IGIHE

Kuki abantu nka Roger Boyes bafata abanyafurika nk’injiji?

0 18-09-2020 - saa 08:03, Albert Rudatsimburwa

Hari ihame ryakoreshwaga mu gisirikare cya kera cy’Abashinwa, rivuga ko “iyo uzi umwanzi wawe ukaba nawe wiyizi, nta mpamvu yo gutinya niyo haba imirwano amagana”. Mu buryo budashidikanywaho, u Rwanda ruzi aho imbaraga zarwo ziri, ahari intege nke, rukamenya n’abanzi barwo.

Ikibazo, nuko abarurwanya bo bataruzi. Ubu bujiji nibwo bushyira hanze abitwa ko barunenga. Ubu bujiji ariko nanone, ntabwo bukwiriye kwitirabywa n’ubugoryi.

Ubujiji burya bwakosorwa umuntu ahabwa amakuru ya nyayo no gukuraho imipaka yishyizemo mu mitekerereze, nk’ibijyanye n’ivangura rishingiye ku ruhu n’ibindi. Ubugoryi bwo rero, nta muti bugira.

None se, hagati y’ibyo byombi, ni ikihe kigaragaza abihaye kuvuganira ‘intwari’ yataye ibaba Paul Rusesabagina, nyuma yo gutabwa muri yombi?

Ndaza gutanga ingero ebyiri nkoresheje ibinyamakuru bibiri byo mu Bwongereza. Mu Kinyamakuru The Times baranditse bati “Barashaka kumucecekesha, ese ubundi yageze mu butabera ate? Abantu bakomeye nka Kagame baba bashaka kutugira injiji.”

Nyuma y’ibirego bidafite ishingiro bishinja u Rwanda guhonyora uburenganzira bwa muntu, kuremekanya impamvu zose ngo Rusesabagina yaba yaratawe muri yombi, nta wakongera gushidikanya ko ubutabera bw’u Rwanda butamurenganyije.

The Guardian, yo ntabwo ari n’ubwa mbere, yongeye gutangaza ibintu bidafite aho bishingiye, ikwirakwiza ko Rusesabagina ari inzirakarengane yatewe ubwoba, igatotezwa.

Aya mahano yakozwe na The Guardian yari arenze urugero kugeza ubwo umudepite mu Nteko y’u Bwongereza, Andrew Mitchell yinjiye muri icyo kiganiro agamije kugaragaza ukuri.

Mitchell yerekanye uburumirahabiri bwa The Guardian, agaragaza impamvu Rusesabagina yatawe muri yombi ndetse n’impamvu ibyo akurikiranyweho iyo biba mu Bwongereza byari kwitwa Iterabwoba.

Yasabye kandi icyo kinyamakuru gushyira imbaraga mu guhamagarira ko hatabwa muri yombi n’abandi bantu batanu bakekwaho Jenoside bidegembya mu Bwongereza nubwo Leta y’u Rwanda yagiye isaba kenshi ko bagezwa imbere y’ubutabera, ntibikorwe.

Mu gitekerezo yanyujije muri The Times, Roger Boyes yavuze ko kuba Kagame yarahagaritse Jenoside, abigira intwaro yo gucecekesha abanyaburayi kubera ipfunwe ry’uko ntacyo bakoze.

Reka tuvuge ko iryo pfunwe bishinja rihari, ahubwo se ntibyakabaye uburyo bwiza bwo kugeza mu butabera abakekwaho Jenoside baba mu Bwongereza? None se niyo mpamvu bakomeje kwidegembya ntawe ubakoraho nyuma yo kwica abasaga miliyoni?

Ikindi kandi, kwemeza ko hari uruhare abanyaburayi bafite, kandi ko bigaragarira mu nkunga baha u Rwanda nk’abigura nkuko Boyes abivuga, ese uko kwica icyiru gitangwa habanje kuvugwa ko abantu nka Rusesabagina bafasha imitwe yitwaje intwaro, bo bazabihorera bagakomeza kwica abanyarwanda uko bishakiye?

Kuki se iryo pfunwe ritakabaye intandaro yo gukora ibishoboka byose ngo hatazongera kugira abanyarwanda bicwa ntibahabwe ubutabera, kandi abagize uruhare mu rupfu rwabo ntibahabwe ubuhungiro ku butaka bw’abo bafite ipfunwe ry’ibyo bakoze? Ibyo by’ipfunwe ry’abanyaburayi ntabyo, si ukuri.

Abarebereye ubwo abanyarwanda bicwaga, ntacyo kwishinja bafite ndetse byongeye bigaragara ko bakongera kurebera. Ikibigaragaza cyane nuko bakomeje guhishira abagize uruhare muri Jenoside n’abayobozi b’imitwe yitwaje intwaro.

Gutanga inkunga si ipfunwe, ni uburyo bw’ububanyi n’amahanga. Niba inkunga yaragiye itangwa igamije kuzamura imibereho y’abayihawe, ibyo yagombaga gukora yarabikoze hashingiwe ku iterambere ry’ubukungu n’imibereho myiza nkuko na Boyes abyivugira akanemeza ko Guverinoma y’u Rwanda yabigezeho.

Icyakora, gutesha agaciro amahitamo y’u Rwanda n’inshingano zarwo mu kurinda umutekano w’abaturage barwo, uyu munyamakuru Boyes ari kugerageza kwerekana ko inkunga ari igikoresho cya politiki kigamije kugenzura uyihawe. Biratangaje kuko bigaragara ko n’ibibazo bya politiki bibera iruhande rwe atabizi.

Ntihagire ushukwa na Boyes cyangwa se abaterankunga kuko nta yandi mabwiriza azana n’inkunga ari hejuru yo gukoreshwa icyo yatangiwe.

Ku rundi ruhande ahubwo, Boyes arishuka kumva ko gutanga inkunga bimuha ububasha bwo gutegeka icyo ashaka ku mahitamo y’u Rwanda keretse wenda niyemeza ko inkunga itanga uburenganzira ku baterankunga, abanyamakuru, imiryango itegamiye kuri Leta n’abandi, bwo kwivanga muri politiki z’ibindi bihugu.

Ikibabaje nuko imyumvire ya Boyes ayisangiye n’abandi. Ibi bigaragarira mu nyandiko yasohotse muri The Guardian aho bagira bati “nihagira urubanza ruba, bizaba ari igerageza kuri Guverinoma y’u Rwanda kuko bisaba abashinjacyaha kugaragariza umuryango mpuzamahanga ibimenyetso simusiga, nyamara ntibazabasha kugaragaza byinshi ku buryo inzego z’umutekano zakoresheje.”

None se aha, umuryango mpuzamahanga ni nde ku buryo inkiko z’u Rwanda zimugezaho ibimenyetso? Ukekwa hano ni Guverinoma y’u Rwanda cyangwa ni Rusesabagina?

Ese Boyes n’abandi nka we, babona ko abanyafurika ari injiji?

Roger Boyes ni umwe mu banyaburayi bumva ko inkunga iwabo batanga zikwiriye gutuma bategeka ibihugu bya Afurika uko byitwara
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza