IGIHE

Umuhanzi Bushali yashyizwe ku rutonde rw’abagomba kujyanwa i Iwawa

0 17-10-2020 - saa 09:41, Nsengiyumva Emmy

Umuhanzi Hagenimana Jean Paul uzwi nka Bushali ashobora kujyanwa mu Kigo Ngororamuco cya i Iwawa mu cyiciro cy’urubyiruko ruzajyanwayo mu mpera z’uku kwezi.

Amakuru agera kuri IGIHE ni uko Bushali yashyizwe ku rutonde rw’abagomba kujyanwa kugororerwa i Iwawa tariki 20 Ukwakira 2020.

Uyu musore amaze iminsi acumbikiwe mu kigo kinyurwamo by’igihe gito (Transit Center) cya Gikondo ahazwi nko kwa Kabuga akekwaho gukoresha ibiyobyabwenge.

Uwahaye amakuru IGIHE yaduhamirije ko uyu muhanzi yamaza gushyirwa ku rutonde rw’abazajya kugororwa. Mbere y’uko uru rubyiruko rujyanwayo, kuri uyu wa Gatanu tariki ya 16 Ukwakira, rwapimwe COVID-19.

Ati “Ari ku rutonde rw’abagomba kugenda, naramwiboneye bamaze kumwogosha. Ari mu bagombaga gupimwa hasigaye gusa ko itariki igera akajyana n’abandi.”

Bushali si we muhanzi wa mbere uzaba ajyanywe i Iwawa cyane ko hanyuze n’abandi nka Neg G the General na Fireman.

Bivugwa ko uyu muraperi yafatanywe n’abandi bantu bari gukoresha ibiyobyabwenge, gusa ngo bitewe n’uko atabifatanywe imbonankubone, hafashwe icyemezo cyo kumujyana mu kigo ngororamuco aho kumujyana mu nkiko.

Si ubwa mbere Bushali avuzwe mu gukoresha ibiyobyabwenge kuko mu mpera za 2019 yatawe muri yombi ndetse ajyanwa mu nkiko akurikiranyweho kubikoresha. Icyakora aza kurekurwa n’urukiko.

Twagerageje kuvugisha ubuyobozi bw’ikigo cyizwi nko kwa Kabuga ngo tubone amakuru arambuye ku ifatwa ry’uyu muhanzi ndetse n’abo bafatanywe gusa ntibyadukundiye kuko batabonekaga ku murongo wa telefoni.

Imwe mu ndirimbo Bushali yari aherutse gushyira hanze

Biravugwa ko Bushali yamaze gushyirwa ku rutonde rw’abagomba kujyanwa i Iwawa
Uyu musore si ubwa mbere avuzwe mu gukoresha ibiyobyabwenge
Bushali ni umwe mu basore bakunzwe mu gihugu mu njyana ya Hip Hop
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza