IGIHE

Volleyball: Abakobwa b’u Rwanda bakoze amateka bagera muri ½ cy’Igikombe cya Afurika (Amafoto)

0 13-09-2021 - saa 23:09, Eric Tony Ukurikiyimfura

Ikipe y’Igihugu y’Abagore yakoze amateka yo kugera bwa mbere muri ½ cy’Igikombe cya Afurika cya Volleyball ubwo yatsindaga Nigeria amaseti 3-0 (25-22, 25-23, 25-23) mu mukino w’umunsi wa kabiri wo mu Itsinda A wabereye muri Kigali Arena kuri uyu wa Mbere.

U Rwanda na Nigeria byahuye bibizi ko ikipe itsinda ihita ibona itike ya ½ kuko byombi byari byatsinze imikino ibanza yabaye ku Cyumweru.

Amakipe yombi yagendanaga mu manota y’iseti ya mbere yarangiye u Rwanda rutsinze 25-22 mu gihe mu iseti ya kabiri rwakomeje kugenda imbere, ariko Abanya-Nigeria bagerageza kugabanya ikinyuranyo.

Akaruhuko ka mbere k’iseti ya kabiri kafashwe u Rwanda rufite 8-3 mu gihe aka kabiri kageze ari 16-12. Gusa, iseti yose yarangiye ari 25-23.

Ikipe y’Igihugu yakomeje guhagarara neza no mu iseti ya gatatu ibifashijwemo n’abarimo Bianca Moreira Gomes wakoraga amanota akenewe cyane.

Akaruhuko ka mbere kafashwe u Rwanda ruyoboye n’amanota 8-4, aka kabiri gafatwa ari 16-11. Nk’uko byagenze mu iseti ya kabiri, Nigeria yagerageje kuzamura amanota ariko birangira itsinzwe kuri 25-23 nyuma y’amanota akenewe yakozwe na Aline Siqueira na Bianca Gomes.

Indi mikino yabaye kuri uyu wa Mbere ni iyo mu Itsinda B aho Repubulika Iharanira Demokarasi ya Congo yatsinzwe na Kenya amaseti 3-0 (11-25, 12-25, 19-25) mu gihe Tunisia yatsinzwe na Cameroun amaseti 3-0 (15-25, 18-25, 17-25).

Ku wa Kabiri uzaba ari umunsi w’ikiruhuko ku Ikipe y’Igihugu izongera gukina ku wa Gatatu ihura na Sénégal. Gusa, ubwo izaba itakinnye, Sénégal izahura na Maroc mu Itsinda A guhera saa Munani.

Mu Itsinda B hazaba imikino ibiri irimo uzahuza Cameroun imaze gutsinda imikino ibiri, izahura n’u Burundi saa Sita naho Tunisia ikine na Kenya guhera saa Kumi.

Muri ½ kizakinwa ku wa Gatandatu, u Rwanda ruzahura n’ikipe izaba iya mbere icyangwa iya kabiri mu Itsinda B rigizwe na Cameroun, Kenya, Tunisia, u Burundi na Repubulika Iharanira Demokarasi ya Congo.

Abakinnyi ba Nigeria baririmba indirimbo yubahiriza igihugu cyabo
Abakinnyi b'u Rwanda baririmba "Rwanda Nziza"
Mariana Da Silva azamura umupira mu gihe Musaniwabo Hope yari yiteguye ari imbere ye
Musaniwaho Hope azibira umukinnyi wa Nigeria washakaga kurenza umupira
Abakinnyi b'u Rwanda bishimira amanota bari bamaze gutsinda
Aline Siqueira (1) ni umwe mu bakinnyi bitwaye neza ku ruhande rw'u Rwanda
Dusabe Flavia na Mariana Da Silva babuze umukinnyi wa Nigeria kurenza umupira
Visi Kapiteni w'u Rwanda, Bianca Moreira Gomes arenza umupira
Mukandayisenge Benitha ashaka uko akora inota
Aline Siqueira (1) na Apolinario Caroline Taiana bahagarika umupira wari utewe n'umukinnyi wa Nigeria
Abayobozi barimo Minisitiri wa Siporo, Munyangaju Aurore Mimosa (ubanza ibumoso); Minisitiri w’Abakozi ba Leta n’Umurimo, Fanfan Rwanyindo; Perezida wa FRVB, Ngarambe Rafaél na Ambasaderi w'u Rwanda muri Sénégal, Jean Pierre Karabaranga, barebye uyu mukino
Ibyishimo byari byose ku ikipe y'u Rwanda nyuma yo kubona itike ya ½ cy’Igikombe cya Afurika
Abatoza bungirije: Ndayikengurukiye Jean Luc na Mudahinyuka Christophe bateruye umutoza mukuru Paulo De Tarso Milagres nyuma y'umukino

Amafoto: Shema Innocent

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza