IGIHE

Zimwe mu ndirimbo 10 z’ibihe byose za Tupac umaze imyaka 25 atabarutse

0 13-09-2021 - saa 19:54, Uwiduhaye Theos

Imyaka 25 irashize umuraperi Tupac Amaru Shakur wamenyekanye nka 2Pac yitabye Imana. Ni umwe mu baraperi bubatse ibigwi bikomeye mu njyana ya Hip hop ndetse ku Isi yose arirahirwa.

Tupac yamenyekanye cyane ku Isi nk’umwe mu mpirimbanyi mu bakora Hip hop, izina rye ryabaye ikimenyabose guhera mu 1987, urugendo arusoza mu 1996 ubwo yarasirwaga urufaya rw’amasasu mu modoka yari arimo mu ijoro ubwo yari yitabiriye umukino w’iteramakofe wahuje Bruce Seldon na Mike Tyson ku wa 7 Nzeri 1996.

Mu bihe bitandukanye ku mbuga nkoranyambaga n’iz’amakuru zikomeye ku Isi, hagaragajwe amafoto y’uyu muraperi aherekejwe n’amagambo yakundaga kuvuga amugaragaza nk’umuntu waranzwe n’ibitekerezo bigusha ku mpinduramatwara.

Hifashishijwe ikinyamakuru Faroutmagazine, IGIHE yakusanyije indirimbo za 2Pac zakunzwe cyane ndetse zasigaye mu mitima ya benshi kurusha izindi.

-  ‘‘Papa’z Song’’

Iyi ndirimbo iri kuri album yise ‘Strictly for my N.I.-.-.A.Z’. Igaruka ku bana babayeho batabana na ba se.

-  ‘‘So Many Tears’’

Iyi ndirimbo iri kuri album 2Pac yise ‘Me Against the World’. Iyi album yagiye hanze mu 1995 mbere gato y’uko uyu muhanzi wabaye icyamamare muri Hip hop yicwa.

-  ‘‘Dear Mama’’

Iyi ni imwe mu ndirimbo za 2Pac zikundwa na benshi bakundaga ibihangano bye. Nayo iri kuri album yise Me Against the World. Igaruka ku mbaraga z’abagore n’ubwitange bwabo mu kurera abana babo.

-  ‘‘Trapped’’

Iyi ndirimbo iri kuri album Tupac yise 2Pacalypse Now. Ikubiyemo ubutumwa bugaruka ku muntu w’umwirabura wahohotewe na Polisi.

-  ‘‘Changes’’

Iyi ndirimbo iri kuri album y’uyu muhanzi yise Greatest Hits. Ni imwe mu z’uyu muhanzi zakunzwe cyane. Yayiririmbye ashaka kuvuga ku mpinduka zikwiriye kubaho muri sosiyete cyane cyane ya Amerika.

-  ‘‘California Love’’

Iyi ndirimbo iri kuri album ya 2Pac yise All Eyez on Me. Yayihuriyemo na Dr Dre uri mu baraperi bubatse amateka muri Amerika.

-  ‘‘Hit ‘Em Up’’

Iyi ndirimbo yasohotse kuri album ya 2Pac yiswe ‘Greatest Hits’. Ni imwe mu ndirimbo ze zakunzwe cyane; aba yibasira bamwe mu bantu batavugaga rumwe barimo na The Notorious B.I.G.
-  ‘‘Letter 2 My Unborn’’

Iyi ni indirimbo ya Tupac iri kuri album yise Until the End of Time. Aba yivuga nk’umugabo ugiye gutabaruka ariko asize umwana utaravuka.

-  ‘‘How Long Will They Mourn Me?’’

Iyi ndirimbo iri kuri album ya Tupac yise Thug Life: Volume 1. Yakozweho n’abarimo Warren G ndetse humvikanamo Nate Dogg. Yakozwe nyuma y’urupfu rwa Kato, wari inshuti ye ya hafi. Yakozwe mu rwego rwo kumwunamira.

-  ‘‘Keep Ya Head Up’’

Iyi ndirimbo iri kuri album Tupac yise Strictly for my N.I.-.-.A.Z. igaruka ku guharanira uburenganzira bw’umugore.

Ku itariki ya 7 Nzeri 1996 ni bwo umuraperi Tupac Shakur yarasiwe mu Mujyi wa Las Vegas ubwo yari avuye kureba umukino w’iteramakofe wahuje inshuti ye Mike Tyson na Bruce Seldon. Yarashwe ari kumwe na Marion Hugh ’Suge’ Knight wari manager we icyo gihe gusa we yararusimbutse. 2Pac yaje kwitaba Imana ku wa 13 Nzeri 1996.

Tupac azwi nk'umwe mu baraperi bubatse izina muri Hip hop y'Isi
2Pac yishwe mu 1996, yarasiwe urufaya rw’amasasu mu modoka yari arimo ubwo yari yitabiriye umukino w’iteramakofe wahuje Bruce Seldon na Mike Tyson
2Pac yapfuye mu buryo butunguranye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza