IGIHE

Umwihariko wa Kigali International Peace Marathon izaba muri Kamena 2021

0 17-04-2021 - saa 07:11, Eric Tony Ukurikiyimfura

Irushanwa Mpuzamahanga ryo gusiganwa ku maguru ribera i Kigali (Kigali International Peace Marathon), rizaba ku nshuro ya 16 tariki ya 20 Kamena 2021, hubahirizwa ingamba zo kwirinda COVID-19 mu gihe kandi rizahagurukira ndetse rikanasorezwa kuri Kigali Arena, aho kuba kuri Stade Amahoro nk’uko byari bisanzwe.

Kigali International Peace Marathon ku nshuro ya 16, yagombaga kuba tariki ya 17 Gicurasi 2020, igenda yimurwa kubera COVID-19 ndetse birangira itabaye mu mwaka ushize.

Kuri iyi nshuro, byemejwe ko iri rushanwa rizaba tariki ya 20 Kamena 2021, umunsi umwe mbere y’uko hatangira Inama y’Abakuru b’Ibihugu bikoresha Ururimi rw’Icyongereza (CHOGM) izamara iminsi itanu ibera i Kigali.

Mu kiganiro n’abanyamakuru cyo kumurika iri rushanwa, cyabereye muri Kigali Arena kuri uyu wa Gatanu, Me Mubiligi Fidèle uyobora Ishyirahamwe Nyarwanda ry’Imikino Ngororamubiri (RAF), yavuze ko isiganwa ry’uyu mwaka rizaba ritandukanye n’ayabanje kubera icyorezo cya COVID-19.

Ati “Nubwo igiye kuba hazaba hari umwihariko ugereranyije n’andi marushanwa yabaga kuko hazaba hariho kubahiriza amabwiriza ya COVID-19 yizweho n’inzego zitandukanye. Ibyakorwaga byose bizakorwa.”

Kuri iyi nshuro no mu myaka ine iri imbere, abazitabira Marathon Mpuzamahanga ya Kigali bazahagurukira kuri Kigali Arena, abe ari naho basoreza. Urugendo ruzaba rungana n’ibilometero 21, bivuze ko abazakora Marathon bazahazenguruka inshuro ebyiri.

Asobanura iby’iyi nzira, Me Mubiligi yagize ati “Aho twahagurukiraga n’aho twasorezaga harahindutse kubera impamvu ebyiri. Iya mbere ni uko ko Stade Amahoro hashobora kuboneka gahunda yo kuyivugurura, byabaye ngombwa ko duhindura kuko tutazi igihe ibyo bikorwa bizatangirira n’igihe bizasozerezwa kandi uruhushya [kumenyekanisha inzira] rumara imyaka itanu. Twahisemo guhindura inzira. Hari icyahindutseho gato, igihe nikigera muzagenda mubibona. Tuzahagurukira hano [kuri Kigali Arena], ari naho tuzasoreza.”

Iri rushanwa rikorwa mu ntera eshatu; Marathon y’ibilometero 42; Igice cya Marathon kireshya n’ibilometero 21 ndetse n’ibilometero 10 bikorwa n’abasiganwa byo kwishimisha batarushwanwa (Run for fun).

Ubusanzwe, Kigali International Peace Marathon ibimburirwa n’ibikorwa birimo isiganwa ry’ijoro rizwi nka Kigali Night Run, kuri iyi nshuro bizakorwa tariki ya 13 Kamena 2021.

Umunyamabanga Mukuru w’iri Shyirahamwe, Umutangana Olivier, yavuze ko kwiyandikisha byatangiye kandi bikorwa binyuze ku rubuga rwa internet rw’isiganwa ndetse bizarangira tariki ya 13 Kamena, habura icyumweru kimwe ngo isiganwa ribe.

Ati "Kwiyandikisha icyo bisaba, umunyamahanga yishyura 30$, Umunyarwanda uziruka bisanzwe yishyura 2000 Frw naho urushanwa yiruka Marathon yishyura 5000 Frw, ibyo ni ibisanzwe."

Marathon Mpuzamahanga ya Kigali igamije kwimakaza amahoro binyuze mu mikino, yatangiye gukinwa mu 2005. Ubwo iri rushanwa ryabaga ku nshuro ya 15, tariki ya 16 Kamena 2019, ryitabiriwe n’abagera ku 3900 baturutse mu bihugu 55.

Ubuyobozi bwa RAF bwatangaje ko umubare w’abazitabira isiganwa ry’uyu mwaka ushobora kujya munsi y’uheruka kubera ingamba ibihugu bitandukanye byafashe mu gukumira icyorezo cya COVID-19.

Bwavuze ko hakiri kwigwa niba abazitabira isiganwa byo kwishimisha bazipimisha cyangwa bakubahirizwa guhana intera hagati y’umuntu n’undi.

Ikindi gishya ku irushanwa ry’uyu mwaka ni uko ibihe byiza byagirwa n’umukinnyi witabiriye Igice cya Marathon bishobora kumenyeshwa Impuzamashyirahamwe y’Imikino Ngororamubiri ku Isi nk’uko byari bisanzwe muri Marathon.

Mu baterankunga b’irushanwa ry’uyu mwaka harimo uruganda rw’ibinyobwa rwa SKOL, Banki ya Kigali, MTN, Visit Rwanda, Polisi y’Igihugu, Kigali Arena na Rwanda Convention Bureau.

Ishyirahamwe ry'Imikino Ngororamubiri mu Rwanda (RAF) ryamuritse Marathon Mpuzamahanga ya Kigali ya 2021 kuri uyu wa Gatanu
Umuyobozi wa RAF, Mubiligi Fidèle, yavuze ko Marathon y'uyu mwaka izaba itandukanye n'izabanje kubera amabwiriza yo kwirinda COVID-19
Visi Perezida ushinzwe Amarushanwa n’Iterambere muri RAF, Ndekezi Omer
Umunyamabanga Mukuru wa RAF, Umutangana Olivier, yavuze ko kwiyandikisha byatangiye ndetse bizarangira tariki ya 13 Kamena 2021
Visi Perezida ushinzwe Ubuyobozi n’Imari muri RAF, Ntubabare Ange Doriane.
Kuri uyu wa 16 Mata 2021 nibwo hamuritswe Kigali International Peace Marathon izaba tariki ya 20 Kamena 2021

Amafoto: Uwumukiza Nanie

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza