IGIHE

Niba Rayon Sports yarasinyishije Muhadjiri tuzatwara igikombe- Mirafa

0 31-07-2020 - saa 12:38, Eric Tony Ukurikiyimfura

Nizeyimana Mirafa ukinira Rayon Sports hagati mu kibuga, yavuze ko mu gihe iyi kipe yaba ifite umuvandimwe we Hakizimana Muhadjiri mu mwaka utaha w’imikino, nta kabuza izegukana igikombe cya Shampiyona.

Nizeyimana Mirafa na Hakizimana Muhadjiri ni abavandimwe dore ko ba sekuru babo bombi bavukana.

Mu kiganiro yagiranye na IGIHE, Nizeyimana Mirafa yavuze ko mu gihe Rayon Sports yaba ifite Muhadjiri mu mwaka utaha w’imikino nta kizayibuza kwegukana igikombe cya Shampiyona.

Ati “Gukina na Muhadjiri ni ibintu by’agaciro, ni umuntu uzadufasha cyane byongeye kuba ari uwo mu muryango wanjye bizamufasha kwisanga mu ikipe kuko azaba afite undi muntu ahasanze. Niba yarasinye tuzatwara igikombe.”

“Muhadjiri ni imashini y’ibitego, ni umukinnyi uhora utsinda, iyo ari mu kibuga ubwabyo ni igitego kimwe. Ni umukinnyi Rayon Sports ikeneye kugira ngo tugere ku ntego yo gutwara igikombe cya Shampiyona no kugera mu matsinda turamutse dukinnye imikino Nyafurika.”

Umuyobozi wa Rayon Sports, Munyakazi Sadate, aherutse gutangazza ko bamaze kugura Hakizimana Muhadjiri, ariko igihe cyo kumwerekana kitaragera.

Nizeyimana Mirafa yakinannye na Hakizimana Muhadjiri umwaka umwe muri APR FC mbere y’uko umwe ajya gukina muri Leta Zunze Ubumwe z’Abarabu undi akerekeza muri Rayon Sports.

Agaruka ku mwaka we wa mbere muri iyi kipe yambara ubururu n’umweru, Nizeyimana Mirafa yavuze ko wabaye uwo kwibona mu ikipe ariko yizeye ko azayifasha cyane muri uyu mwaka wa kabiri.

Ati “Umwaka wa mbere wabaye uwo kwisanga mu ikipe, uwa kabiri ni uwo gukora ibikorwa byinshi no gufasha ikipe gutwara ibikombe, ni yo ntego mfite uyu mwaka.”

Nizeyimana Mirafa avukana na Gikamba Ismael ukinira Marines FC na Itangishaka Ibrahim wa Etincelles FC.

Yakuriye mu ikipe y’abato itozwa na Mungo Jitiada ‘Vigoureux’ i Rubavu, ayivamo ajya muri Marines FC. Nyuma yaho yerekeje muri Etincelles na yo yamufashije kwigaragaza ajya muri Police FC aho yavuye ajya muri APR FC mbere yo kwerekeza muri Rayon Sports abarizwamo kugeza uyu munsi.

Nizeyimana Mirafa avuga ko niba Rayon Sports yarasinyishije Hakizimana Muhadjiri, nta kabuza izatwara igikombe
Nizeyimana Mirafa yabaye umukinnyi w'ukwezi wa Rayon Sports mu Ugushyingo 2019
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza