IGIHE

Mani Martin yatakambiye inzego zitandukanye azisaba kudohorera abahanzi

0 30-03-2021 - saa 22:20, Uwiduhaye Theos

Nyuma y’itabwa muri yombi rya Social Mula ari mu ifatwa ry’amashusho y’indirimbo nshya, umuhanzi Mani Martin yatakambiye inzego zitandukanye za Leta azisaba gufasha abahanzi bakamenya uko bakwiriye kwitwara mu bikorwa bimwe na bimwe muri iki gihe.

Mani Martin yanditse kuri Twitter asaba inzego zitandukanye kugena imirongo yo kugenderaho aho kugira ngo bajye babafata babashyire ku karubanda babashinja kwica amabwiriza ya Coronavirus.

Yanditse ati “Ibikorwa by’abahanzi bidahuza imbaga nko gufata amajwi n’amashusho y’indirimbo, gufata amashusho ya filime, gufata amajwi y’ikinamico no kwitoza hamwe (practice) ku bahanzi niba bishoboka mwadushyiriraho imirongo ntarengwa izwi ku buryo byakorwa hubahirizwa amabwiriza yo kwirinda COVID-19.”

Uyu muhanzi yamenyesheje inzego zitandukanye zirimo Minisiteri y’Urubyiruko n’Umuco, Polisi y’u Rwanda, Urwego rw’Igihugu rw’Imiyoborere, RDB, Minisiteri y’Ubuzima n’izindi zifite aho zihuriye n’iki kibazo.

Nyuma yo kwandika ibi yabwiye IGIHE ko nyuma y’igihe kirenga umwaka abahanzi badakora ibitaramo n’ibindi bikorwa byahuzaga abantu benshi, bakwiriye kudohorerwa bagashyirirwaho imirongo ngenderwaho yo kubafasha ku buryo bakomeza inganzo yabo.

Ati “Hashize igihe kinini tudakora ibikorwa bitandukanye, birakwiye ko tworoherezwa nibura tugashyirirwaho imirongo ngenderwaho, yo kudufasha tukaba twabasha gufata amashusho y’indirimbo tugakora n’ibindi bikorwa.”

Kuri uyu wa Kabiri tariki 30 Werurwe 2021, abantu 39 barimo umuhanzi Social Mula n’abanyamakuru Phil Peter na Murindahabi Irené batawe muri yombi na Polisi y’Igihugu barenze ku mabwiriza yo kwirinda icyorezo cya Covid-19.

Mu gitondo ni bwo Polisi y’Igihugu yerekanye aba bantu 39 batawe muri yombi ku wa Mbere tariki 29 Werurwe 2021, bafatiwe mu rugo rumwe mu Karere ka Gasabo ahazwi nko mu Rugando mu gikorwa cy’ifatwa ry’amashusho y’indirimbo ya Social Mula yise ‘Amata’.

Uretse kuba Mani Martin yavuze ibi kubera icyorezo cya COVID-19 mu minsi ishize we na Clarisse Karasira basabye RDB gushyiraho uburyo bwo korohereza abahanzi mu buryo bwo gufata amashusho y’indirimbo.

Ibi babitangaje mu kiganiro bagiranye na Televiziyo y’u Rwanda aho bavuze ko bibabaje kuba abahanzi bakigorwa no gufata amashusho amwe n’amwe. Mani Martin we yatangaje ko hari indirimbo ye imwe yabuze uko akora amashusho yayo kuko yigeze kwandikira RDB ashaka gukorera muri Nyungwe ntasubizwe.

Reba indirimbo Mani Martin aheruka gushyira hanze

Mani Martin yasabye inzego zitandukanye gufashanya hagashyirwaho imirongo ngenderwaho mu bikorwa bitandukanye by’abahanzi nko gukora indirimbo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza