IGIHE

PSG yatsinze Lyon yegukana igikombe cya gatatu muri uyu mwaka

0 1-08-2020 - saa 08:45, Eric Tony Ukurikiyimfura

Paris Saint-Germain yegukanye Coupe de la Ligue mu Bufaransa nyuma yo gutsinda Lyon kuri penaliti 6-5 ubwo amakipe yombi yanganyaga ubusa ku busa mu mukino wa nyuma wabaye ku wa Gatanu.

Paris Saint-Germain yakinnye uyu mukino idafite rutahizamu wayo ngenderwaho, Kylian Mbappé, wavunikiniye mu mukino wa nyuma wa Coupe de France mu cyumweru gishize, we akaba yari yicaye mu bandi bantu batarenze 5000 bawurebye.

Uyu mukino wa nyuma wa Coupe de la Ligue wakiniwe kuri Stade de France, wagombaga kuba warabaye muri Mata, ariko wimurwa kubera icyorezo cya Coronavirus.

Mu minota 10 ya mbere, Paris Saint Germain yabonyemo uburyo bubiri bukomeye ku mashoti yatewe na Neymar, umupira wa mbere ufatwa n’umunyezamu Anthony Lopes mu gihe undi wanyuze ku ruhande.

Lyon ntiyahiriwe n’igice cya mbere itabonyemo amahirwe menshi, aho umupira wa mbere ugana ku izamu watewe hanze na Memphis Depay mu gihe Maxwel Cornet yateye ishoti ridakomeye rigafatwa na Keylor Navas.

Habura iminota mike ngo igice cya mbere kirangire, Idrissa Gana Gueye yateye ishoti rikomeye ryashyizwe muri koruneri n’umunyezamu Lopes.

Nyuma yo gusoza iminota 90 nta kipe irebye mu izamu ry’indi, hitabajwe iminota 30, aho Neymar yabonye uburyo bwiza ku mupira wahinduwe na Ander Herrera, ashyizeho umutwe umupira ushyirwa muri koruneri n’umunyezamu wa Lyon.

Lyon yashoboraga gufungura amazamu ku mupira w’umuterekano watewe na Maxwell Cournet ku bw’amahirwe make, umunyezamu Keylor Navas awukuramo.

Angel Di Maria wigaragaje muri uyu mukino, yakorewe ikosa na Raphael mu minota ya nyuma, uyu myugariro wa Lyon ahabwa ikarita itukura.

Ubu buryo bwa nyuma bw’umupira w’umuterekano kuri Paris Saint-Germain ntacyo bwatanze nyuma y’uko Neymar ateye umupira hejuru.

Nyuma yo gutsinda penaliti 5-5, Bertrand Traoré yahushije iya gatandatu ku ruhande rwa Lyon, ikurwamo na Keylor Navas mu gihe Pablo Sarabia yatsinze iya Paris Saint-Germain.

Kwegukana Coupe de la Ligue byatumye PSG yuzuza ibikombe bitatu itwaye muri uyu mwaka w’imikino mu Bufaransa, ni nyuma yo gutwara Shampiyona na Coupe de France.

Ni ku nshuro ya kane mu myaka itandatu, Paris Saint-Germain yegukana ibikombe bitatu bikinirwa mu Bufaransa.

Irushanwa rya Coupe de la Ligue ryashyizweho mu 1994, ariko iyi nshuro niyo ya nyuma rikinwe.

Lyon yasoje umukino ari abakinnyi 10 mu kibuga nyuma y'ikarita itukura yahawe Rafael ku munota wa nyuma
Kimpembe na Neymar bishimana na Navas wari kumwe na Pablo Sarabia
Abakinnyi ba PSG bashimira umunyezamu Kylor Navas wakuyemo penaliti
Kylian Mbappé yifatanyije na bagenzi be kwishimira igikombe
PSG yegukanye irushanwa rya nyuma rya Coupe de La Ligue
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza