IGIHE

Afurika imeze nk’indogobe itwawe n’u Bushinwa- Ikiganiro n’intyoza mu kuvuga PLO Lumumba

10 20-05-2019 - saa 11:12, Ferdinand Maniraguha

Kuri benshi izina Prof. Patrick Loch Otieno Lumumba si rishya mu matwi, n’iyo ryaba rishya si ko biri ku mbwirwaruhame ze zuzuyemo ibisa n’ubuhanuzi ku mpamvu Afurika imeze uko imeze ubu n’igituma ikomeje kumera uko nyine!

Ni umugabo muto ariko utarya iminwa iyo bigeze ku mvano y’ubukene bwazahaje umugabane witirirwa kuba inkomoko ya muntu, uzwiho kugira ubukungu bwinshi, amakimbirane n’intambara zidashira.

Umunyakenya PLO Lumumba ni Umuyobozi w’ishuri ry’amategeko muri Kenya, yigeze no kuyobora Komisiyo ishinzwe kurwanya ruswa muri icyo gihugu.

Mu Cyumweru gishize yagiranye ikiganiro kirambuye n’Umunyamakuru wa IGIHE, Maniraguha Ferdinand ubwo yari yitabiriye isozwa ry’inama yiga ku mutekano mu ishuri rikuru rya gisirikare riherereye i Nyakinama mu Karere ka Musanze.

IGIHE: Ni iki kigituma Afurika igaragara nk’iyasigajwe inyuma muri byinshi?

Lumumba: Afurika yagiye isigazwa inyuma n’ibintu byinshi ariko icya mbere muri byose ni imiyoborere. Mu bihugu byinshi bya Afurika hari abagore n’abagabo bagiye bahabwa amahirwe yo kuyobora ariko ntabwo bagiye bakoresha ayo mahirwe mu gushakira abaturage ibyiza. Kubera iyo mpamvu ibibazo abaturage bashaka ko bikemurwa ntibikemuka.

Nkeka ko Umunya-Nigeria Chinua Achebe mu gitabo cye ‘The Trouble with Nigeria” yavuze ko ikibazo Afurika ifite ari imiyoborere. Hari undi wigeze kuvuga ko impamvu Afurika ikennye ari ukubera ubushobozi buke bw’abayiyobora.

Gukena ni amahitamo, abayobora Afurika bahisemo inzira yo gukenesha abaturage babo ariko abaturage babatora nabo bafite ikibazo. Usanga dutora abantu kuko duturuka mu bwoko bumwe cyangwa baduhaye ruswa.

IGIHE: None hakorwa iki?

Lumumba: Tugomba gukanguka. Twarabibonye ko abaturage mu Barabu bakangutse. Batangiriye gukanguka muri Tunisia no mu Misiri. Muherutse kubibona muri Algeria n’i Khartoum muri Sudani. Amateka yagiye abigaragaza ko demokarasi izanwa n’abaturage. Iyo abaturage bazi icyo bashaka nibyo bashaka ku babayobora, ababayobora na bo bamenya ko bari ku butegetsi ku nyungu z’abaturage.

IGIHE: Muri iyi minsi hari umubano ukomeye wa Afurika n’u Bushinwa, bamwe bavuga ko bisa nk’ubundi bukoloni bw’ubundi bwoko, wowe ubibona ute?

Lumumba: Nta kosa mbona ku Bashinwa. Bamaze kumenya icyo bashaka, bamaze kumenya ko Afurika ari umugabane ukize ku butunzi karemano, baraje rero, bari gukora ibiri mu nyungu z’Abashinwa. N’igihe natwe ngo tumenye icyo dushaka.

Umubano uri hagati ya Afurika n’u Bushinwa ni nk’umubano uba hagati indogobe n’uyitwaye. Umutwazi ni u Bushinwa, indogobe ni Afurika. Umubano nukomeza gutyo Afurika izakomeza kubihomberamo.

Icyakora biranshimisha iyo mbona Afurika yiha icyerecyezo 2063, bakavuga bati ubu tugiye gushyiraho isoko rusange. Nidukomeza muri icyo cyerekezo tugatangira guhahirana tuzamenya ko ibyo dukeneye ari twe birimo.

Tugomba guteza imbere inganda. Ntabwo Afurika izahora yohereza imineke, yohereza ubutare budatunganyije, tugomba kubyongerera agaciro. Niba twarasigaye inyuma mu mpinduramatwara y’inganda, ntabwo dukwiye no gusigara inyuma mu mpinduramatwara ya kane y’ikoranabuhanga.

IGIHE: Hashize iminsi tubona urubyiruko rwa Afurika rurohama mu Nyanja rujya i Burayi, byo ubona biterwa n’iki?

Lumumba: Impamvu urubyiruko rwacu rwishyira mu byago rukajya i Burayi, ni uko nta mahirwe ari mu bihugu byabo. Nta cyizere bahabonera. Bareba aho bari, bakibaza icyo bazakora bakakibura. Iyo rero bumvise uko bavuga i Burayi, bumva ko nibahagera ubuzima buzahita buhinduka.

Umunsi tuzashyiraho amahirwe atandukanye muri Afurika, tugashyira ho uburyo butagamije gusa guha urubyiruko akazi ahubwo bubafasha guhanga udushya, nta n’umwe uzifuza kujya mu Burayi.

IGIHE: Muravuga ubuhahirane no gushakira amahirwe urubyiruko ariko duhereye aha muri EAC, ayo mahirwe azitiwe n’amakimbirane ari hagati y’ibihugu, ibi bizashira bite?

Lumumba: Nemera ko amakimbirane udashobora kuyarandura burundu ahubwo ikibazo ni uburyo mukemura ayo makimbirane binyuze mu bwumvikane.

Mu gihe hari ikibazo hagati y’ibihugu muri Afurika y’Iburasirazuba, nakifuje ko tugira urubuga biganirirwamo mu buryo bufitiye inyungu buri gihugu.

Ahubwo mbona n’uburyo twe twishyiriyeho budakoreshwa uko bikwiriye. Aho kuganira hamwe, twahisemo kuganira umwe yibasira undi muri twe kandi ibyo ni bibi cyane. Biroroshye cyane ko ya makimbirane yagera ku rundi rwego mu gihe twaba tutabikemuriye igihe.

Mbona ko inzego zacu zikwiriye kubyinjiramo vuba cyane kuko nkuko mbivuga, iyi mipaka idutanya ni ibintu byahimbwe bishyirwaho, niyo mpamvu usanga abaturage basanzwe batabyitaho. Bariyambukira bakajya kureba abavandimwe. Niwitwaza iyi mipaka yazanywe n’abakoloni ukabuza urujya n’uruza rw’abaturage, ni wowe uzaba uri guteza amakimbirane atoroshye.

Ibihugu rero bigomba gukomeza kuganira kuko umunsi twarekeye aho kuganira ni cya gihe tuzisanga mu ntambara.

PLO Lumumba asanga Afurika ikwiriye kubanza kumenya icyo ishaka, abayiyobora bagahindura imikorere

IGIHE: None by’umwihariko ikibazo cy’u Rwanda na Uganda ubona kizarangira gite?

Lumumba: Amakuru mfite kuri icyo kibazo ntahagije ku buryo natanga igisubizo cyacyo neza ariko ndemeza ko ikibazo cyose cyaba kiri hagati y’u Rwanda na Uganda, gishobora gukemurirwa mu biganiro hagati y’ibihugu byombi cyangwa mu muryango wa Afurika y’Iburasirazuba.

IGIHE: Uburezi abana b’abanyafurika bahabwa ubona buhuye n’ibyo umugabane wifuza kugeraho ejo hazaza?

Lumumba: Hari byinshi bigomba gukorwa mu burezi bwacu. Tugomba gusubiramo ibyo twigisha mu mashuri abanza, ayisumbuye no muri Kaminuza.

Ubu burezi bwa gikoloni dufite ubundi bwari bwarakozwe hashingiwe ku nyungu z’abakoloni, nyuma rero yo kubona ubwigenge twakabaye duhindura uburezi bwacu tukabujyanisha n’icyerekezo dushaka nk’abanyafurika. Ibyo rero bijyana no kwigisha abana bacu ibizatuma tugera aho twifuza haba mu buhinzi, mu bucukuzi n’ibindi.

Hari ibindi bihugu byabigezeho. Nka Koreya y’Epfo bafashe uburezi bw’abanyamerika babuhuza n’umuco wabo bitewe n’icyo bashakaga kugeraho. Abayapani nabo barabikoze, Abashinwa barabikoze […] natwe igihe kirageze ngo dutange uburezi bugamije gukemura ibibazo dufite.

IGIHE: Mu bihugu nka Algeria na Sudani hashize iminsi hakorwa imyigaragambyo yasize abayobozi bavuye ku butegetsi, biratanga irihe somo?

Lumumba: Isomo bikwiriye gutanga ni uko uko waba wibwira ko ukomeye kose, iyo abaturage babihiwe, iyo bamaze kubona ko ari wowe kibazo gituma badatera imbere nta kabuza bazagukuraho. Intwaro zose waba ufite, imbaraga z’abaturage ntushobora kuzitsinda. Ibyo wabibaza Omar Bashir, wabibaza Bouteflika, genda ubaze Mugabe, ubaze Ben Ali muri Tunisia cyangwa Hosni Mubarak bazakubwira.

Iyo abaturage bafashe umwanzuro wo kwimura imisozi, imisozi irimuka nta kabuza.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Pascal 2019-10-30 05:27:49

Kuba Umunyafurika is amahitamo kuko buri wese yisanga ariho yavukiye bikarangira yitwa umunyafurika
Gusa ariko si bibi kuba umunyafurika kuko ni ubwo Abo my burengerazuba n’abo muburasirazuba bwo hagati bifata nkaho aribo nkomoko yabyose byiza kuri iyi si, siko bimeze cyane ko nigihe Jesus yaragiye kwicwa na Herode yahungiye Muri Afurika,so Afurika ni nziza ariko twe abayituye ntidukundana nkuko byakagenze,ubonye ariye ntabwo amenyako hari abandi baburaye Kd ukabona bimumereye neza kuba yariye ariko abo baturanye baburaye.
Gusa icyampa China ikemplementinga system yabo ya Socialism muri Afurika.

2
Pascal 2019-10-30 05:27:47

Kuba Umunyafurika is amahitamo kuko buri wese yisanga ariho yavukiye bikarangira yitwa umunyafurika
Gusa ariko si bibi kuba umunyafurika kuko ni ubwo Abo my burengerazuba n’abo muburasirazuba bwo hagati bifata nkaho aribo nkomoko yabyose byiza kuri iyi si, siko bimeze cyane ko nigihe Jesus yaragiye kwicwa na Herode yahungiye Muri Afurika,so Afurika ni nziza ariko twe abayituye ntidukundana nkuko byakagenze,ubonye ariye ntabwo amenyako hari abandi baburaye Kd ukabona bimumereye neza kuba yariye ariko abo baturanye baburaye.
Gusa icyampa China ikemplementinga system yabo ya Socialism muri Afurika.

3
J paul 2019-05-25 16:13:35

Icyombona nk’abanyafurika,muburezi bwacu nkafurika bakongeyemo isomo, ryigisha gukunda umunyafurik wese,tugakunda umugabane wacu cyane.kuburyo tubyamamaza kumugabane wacu.tukumvako dukwiye kwikemurira ibibazo byacu.

4
Moise 2019-05-23 08:39:47

Bimawuwa na hadjati murabasazi cyangwa nubundi biragoye mugihe abanyafurika ubwabo tudashyigikirana rwose undebere nkabariya bahise bapinga umuntu nkuriya ufite ibitekerezo byiza kuriya

5
Mbabazi 2019-05-22 11:11:09

Wow igihe muri abanyamakuru b’umwuga uyu PLO Lumumba ni umunyafurica wuzuye ukurikiranye speech ye yitwa tragedy of African agace kayo gato kari kuri you tube. RDF mwarakoze kumuzana iwacu.

6
bimawuwa 2019-05-20 20:52:34

Ngo yabaye umuyobozi ushinzwe kurwanya ruswa muri Kenya yarayirwanyije se arayitsinda cg yaramunaniye kuyirangiza ko Kenya iza mubihugu bya mbere bya munzwe na ruswa. naho ibyo avuga kubayobozi baba nyafirika byavuzwe kera na bamubanjirije ntacyo byahinduye iyo nindwara imunzwe muri Africa

7
Hajati 2019-05-20 17:20:01

Umvugiye ibintu 100%.

8
G ram 2019-05-20 15:10:30

Iyaba abaperezida bacu bumvuga ibyo uvuga bakabishyira mu gaciro. Bakareka kurimangatanya abaturage.

9
Philos 2019-05-20 10:27:54

Ndagushimiye wowe Fredinard urakoze cyane uyu mugabo numuhanga kuri politic mpuza mahanga, kdi icyo muziho ntabwo azi kuruma agahuha Kukibazo umubajije kdi ngo akuzimangatanye urakoze

10
Ngango 2019-05-20 06:00:27

Iyo byibura abaperezida benshi ba Afrika bakumva ibyo uvuga mu minota itanu gusa.

Kwamamaza