IGIHE

Minisiteri ya Siporo yasabye Ferwafa gufata ingamba ku bibazo nk’ibya Rayon Sports biha siporo isura mbi

1 17-10-2020 - saa 12:51, Eric Tony Ukurikiyimfura

Umunyamamabanga Uhoraho muri Minisiteri ya Siporo, Shema Maboko Didier, yasabye Ishyirahamwe ry’Umupira w’Amaguru mu Rwanda (Ferwafa) gushyiraho ingamba n’amategeko agena uburyo hakemuka ibibazo n’amakimbirane agaragara mu makipe bitagombereye kubanza guhesha isura mbi uru rwego.

Uyu muyobozi yabivugiye mu nama y’Inteko Rusange y’abanyamuryango bose ba Ferwafa yateranye kuri uyu wa Gatandatu kuri Dove Hotel ku Gisozi.

Mu itangizwa ry’iyi nama, Umunyamamabanga Uhoraho muri Minisiteri ya Siporo, Shema Maboko Didier, yagarutse ku mikoranire n’uruhare rw’uru rwego rwa Leta mu iterambere ry’umupira w’amaguru.

Yasabye Ferwafa ko hashyirwaho ingamba n’amategeko biteganya uko hakemurwa ibibazo n’amakimbirane bigaragara mu makipe kuko hari aho bihesha isura imbi siporo cyangwa bigahagarika ubuzima busanzwe.

Ati “Hari n’amakimbirane cyangwa imicungire mibi bigaragara mu makipe. Ni ikibazo kigaragaza ko habaho kwirengagiza amategeko, sinzi niba kiri kuri gahunda ariko cyakagombye kujyaho nibura kugira ngo ibibazo bigenda bigaragara hanze ugasanga birambika isura mbi siporo, bigire uko bikemurwa.”

“Iyo habayeho ko ibibazo bigeze mu ikipe cyangwa amakimbirane ageze mu ikipe, ni ngombwa ko habaho umurongo w’amategeko w’uburyo byakemuka bitabanje guhagarika ubuzima busanzwe kuko bizadufasha gukosora imiyoborere muri siporo.”

Shema Maboko Didier yatanze urugero kuri Rayon Sports, aho byabaye ngombwa ko abakunzi b’iyi kipe n’ubuyobozi bwari buyiyoboye, bitabaza Perezida Kagame kugira ngo ibibazo by’ubwumvikane bucye byari biyirimo bikemuke.

Ati “Urugero nka Rayon Sports, ibi ntabwo biduhesha isura nziza, ugasanga umuntu yirirwa avugwa kuri radiyo, icyizere abantu bari bamufitiye kirangiritse. Nka Minisiteri ya Siporo turabasaba ko ibi bintu biduhesha isura mbi twabikuraho.”

Urwego rw’Igihugu rw’Imiyoborere (RGB) rwakemuye ibibazo bya Rayon Sports ku bufatanye na Minisiteri ya Siporo, rwavuze ko amakipe yakabaye yitabaza Ferwafa iyahagariye mbere yo kwitabaza izindi nzego mu gukemura ibibazo byayo.

RGB yaragagaje ko kandi gukemura ibibazo bya Rayon Sports, byahumuye indi miryango itari iya Leta irimo amakipe.

Umunyamabanga Uhoraho muri Minisiteri ya Siporo, Shema Maboko Didier, yasabye Ferwafa gushyiraho ingamba z'uburyo ibibazo bigaragaye mu makipe bikemurwa bitanduje isura mbi ya siporo
Perezida wa Ferwafa, Rtd Brig Gen Sekamana Jean Damascène, mu nama y'Inteko Rusange yo kuri uyu wa Gatandatu
Muramira Gregoire uhagarariye Isonga F.A
Perezida wa Kiyovu Sports, Mvukiyehe Juvénal, ni umwe mu bitabiriye iyi Nteko Rusange ku nshuro ya mbere
Umuyobozi wa Gasogi United, KNC, mu Nteko Rusange
Visi Perezida wa APR FC, Maj Gen Mubaraka Muganga mu nama y'Inteko Rusange
Umuyobozi wa AS Kigali, Shema Fabrice
Perezida w’inzibacyuho wa Rayon Sports, Murenzi Abdallah, na we yitabiriye iyi Nteko Rusange
Umunyamabanga Uhoraho muri Minisiteri ya Siporo, Shema Maboko Didier, yitabiriye inama y'Inteko Rusange ya FERWAFA
Dukuzumuremyi Antoine uri mu bagize Komisiyo ishinzwe kugenzura ikoreshwa ry'umutungo wa Ferwafa
Visi Perezida wa Mukura VS, Sakindi Eugène

Amafoto: Uwihanganye Hardi

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza