IGIHE

Imvano y’indirimbo “Ku Musaraba” y’umuhanzi Sam Narabatuwe

0 12-10-2021 - saa 23:38, Ntabareshya Jean de Dieu

Umuhanzi mu ndirimbo zo kuramya no guhimbaza Imana, Narabatuwe Samuel, yashyize hanze indirimbo ye ya gatanu “Ku musaraba” ikangurira abarushye n’abaremerewe kwegera Yesu kuko ari we wabaruhura.

Ku musaraba ni indirimbo ya mbere ya Narabatuwe [watangiye umuziki mu 2019] ikozwe mu buryo bw’amashusho nubwo afite izindi ndirimbo z’amajwi enye.

Narabatuwe yavuze ko iyi ndirimbo yayikoze agamije guhamagarira abantu kongera kwiringira Yesu kuko ari we mugenga wa byose.

Yagize ati “Ubundi ni indirimbo irimo ubutumwa bwo kuramya Imana, tukanayishima ko yadukunze ikatwitangira. Impamvu nayisemo kuyita ‘Ku Musaraba’ ni uko uhageze wese arushye aruhuka, kandi n’ufite imitwaro y’ibyaha agirwa intungane nawo.”

Yakomeje agira ati “Navuga ko kuririmba ari impano nahawe n’Imana ni nayo mpamvu nifuza ko ubutumwa ntambutsa mu ndirimbo bwagera kuri benshi kandi nayo izabimfashamo kuko mbona ko iri kumwe nanjye. Birakwiye ko dukora umurimo kuko dushobora gukiza benshi mu bihe nk’ibi binyuze mu ndirimbo turirimba.”

Yavuze ko mu bihe nk’ibi bikomeye, Isi yahungabanyijwe n’icyorezo cya Covid-19, abakirisitu bakeneye indirimbo zongera kubasubizamo ibyiringiro n’imbaraga zo gukomeza urugendo mu byo kwizera.

Ati “Iyi ndirimbo kugira ngo nyishyire hanze hari haciyemo amezi arindwi nkoze iyindi ariko mu buryo bw’amajwi gusa. Numvise rero ari ngombwa bitewe nuko ari igihe abantu bakeneye guhumurizwa no guhabwa imbaraga binyuze mu bihumuriza birimo n’ubutumwa bwiza bunyuze mu ndirimbo nk’izo zo kubakomeza.”

Narabatuwe Samuel asengera muri ADEPR, Itorero rya Gatenga. Ni umusore ufite ubuhanga mu kuririmba no kwandika indirimbo zaririmbiwe Imana ndetse agakunda gusenga ngo kuko yabitojwe n’ababyeyi be akiri muto.

Yasabye abakunzi b’umuziki by’umwihariko abakunda ibihangano bye gukomeza gushyigikira umurimo wo kuririmba indirimbo zo kuramya no guhimbaza Imana kuko abahanzi baterwa ishema no kubona ibyo bakora byishimiwe.

Narabatuwe Samuel yavuze ko mu gihe cya vuba agiye gushyira hanze indi ndirimbo mu rwego rwo gukomeza gutanga ubutumwa buganisha benshi mu nzira y’agakiza.

-  Reba indirimbo “Ku Musaraba” ya Sam Narabatuwe

Umuramyi Sam Narabatuwe yasohoye amashusho y’indirimbo “Ku Musaraba” ihamagarira abarushye kwegera Yesu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza