzuro watangazwaga, abari bari mu bitaro barengaga ibihumbi 37.

Ejo bundi Minisitiri w’Intebe w’u Bwongereza, Boris Johnson, yasabye imbabazi ku buryo iki gihugu kiri mu bya mbere bikize ku Isi cyitwaye nabi mu kurwanya COVID-19, kugeza ubwo mu gihe kitageze ku mwaka, gitakaza abantu ibihumbi ijana bazize iki cyorezo. Iyi mibare ishobora kwiyongera bidasanzwe kuko COVID-19 yakajije umurego.

Iki gihugu kimaze iminsi gitanga inkingo ariko byabaye nko kwandika mu mazi kuko umubare w’abandura ntugabanyuka, dore ko umaze kugera kuri miliyoni 3,7 ndetse hashize iminsi hapfa abasaga igihumbi ku munsi.

U Bwongereza bwa Johnson ni cyo gihugu cya mbere cyabonetsemo ubwoko bushya bwa COVID-19, bukekwaho kuba bwandura vuba, bukanica cyane ugereranyije n’ubusanzwe.

Guhera mu Ukuboza 2020, ubwo ubwoko bushya bwa COVID-19 bwavumburwaga mu Bwongereza, ibihugu byinshi birimo n’iby’i Burayi byafunze ingendo zerekeza muri icyo gihugu.

Ibiri amambu, Abanyarwanda bari bamaze iminsi bijujutira Guverinoma kuba idafunga ingendo z’indege ziva muri icyo gihugu, kiri gukongeza ibindi ku bwandu bushya bwa COVID-19.

Kuba iki gihugu cyashegeshwe bikomeye na COVID-19 cyakwifata kigakumira abagenzi bava mu Rwanda bakiganamo, biteye kwibaza mu gihe u Rwanda rwo rubarizwa mu bihugu bya mbere ku Isi mu guhashya COVID-19 uko bikwiye.

Izo mbaraga si ukwitera amajeki kuko n’abandi barugendamo barabibona, ni nayo mpamvu itangazo ry’u Bwongereza rihagarika ingendo ziva mu Rwanda, ryabisikanye n’iry’Umuryango w’Ubumwe bw’u Burayi (EU) ugizwe n’ibihugu bituranye n’u Bwongereza, rikomorera abagenzi bava mu Rwanda kuba batembera mu bihugu biwugize.

EU ishyira cyangwa igakura igihugu ku rutonde rw’ibifite abaturage bemerewe gutembera muri uwo muryango, nyuma y’inyigo yimbitse ishingiye ku mibare na siyansi. Ibigenderwaho harimo uko icyorezo gihagaze muri ibyo bihugu, ingamba zihari zo kukirwanya n’ibindi.

Imbaraga z’u Rwanda kandi zabonywe n’Ikigo Lowy Institute cyo muri Australia, mu bushakashatsi giherutse gukora bwarushyize ku mwanya wa Gatandatu ku Isi n’amanota 80.8 mu guhangana n’icyorezo cya COVID-19, ruba igihugu kimwe rukumbi cya Afurika kije mu bihugu 10 bya mbere ku Isi.

Mu gihe u Bwongereza bumaze amezi buhanganye n’ubwoko bushya bwa COVID-19 bwandura kubi, mu Rwanda ho ntibiradogera nubwo ingendo ziva mu Bwongereza zitahagaze.

Biratangaje uburyo hejuru y’ibyo u Bwongereza aribwo bwihandagaza bugafungira igihugu nk’u Rwanda, ngo kuko icyorezo gica ibintu! Ahubwo u Rwanda nirwo rwari rukwiye gukumira abava mu Bwongereza, ni cyo gihugu cyari gikwiye kwitonderwa n’ibindi ku Isi kuko ari nacyo cyavuyemo ubwoko bushya bwa COVID-19.

Mu gihe u Bwongereza bukumira Abanyarwanda muri icyo gihugu kubera Covid-19, indembe z'iyo ndwara zikomeje kwiyongera mu bitaro by'iwabo

Itangazo ry’u Bwongereza rikigera hanze, bamwe baguye mu kantu batangira kwibaza niba nta kindi kiryihishe inyuma aho kuba icyorezo koko.

Uwitwa Mauro de Lorenzo abinyujije kuri Twitter yagize ati “Tuvugishe ukuri, nubwo iki cyemezo cyafashwe, u Rwanda rwashyize imbaraga mu guhangana na COVID-19. Cyafashwe umunsi EU yashyiraga u Rwanda mu bihugu abaturage babyo bemerewe kwinjira muri uwo muryango. U Rwanda ntabwo ruri muri Afurika y’Amajyepfo. Nta bwoko bushya bwa COVID-19 burahagaragara. Nta kibazo u Rwanda ruteye u Bwongereza. Rwose ibi ntabwo bishingiye kuri siyansi.”

Yakomeje agira ati “Guverinoma y’u Bwongereza iri gufata COVID-19 ikayigira igikoresho cya politiki, ibintu bizangiza umuhate yari ifite wo gufata ibyemezo bishingiye kuri siyansi. Nta bwoko bushya bwa COVID-19 buragaragara mu Rwanda, bitandukanye no mu Bwongereza. Ni itangazo ririmo kudashyira mu gaciro.”

Umuyobozi w’Umuryango, African Entrepreneur Collective, ukorana na ba rwiyemezamirimo b’imbere mu bihugu hagamijwe guteza imbere ibyo bakora no guhanga imirimo, Julienne Oyler yavuze uburyo bifuzaga gukorera umwiherero i Londres, nyamara kubera icyorezo bagatangira gutekereza mu Rwanda.

Yagize ati “Navuganye na Perezida w’Inama y’Ubutegetsi muri iki gitondo, ku mwiherero wacu utaha w’abagize inama y’ubutegetsi. Yasoje agira ati “ukurikije urujijo rugihari ndetse no kugira ngo twizere ko buri wese atekanye nkuko biri mu ntego zacu z’ibanze, byaba byiza umwiherero tuwimuriye i Kigali aho kuba i Londres.”

Alex Morton we yibajije uburyo Umunyarwanda yahitamo kujya mu Bwongereza n’ibihe rurimo, ashaka kumvikanisha ko aribwo butorohewe na mba aho kuba u Rwanda.

Ati “Mu Rwanda abantu bamaze gupfa ni 186, rwafunze imipaka muri Werurwe, mu Bwongereza abasaga ibihumbi 100 bamaze gupfa, abantu 1000 bapfa ku munsi. Ese ubundi kuki umuntu yahitamo kuva mu Rwanda ajya mu Bwongereza kuri ubu? Ahubwo bukwiriye gusaba u Rwanda inama uko bwahangana na COVID-19.”

Henriette Umuganwa nawe ari mu babona uyu mwanzuro u Bwongereza bwafashe ufite ikindi uhatse.

Yagize ati “Uyu mwanzuro usa nk’ushingiye kuri politiki kuko nta bwoko bushya bwa Covid-19 buraboneka mu Rwanda. Wenda tureke iby’ingamba zikomeye mu guhangana na Covid-19, iyo koko biba ari uguhangana n’ibyago byo kwandura ubwoko bushya bwa Covid, u Rwanda nirwo rwakabaye rukumira abagenzi bavuye mu Bwongereza.”

Nshimyimana Emmanuel we yagize ati “Hari ikindi cyibyihishe inyuma. Ubwoko bushya bwa Covid-19 muvuga mu Rwanda ni ubuhe? Abahagarariye u Bwongereza mu Rwanda bakabaye aba mbere mu gusobanurira abandi uko u Rwanda ruri guhangana n’ikwirakwira rya Coronavirus. Hakenewe ibisobanuro kuri uyu mwanzuro udasobanutse.”

Hejuru y’ibihe u Bwongereza burimo ku bijyanye n’icyorezo cya Coronavirus, umuntu yakwibaza niba koko aribwo bwari bukwiriye kubuza Abanyarwanda kubwinjiramo, cyangwa se ni wa mugani wa ‘Banegurana ari inege ba nenge itirora’.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza