IGIHE

Riderman na Platini bagizwe ba ambasaderi ba CANAL +

0 22-04-2021 - saa 07:12, Eric Tony Ukurikiyimfura

Kuri uyu wa Gatatu, abahanzi babiri bari mu bakunzwe mu Rwanda, Gatsinzi Emery uzwi nka Riderman ndetse na Nemeye Platini, bombi basinyanye amasezerano y’igihe kirekire n’Ikigo gicuruza amashusho ya televiziyo mu Rwanda, Canal +, nk’abambasaderi bacyo.

Iki gikorwa cyabereye ku cyicaro cya Canal + Rwanda mu nyubako ya Sanlam Towers iri mu Kiyovu mu Mujyi wa Kigali.

Umuyobozi Mukuru wa Canal + Rwanda, Sophie Tchatchoua, yavuze ko impamvu bahisemo gukorana n’aba bahanzi ari uko bafite indangagaciro ndetse n’ubutumwa batanga bukaba bushobora kugera ku bantu benshi.

Ati “Canal + yishimiye gukorana by’igihe kirekire n’abahanzi bombi, Platini na Riderman, ni abahanzi bazwi kandi bafite indangagaciro, ikirenze kuri ibyo ni uko ubutumwa batanga bugera kuri benshi. Tuzafatanya nabo mu guteza imbere Canal + mu Rwanda.”

Nemeye Platini wari usanzwe akorana na Canal +, yavuze ko yishimiye gukomezanya nayo ku buryo agiye gukomeza kuyikundisha abandi dore ko na we akunda kuyireberaho imipira n’umuziki.

Ati “Nk’uko mubizi ndi umufana ukomeye wa Manchester United, nkunda kureba umupira cyane, by’umwihariko twebwe nk’abahanzi hari amashene adufasha cyane, ari gukina indirimo zacu nka Trace Mziki, izo ndazikurikirana.”

Yakomeje agira ati “Ariko icyisumbuyeho ni uko batwongereyeho amashene menshi ya televiziyo zo mu Rwanda.”

Ku ruhande rwa Gatsinzi Emery (Riderman), na we yavuze ko yishimiye ko agiye gukorana na Canal+ Rwanda ndetse yiteguye gukundisha ibisumizi [abafana be] ubwiza bw’amashusho ya televiziyo atangawa n’iki Kigo.

Riderman yahishuye ko uretse amashene ya siporo n’ay’umuziki kuri Canal +, akunda kureba ay’abana n’ayo guteka.

Ati “Hari ibiganiro byinshi nkurikira kuri Canal +, yaba njyewe cyangwa umuryango wanjye, njye nkunda Nat Geo, nkunda ibiganiro byo guteka, abaraperi nibabyumva baranseka ariko ndabikunda kuri shene yitwa Cuisines, hari amashene y’abana, murabizi ko mfite umwana, hari igihe aba areba cartoon bikaba ngombwa ko twicarana. Canal + ifite ibintu byinshi cyane sinabirondora.”

Aba bahanzi bombi bakoranye indirimbo ya Canal +, bashimangiye ko bishimiye ko bagiye gufatanyiriza hamwe mu kumenyekanisha iki kigo gicuruza amashusho ya teleziyo mu Rwanda.

Muri uyu mwaka wa 2021, Canal + izerekana amarushanwa akomeye arimo UEFA Champions League, Europa League, Euro 2021, Imikino Olempike, NBA na za Shampiyona zikomeye z’i Burayi. Igira kandi amashene ya sinema n’ay’amakuru mpuzamahanga.

Ubu, umuntu wifuza kureba amashene ya Canal+, ku mafaranga y’u Rwanda 10.000 gusa ahabwa dekoderi hamwe n’antene (Dish) n’ibindi byose bijyana, ubundi akabasha kwibonera amashusho meza ya HD.

Nemeye Platini (wa kabiri ibumoso) na Gatsinzi Emery 'Riderman' (iburyo) bagizwe ba ambasaderi ba Canal + mu Rwanda
Riderman asinya amasezerano hamwe na Sophie Tchatchoua uyobora Canal + Rwanda
Umuyobozi Mukuru wa Canal + Rwanda, Sophie Tchatchoua, yavuze ko bahisemo aba bahanzi bombi kuko bashobora gutanga ubutumwa bukagera kure kuri benshi
Nemeye Platini yishimiye gukomeza gukorana na Canal +

Amafoto: Rukundo Patrick

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza