IGIHE

Nyuma ya Marines FC, Kiyovu Sports ni yo kipe yoroheye APR FC mu myaka 10 iheruka

3 8-11-2019 - saa 08:52, Eric Tony Ukurikiyimfura

Kuri uyu wa Gatanu hateganyijwe umukino utegerejwe na benshi hagati ya Kiyovu Sports na APR FC, akaba ari na wo usoza umunsi wa munani wa Shampiyona y’icyiciro cya mbere mu Rwanda mbere y’uko hafatwa akaruhuko mu gihe ikipe y’igihugu igiye kwitegura imikino ibiri mpuzamahanga.

Kiyovu Sports irakira uyu mukino kuri Stade ya Kigali i Nyamirambo saa 18:00.

Ni umukino ugiye guhuza amakipe asa n’ayegeranye mu manota kuko APR FC ya gatatu ku rutonde rwa Shampiyona ifite amanota 17 inganya na Mukura Victory Sports, zombi zirushwa inota rimwe na Police FC ya mbere mu gihe Kiyovu Sports ifite amanota 14 ku mwanya wa gatanu.

Umutoza wa Kiyovu Sports, Mugunga Dieudonné ‘Buruchaga’, avuga ko ikipe ye kuri ubu ihagaze neza ndetse bishoboka gutsinda APR FC.

Ati” Abakinnyi banjye bagomba gukora ibishoboka byose bagatsinda APR FC kandi tugomba gutsinda kugira ngo tugume mu bahataniye igikombe. Dufite ikipe imaze kuzamura urwego ndetse yakora byinshi nikomeza kwitwara nk’uko iri gukina ubu.”

Ku ruhande rw’umutoza wa APR FC, Adil Mohamed Erradi, yavuze ko intego ikipe ifite kuri uyu mukino ari ukwitwara neza, ikisubiza umwanya wa mbere.

Ati” Ni umukino w’ingenzi kuri twe kuko dushaka gusubira ku mwanya wa mbere ndetse ntihagire n’umukino dutakaza. Kiyovu Sports ni ikipe nziza, ariko n’abakinnyi banjye ndabizeye.”

Kiyovu Sports ni ikipe ya kabiri yoroheye APR FC mu myaka 10 ishize

Uretse Marines FC yabonye amanota atatu gusa mu mikino yahuyemo na APR FC mu myaka 10 ishize, Kiyovu Sports yabonye amanota ane gusa kuri iyi kipe y’ingabo.

Intsinzi ya Kiyovu Sports yo ku wa 27 Ukwakira 2017, yabonetse nyuma y’imyaka 12 Urucaca rudatsinda APR FC. Uyu mukino warangiye ari igitego 1-0 cyatsinzwe na Mustafa Francis kuri ubu ukinira Bugesera FC ndetse icyo gihe Kiyovu Sports yari imaze iminota isaga 670 itinjiza igitego mu izamu rya APR FC.

Kiyovu Sports yaherukaga gutsinda APR FC muri Shampiyona tariki ya 30 Ukwakira 2005, ibitego 3-1 ku mukino w’umunsi wa nyuma wa shampiyona y’uwo mwaka yanegukanywe na APR FC.

Amateka aha amahirwe ikipe ya APR FC

Mu mikino 32 iheruka guhuza amakipe yombi muri Shampiyona, APR yatsinzemo 23, Kiyovu itsinda itatu, zinganya imikino itandatu.

APR FC yatsinze imikino 18 muri 20 iheruka guhuriramo na Kiyovu Sports mu gihe umukino wa vuba wahuje amakipe yombi, warangiye anganyije ubusa ku busa mu mwaka ushize w’imikino.

Muri iyi mikino 20, APR FC yinjijemo ibitego 41 mu izamu rya Kiyovu Sports mu gihe Urucaca rwo rwatsinze ibitego bitanu gusa.

Kiyovu Sports irakira APR FC kuri uyu wa Gatanu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
TUBISABIMANA INNOSENT 2019-11-08 07:17:25

Andika hano amatekaatwe retsebyinshi nizenuyumu nsidukomeze tuyandikire handitwa mamare dutsinda=3 = 0

2
Nsabimana bertin 2019-11-08 06:08:45

Nukuri nukuri turatsinda kiyovu sport 2 kubusa

3
ngabo 2019-11-08 04:29:01

umutwe winkuru urimo gufana cyane ,...ubunyamwuga nabwo buba bukenewe.

Kwamamaza