IGIHE

Nyuma y’u Bwongereza, abatekamutwe b’Abanyarwanda badukiriye na Australia

0 10-06-2021 - saa 12:31, Albert Rudatsimburwa

Hashize igihe René Mugenzi yigaragaza nk’utavuga rumwe na Guverinoma y’u Rwanda kugeza n’ubwo yigeze kuvuga ko ubuzima bwe buri mu kaga. Polisi y’i Londres yatekewe umutwe ibyinjiramo, Mugenzi abyina intsinzi.

Icyakora intsinzi ntiyamaze akanya, agakino ke Polisi yaje kukavumbura. Yaje gutabwa muri yombi ku butekamutwe yakoreye Abongereza abacucura amafaranga yari ashinzwe kubika muri Paruwasi.

Yari amaze imyaka igera ku icumi abiba rwihishwa nyamara akigaragaza nk’umuturage w’intangarugero. Umucamanza Katharine Moore na we yaje kwanzura ko ubwoba Mugenzi yavugaga ko aterwa na Guverinoma y’u Rwanda nta buhari, ko ari ibinyoma bisa bidafite ishingiro. Byagaragaye ko yari amayeri kugira ngo yigarurire icyizere cy’abaturage b’u Bwongereza, ngo abone uko abacacura.

Kuri ubu noneho, undi munyarwanda uba muri Australia yinjiye mu gakino nk’aka Mugenzi. Tariki 9 Kamena, ikinyamakuru The Sydney Morning Herald cyatangaje inkuru ifite umutwe ugira uti “Australian citizen asks for UN’s help to locate missing brothers in Rwanda” (Umuturage wa Australia arasaba ubufasha bwa Loni ngo abashe kubona abavandimwe be baburiwe irengero mu Rwanda”.

Uyu mugabo Noel Zihabamwe avuga ko ubuyobozi bw’u Rwanda na Ambasade yabwo muri icyo gihugu byamugezeho bishaka “kumwiyegereza ngo ababere umukangurambaga muri Australia”. Ngo yarabyanze, maze “abavandimwe be baburirwa irengero nyuma y’ukwezi atangaje inkuru ye muri ABC muri Kanama 2019.”

Nta n’umwe wakwemera ibyo binyoma ko Guverinoma y’u Rwanda ishobora gushimuta abaturage bayo kuko gusa ngo banze kuba abakangurambaga. Wibuke ko ari igihugu aho abana b’umuyobozi wa FDLR bahawe buruse zo kwiga muri Kaminuza nziza mu Rwanda no mu mahanga.

Igitangaje kurushaho, Zihabamwe yanumvishije Polisi ya Australia ko ubuzima bwe buri mu kaga. Ikigaragara, René Mugenzi ari muri gereza mu Bwongereza ariko hari undi Mugenzi uri mu ishusho ye muri Australia yiyise Noel Zihabamwe.

Nkuko Mugenzi yabigenje agamije guhishira ubuhakanyi bwe bwa Jenoside, Zihabamwe na we afite icyo ahishe.

Uyu Zihabamwe ni umunyamuryango w’imandwa za RNC, Ihuriro ryiyise Alliance for National Pact (RANP-Abaryankuna) ryashinzwe na Cassien Ntamuhanga nyuma yo gutoroka gereza mu Rwanda akanyura muri Uganda kugeza ubwo yageraga muri Afurika y’Epfo. Ni aho bahereye bashakisha abanyamuryango cyane cyane mu Burayi na Australia.

Ni ibintu bizwi ko Abaryankuna bakomeje gushakisha abanyamuryango bifashishije uburyo Ntamuhanga yakoresheje anyura i Kampala. Aho niho bamara igihe bategereje kubona impapuro z’inzira zibageza muri Afurika y’Epfo, u Burayi na Australia.

Ubuyobozi bw’u Rwanda bufite amakuru ko hari amagana y’Abaryankuna binjijwe muri uyu mutwe ubu bari i Kampala bategereje kujyanwa mu bice bitandukanye by’Isi.

Kuba Zihabamwe yaragiye muri The Sydney Morning Herald ni byiza kuko ubu noneho Leta y’u Rwanda izi ko bishoboka cyane kuba yaba yarinjije abavandimwe be muri uwo mutwe w’iterabwoba, akaba azi aho baherereye. Ahubwo mu magambo yoroshye, ari kugaragaza ibyaha byabo.

Ni ukuri kwigaragaza ko ahubwo atari umuvandimwe wabo gusa ushingiye ku nshingano afite mu Baryankuna aho ari umuhuzabikorwa, umukangurambaga n’umuterankunga w’uyu mutwe w’iterabwoba ugamije kuzana akavuyo mu Rwanda nk’uko icengezamatwara banyuza ku mbuga nkoranyambaga cyane cyane YouTube ribigaragaza.

Zihabamwe avuga ko ubuzima bwe buri mu kaga kuko yamaze kubona abandi bagerageje guhungabanya umutekano w’u Rwanda bakisanga i Kigali mu butabera. Arabizi ko amahitamo ari abiri, kureka iterabwoba cyangwa se akazisanga imbere y’inkiko haba muri Australia cyangwa i Kigali.

Mugenzi arimo yigana, aho ari ubu harazwi, ni muri gereza mu Bwongereza. Abanya-Australia bakwiriye kumenya neza aba batekamutwe.

Inkuru bijyanye: Uko Noel Zibahamwe yabeshye kugeza ubwo ibinyoma bye binyujijwe mu kinyamakuru cya Leta ya Australia

Zihabamwe ni umwe mu bahuzabikorwa b'Abaryankuna, umutwe wiyemeje guhungabanya umutekano w'u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza