IGIHE

Dr Dre yasabye urukiko guhamagaza abari mu bukwe bwe na Nicole Young mu 1996

0 20-11-2020 - saa 18:31, Uwiduhaye Theos

Mu minsi ishize uwahoze ari umugore wa Dr Dre yatangaje ko ashaka gutandukana n’iki cyamamare mu muziki, kubera impamvu zitandukanye zirimo no kuba hari amasezerano yamusinyishije ku gahato bajya kubana.

Dre w’imyaka 55 na Nicole Young wa 50, barushinze ku wa 25 Gicurasi mu 1996. Daily Mail yatangaje ko Dr Dre yatangaje ko ashaka ko nibura abashyitsi bari bitabiriye ibirori bari hagati ya 15 na 20 bahamagazwa bagatanga ubuhamya kuko hari byinshi baba bazi.

Mu mpapuro zashyikirijwe urukiko, Dre yagaragaje imyirondoro y’abantu bitabiriye ubukwe, irimo amazina, aho babarizwa ubu ndetse na nimero za telefoni zabo.

Umunyamategeko wa Dre witwa Laura Wasser waburaniye ibindi byamamare birimo Kim Kardashian na Angelina Jolie, yavuze ko “abashyitsi ari abatangabuhamya ba nyabo bagomba kuba bazi neza ibijyanye n’ibyo uyu mugore aregera” byo gusinyishwa ku gahato amasezerano ajyanye n’imitungo yabo, n’uko bagombaga kuzayigabana mu gihe baba batandukanye.

Aya masezerano azwi mu Cyongereza nka ‘prenuptial agreement’ cyangwa ‘prenup’ mu mpine, arakomeye cyane muri Leta Zunze Ubumwe za Amerika kuko mu gihe adahari, iyo habayeho gatanya muri leta zimwe, umutungo rusange w’umuryango abagiye gutandukana barawusatura bakaringaniza.

Mu ntangiriro za Nzeri, Nicole Young yatangaje ko nibura uyu mugabo yajya amuha 2.530.000$ buri kwezi yo kwiyitaho no gukora ibindi bintu nkenerwa, mu gihe batarabona gatanya. Uyu mugabo yamuteye utwatsi, nyuma iki cyifuzo nyuma kiza guteshwa agaciro.

Dr Dre ufite umutungo ubarirwa muri miliyoni $820, yari yavuze ko we n’umugore bagomba kugabana imitungo bagendeye ku biri mu masezerano bagiranye mbere y’uko bakora ubukwe.

Uyu mugore we yavugaga ko ashaka ko bagabana bakaringaniza imitungo irimo n’aka kayabo; ndetse n’indi itimukanwa n’ibindi byose by’uyu mugabo, kuko aya masezerano yayasinyishijwe ku gahato.

Dr Dre na Nicole bafitanye abana babiri; umuhungu witwa Truice Young w’imyaka 23 n’umukobwa witwa Truly Young ufite imyaka 19. Kubera ko aba bana ari bakuru, nta ndezo uyu mugabo azigera yakwa.

Nicole yari umugore wa mbere wa Sedale Threatt wakinnye muri NBA, aza kumuta yisangira Dr. Dre ubusanzwe witwa Andre Romelle Young, wamamaye cyane mu ndirimbo zirimo ‘Calfornia Love’ yahuriyemo na 2Pac, ‘Still D.R.E’ n’izindi nyinshi. Ni umuraperi akaba n’utunganya indirimbo.

Dr Dre ni we washinze inzu ifasha abahanzi ya Aftermath Entertainment izwi cyane ku Isi yose. Afite abana batandatu ku bagore batanu batandukanye, harimo abahungu bane n’abakobwa batatu.

Ku myaka 16 nibwo yibarutse umwana we wa mbere yabyaranye na Cassandra Joy Green bigeze gukundana; icyo gihe uyu wari umukunzi we yari afite imyaka 15. Dre ntabwo yigeze agira amahirwe yo guhura n’uyu muhungu we witwa Curtis kugeza agize imyaka 20 nk’uko byagiye bivugwa kenshi.

Mu 1983 yibarutse umukobwa yise La Tanya Danielle Young yabyaranye na Lisa Johnson.

Dr Dre yasabye urukiko guhamagaza abari mu bukwe bwe na Nicole Young mu 1996
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza