IGIHE

Ibyo wamenya kuri DJ Bob, wahawe amafaranga y’ishuri akayagura ibyuma by’umuziki ukaba umugejeje kure

0 15-09-2020 - saa 08:39, Nsengiyumva Emmy

Ndacyayishimira Jean Bosco wamenyekanye nka Dj Bob ni umwe mu bantu b’ibyamamare muri muzika y’u Rwanda.Uruhare rwe mu iterambere ry’umuziki aherutse kurushimirwa ubwo hatangwaga itangwa ry’ibihembo bya Kiss Summer Awards.

Nyuma yo gushyikirizwa igihembo cye nk’ishimwe ry’uruhare yagize mu iterambere rya muzika nyarwanda, DJ Bob yasobanuye byinshi ku rugendo rwe mu muziki.

Uyu mugabo wamenyekanye ubwo yari afite studio ishyira indirimbo ku ma CDs akazicuruza. Ni umwe mu ba mbere babyadukanye ndetse akabikuramo izina n’amafaranga. Benshi mu bahanzi bamushimira uko yabafashije kumenyekanisha ibihangano byabo.

DJ Bob avuga ko urukundo rw’umuziki kuri we, rwatangiye yiga mu mashuri yisumbuye kuko yawukuragamo ubushobozi bwamufashaga kwiga.

Mu 1997 nibwo yinjiye mu muziki. Iki gihe yakoraga mu mujyi rwagati, muri studio yitwa Taxman aho yari DJ, ariko akaba yaranacuranga mu bukwe no mu birori by’iminsi mikuru y’amavuko.

Avuga ko urukundo rw’umuziki arukomora kuri ba nyirarume bawubagamo, ati “Njye nakuriye mu banyamuziki, ba marume bose bari aba Djs. Nanjye nisanze nabikunze mbyinjiramo gutyo.”

Guhuza umuziki n’amasomo byari akazi gakomeye, icyakora nta na kimwe ngo yagombaga guhagarika kuko amafaranga yakuraga mu muziki ariyo yamwunganiraga ku ishuri.

Akiraniza amashuri yisumbuye, DJ Bob yatangiye kwiga ibijyanye n’ikoranabuhanga muri KIST. Icyakora ngo ntabwo yabashije kurangiza kuko amafaranga y’ishuri y’umwaka wa kabiri yayaguzemo ibyuma byo kwinjira mu bucuruzi bw’umuziki.

Ati “Nakomereje muri KIST ariko ngeze mu wa kabiri mbivamo. Amafaranga y’ishuri umwaka wose bayamperaga rimwe (Umuntu wo mu muryango we wabaga muri Canada niwe wayamuhanga). Njye rero aho gukomeza mu wa kabiri nahise njya kwiga ibyo kuvanga imiziki muri Uganda ngura n’ibikoresho. kwiga ntabwo byari bikinkundiye.”

Dj Bob avuga ko imiziki iki gihe yari imaze kumwuzura mu mutwe ntitume akomeza kwiga, ahubwo ahitamo kumesa kamwe.

Nyuma yo guhagarika amasomo mu 2005, DJ Bob wakoreraga abandi icyo gihe yatangiye gutekereza uko yakwikorera.

Mu 2007-2008, nibwo yashinze studio ye, agiriwe inama na Muyoboke Alex na Tom Close bari inshuti ze zikomeye.

Usibye guha abakunzi b’umuziki indirimbo zinyuranye z’abahanzi, Dj Bob yagezaga iyi miziki no ku banyamakuru batandukanye by’umwihariko ku ba Radio Salus yari igezweho icyo gihe kandi itari mu mujyi wa Kigali.

DJ Bob avuga ko uretse abahanzi bashya kuri ubu, yakoranye na buri wese wagize izina mu muziki w’u Rwanda mu myaka itambutse.

Urukundo yakundaga umuziki nicyo kintu avuga ko cyamufashije kubirambamo no kugera ku rwego abishimirwa.

Ati”Narabikundaga, urukundo nabikundaga nibaza ko arirwo rwamfashije gukora ibyo nakoze byose.”

Iyo arebye umuziki w’uyu munsi yishimira ko ugaragaza ko ejo hazaza ari heza, Ati” Kenshi nakunze kuvuga ko umuziki wacu utazatera imbere hatajemo amaraso mashya. Iyo ndebye uko bimeze uyu munsi mbona ko mu minsi iri imbere nta muhanzi uzongera kutubeshya. Buri munsi havuka abana bato kandi babahanga.”

Kiss Summer Awards nicyo gihembo cye cya mbere Dj Bob yari ahawe mu myaka amaze mu muziki. Icyakora ngo ntibyigeze bimuhangayikisha.

Nubwo atagicuruza ama CDs ku muhanda, Dj Bob avuga ko atari kure y’imyidagaduro kuko n’ubundi ari mu bucuruzi bw’imiziki na filime mu Rwanda.

Ikiganiro na DJ Bob

Dj Bob avuga ko umuziki watumye areka amasomo aho yari ageze muri kaminuza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza