IGIHE

Indirimbo eshanu nshya zakwinjiza muri Weekend: Young Grace na Platini bayobotse inganzo iharawe

0 31-07-2020 - saa 22:30, Uwiduhaye Theos

Platini na Rafiki na Young Grace bashyiriye indirimbo hanze icyarimwe n’abandi bahanzi ariko izabo zirimo agakeregeshwa k’ubutumwa bumaze iminsi bwibwazwaho buvuga ku rukundo rwo mu gitanda.

Muri iyi minsi abahanzi hafi ya bose bashidukiye kwandika indirimbo zisigaye zijya hanze zikavugisha benshi kubera ubutumwa buba bwiganjemo buganisha ku rukundo rw’abakuru.

Ni ibintu byafashe indi ntera muri iki gihe ndetse abahanzi benshi basigaye bashinjwa kunebwa no kutazimiza mu bihangano byabo.

Inteko Nyarwanda y’Ururimi n’Umuco (RALC) iherutse kubwira IGIHE ko isaba abahanzi bakomeje kuririmba indirimbo zoreka urubyiruko kwitwararika kuko hari ingaruka mbi bizarugiraho.

Nko mu ndirimbo zagiye hanze uyu munsi IGIHE yabashije gukusanya hari n’ubundi izirimo ubu butumwa bukomeje kuvugisha benshi kubera kutavugwaho rumwe bamwe bati ibyo mwita amagambo y’urukozasoni mu ndirimbo ni ibihe? Abandi bati umuco urakura.

Abayizera Marie Grace wamamaye mu muziki nka Young Grace, kuri uyu wa Gatanu yashyize hanze indirimbo nshya yise ‘Tokeni’. Mu buryo bw’amajwi yakozwe na Evydecks naho amashusho ayoborwa King Phylosophe. Indirimbo yanditswe na Mr Kagame.

Young Grace araririmba ati “Bajyaga bambwira ko utsinda seven, ngaho fata inkoni ndebe… dore inzira muri uwo mwobo sunika cyane yinjire, nanjye ndatuje simfite ubwoba nashakaga yinjire.”

Hari aho abwira umuhungu ati “wumve ko umujinya mfite utawumara. Niyo wankubita bukira. Njye meze nk’ivunja nanga n’ibikwasi. Ngwino dukine uyu mukino twicecekeye, ejo cyangwa ejo bundi nkongere. Ko umbijije icyuya naguhaye ibyanjye byose, ko unciye integer naguhaye ibyanjye byose. Uyu mukino ndi nyina ntibigusaba kumpeka.”

Ukurikiranye neza amagambo arimo uhita wumva ko nawe yinjiye mu murongo w’abahanzi bari kuririmba icyo bamwe bita ‘ibishegu’.

Indi ndirimbo yagiye hanze ni iyitwa ‘Gake’, y’umuhanzikazi France uri mu bakiri kuzamuka.

Yabwiye IGIHE ati “Ni indirimbo irimo ubutumwa bwigisha abantu kugendesha gake urukundo kuko aribwo rugera kure. Nahise mbishyira mu buryo bw’urukundo mbwira umuhungu ko nzamukunda gake gake.”

Gusenga Munyampundu Marie France yinjiranye mu muziki izina rya France , yavukiye mu Karere ka Nyanza mu Ntara y’Amajyepfo.

Yatangiye kuririmba akiri muto afite imyaka hagati y’itanu n’itandatu. Afashwa cyane n’ababyeyi be, ariko atangiye gukura nibwo yagendaga yiyumvamo ko umuziki ari impano ikomeye afite kandi agomba kuwubyazamo umusaruro.

Yakomeje kuririmba nyuma yaho agira amahirwe yo kwitabira amarushanwa yitwa I’m the future arayatsindira bimuhesha amahirwe yo kwinjira no gukomeza rugendo rwe rw’umuziki, akabya inzozi yahoranye kuva kera.
Uyu mukobwa w’imyaka 19 yasoreje amashuriyisumbuye muri Ecole Notre Dame de la Providence i Huye aho yize mu 2016-2018. Yiga kaminuza muri African Leadership University (ALU).

Iyi ndirimbo ye nshya ikurikira izindi zirimo ‘Sinabirota’ yashyize hanze mu mezi icyenda ashize.

Indi ndirimbo yagiye hanze ni iyitwa Pase ya Platini na Rafiki. Platini yabwiye IGIHE ko batekereje gukora iyi ndirimbo nk’abantu babyinanye kera n’ubwo we mu itsinda yari ameze nk’aho ari ko kana karimo.

Ati “Nari umwana muto mu itsinda rya Hotside twabanagamo na Rafiki, Kamichi n’abandi. Rero twaricaye twumva twahuze imbaraga, ni aho igitekerezo cyaturutse. Rafiki niwe wazanye igitekerezo cyo gukora indirimbo tukayita ‘Pase’ kuko ari ijambo rigezweho. Twashakaga guhuza football nibyo bigezweho.”

Ukurikiranye iyi ndirimbo yose wumva amagambo arimo aganisha ku rukundo rwo mu gitanda.

Hari aho Platini agira ati “Serivisi umpaye inteye akanyamuneza nka rutahizamu ndamushota no mu bifu. Niyo ikibuga cyanyerera ngomba gutsinda.”

Platini yabajijwe niba ubutumwa buri muri iyi ndirimbo butaganisha ku rukundo rwo mu gitanda araruca ararumira.

Sody Utuje nawe uri mu bahanzi bari kuzamuka yashyize hanze indirimbo yise ‘Muri Ghetto’. Yavuze ko ari indirimbo yagize igitekerezo cyo gukora kubera inkuru mpano y’ibyabaye ku musore w’inshuti ye.

Sody amaze igihe gito atangiye umuziki nk’umwuga gusa na mbere yaririmbaga ariko atabishyiramo imbaraga cyane.

Umusore witwa Jumper Keellu ufite impano itangaje mu gutunganya indirimbo yo mu bwoko bwa Electronic Dance Music [EDM] nawe yashyize hanze indirimbo yakoranye na Alyn Sano uri mu banyempano bakomeye mu Rwanda.

Iyi ndirimbo bayise ‘Needed You’. Yagiye hanze mu buryo bw’amajwi.

Jumper Keellu yabwiye IGIHE ko ikubiyemo inkuru mpamo y’ibyo yabonye ku nshuti ye. Ati “Ni inkuru mpamo nakuye ku nshuti yanjye y’umukobwa yahemukiye umuhungu bakundanaga ariko uwo mukobwa akimukunda nyuma umuhungu aramusiga. Umukobwa aje kungisha inama mpita numva nabikoramo indirimbo.”

France yashyize hanze indirimbo nshya ivuga ku kugenza urukundo gake
Rafiki na Platini bahuriye mu ndirimbo bise 'Pase'
Sody Utuje uri mu bahanzi bari kuzamuka nawe yashyize hanze indirimbo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza