IGIHE

Byinshi ku ndirimbo Danny Vumbi yakoreye umufasha we akanamwifashisha mu mashusho

0 25-03-2021 - saa 18:46, Nsengiyumva Emmy

Danny Vumbi yasohoye indirimbo nshya yise ‘Urukundo rwa mbere’, ikubiyemo ubutumwa yageneye umukunzi we wa mbere akaba umufasha we n’umubyeyi w’abana bibarukanye.

Nyuma yo gusohora iyi ndirimbo igaragaramo umufasha we, Danny Vumbi yemereye IGIHE ko yayandikiye umugore we ndetse ari nayo mpamvu yamushyize mu mashusho yayo.

Yagize ati “Indirimbo yitwa ‘Urukundo rwa mbere’; Nabonye ntawundi muntu wajya mu mashusho uretse nyine urukundo rwanjye rwa mbere ari we mugore wanjye.”

Danny Vumbi avuga ko ari indirimbo yari amaranye igihe mu bitekerezo ariko atarayisohora, iyi ikaba imwe mu ziri kuri album ye nshya aherutse gusohora yise ‘Inkuru nziza’.

Usibye kuba umufasha we yaragaragaye mu mashusho y’indirimbo ‘Urukundo rwa mbere, Danny Vumbi ahamya ko n’igitekerezo cyayo ariwe yagikuyeho.

Ati “Nari naramwemereye ko nzamukorera indirimbo, gusa kuri ubu ntabwo nahisemo kuyimwitirira kuko usanga hari uburyo bitagaragara neza.”

Danny Vumbi yavuze ko umufasha we yabanje gukunda iyi ndirimbo ataramenya neza ko ari iye, aza gutungurwa bamubwiye ko ariwe uzayigaragaramo.

Uyu muhanzi n’umufasha we bamaze imyaka ikabakaba 21 bakundana na 17 babana nk’umugore n’umugabo.

Agira inama ingo zirebera ku rukundo rwabo, Danny Vumbi yagize ati “Kugira ngo ubane neza n’umuntu munarambane, bisaba ko buri wese agira icyo yigomwa. Ugomba kugira ibyo wigomwa kugira ngo ubane neza na mugenzi wawe.”

Danny Vumbi na Muhawenimana Jeanette bafitanye abana babiri b’abahungu; Henry Jay Z Ineza na David Ihirwe.

Uyu mugabo yahoze ari umwe mu bagize itsinda The Brothers, aza kurivamo mu 2011 atangira gukora umuziki ku giti cye ndetse ari mu bahanzi bafite ubuhanga bwihariye kandi bakora ibihangano birimo ubutumwa bufasha benshi.

Uretse kuba umuhanzi, ni n’umwanditsi ukomeye w’indirimbo kuko benshi mu bahanzi bakomeye mu Rwanda bamwitabaza kugira ngo bakore indirimbo zifite icyanga.

Indirimbo ’Urukundo rwa mbere’ ya Danny Vumbi

Ikiganiro na Danny Vumbi asobanura iby’indirimbo ye nshya

Umufasha wa Danny Vumbi niwe ugaragara mu mashusho y'iyi ndirimbo
Danny Vumbi n'umufasha we bamaze imyaka 17 babana nk'umugore n'umugabo
Danny Vumbi yakoreye indirimbo umufasha we
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza