IGIHE

Kuki FIFA ishaka ko habaho African Super League ariko ikaba idashyigikiye European Super League?

0 20-04-2021 - saa 14:08, Eric Tony Ukurikiyimfura

Mu mwaka ushize, Perezida wa FIFA, Gianni Infantino, yavuze ko hakwiye kujyaho African Super League yajya ikinwa n’amakipe 20 ahoraho, ariko kuri ubu ni umwe mu badashyigikiye ko hajyaho irushanwa rya European Super League ryahuza amakipe 20 akomeye i Burayi.

Infantino yabivuze bwa mbere mu mwiherero wahuje abayobozi batandukanye b’umupira w’amaguru n’impuguke zitandukanye, wabereye Mujyi wa Rabat muri Maroc muri Gashyantare 2020.

Icyo gihe, Perezida wa FIFA, Gianni Infantino, yibanze ku nkingi eshatu zizahurirwaho na FIFA n’Impuzamashyirahamwe y’Umupira w’Amaguru muri Afurika (CAF), arizo “Imisifurire, ishoramari mu mupira n’iterambere ry’amarushanwa”, nk’uko bigaragara mu itangazo ryashyizwe ku rubuga rwa internet rwa FIFA icyo gihe.

Kuri iyi ngingo ya gatatu, Umuyobozi w’umupira w’amaguru ku Isi, yasabye ko hashyirwaho irushanwa rishya rihuza amakipe yo muri Afurika “Super League” rizajya rihuza amakipe 20 ahoraho cyangwa na none hagashyirwaho Igikombe cya Afurika kizajya gikinwa buri myaka ine.

Ibi kandi yabisubiyemo muri uyu mwaka ubwo hari hamaze kuba amatora y’Umuyobozi mushya wa CAF, Dr Patrice Motsepe, tariki ya 12 Werurwe 2021, muri Maroc.

Ubwo yari yagiriye uruzinduko muri Repubulika Iharanira Demokarasi ya Congo mu ntangiriro z’uku kwezi, Infantino yavuze ko "African Super League ishobora kwinjiza miliyoni 200$ (hafi miliyari 200 Frw)".

Kuki FIFA yashyigikira African Super League, ikarwanya European Super League?

Muri Mutarama uyu mwaka, Ishyirahamwe ry’Umupira w’Amaguru ku Isi (FIFA) ku bufatanye n’impuzamashyirahamwe y’uyu mukino ku migabane itandatu, byamaganye ishyirwaho ry’irushanwa rya European Super League ryahurirwamo n’amakipe 20 akomeye i Burayi.

Mu itangazo ryashyizwe hanze n’izi nzego ziyobora umupira w’amaguru ku Isi, zavuze ko “Umukinnyi uzagagara mu irushanwa nk’iri azajya ahagarikwa.”

Impamvu FIFA n’izi mpuzamashyirahamwe byateye utwatsi umushinga w’ishyirwaho rya European Super League ni uko uburyo bwagendeweho mu kwemeza amakipe azakina iri rushanwa butanoze ndetse budashingiye k’uko yaba yitwaye mu kibuga.

Amakipe 12 yamaze kumenyekana yemeye kurikina ni Liverpool, Arsenal, Chelsea, Manchester City, Manchester United, Tottenham, AC Milan, Atlético Madrid, FC Barcelone, Inter Milan, Juventus na Real Madrid.

Benshi banenze ko ari amakipe asanzwe akize yishyize hamwe ndetse yagiye gushaka inyungu nyinshi mu mafaranga azabona nakina iryo rushanwa mu gihe andi asigaye bizayagora kongera kwinjiza amafaranga nk’ayo yabonaga.

African Super League yo yakorwa hashingiwe kuki?

Ni ikibazo gikomeye kandi kugeza ubu cyibazwa! Ubwo hari hamaze kuba amatora ya Perezida mushya wa CAF mu kwezi gushize, Umunyamabanga Mukuru wa Simba SC, Barbara Gonzalez, yashyize ifoto kuri Twitter ari kumwe na Perezida wa FIFA, Gianni Infantino, avuga ko yishimiye ko hagiye gushyirwaho “Super League” ndetse bategereje kureba niba iyi kipe yo muri Tanzania izarikina.

Nubwo hashize umwaka hamenyekanye iki cyifuzo cya Infantino uyobora FIFA, ntibizwi niba iri rushanwa rishya ryaza rije gusimbura CAF Champions League cyangwa niba ryaba ari inyongera.

Mu magambo ya mbere ya Dr Patrice Motsepe ubwo yari amaze gutorerwa kuba Perezida wa CAF mu kwezi gushize, yagize ati "Ndashimira umuvandimwe wanjye Gianni, ku cyerekezo no kudushishikariza ubumwe. Dushobora gukemura ibibazo bya Afurika nituramuka twunze ubumwe."

Mu buryo bumwe, hashobora kubaho kwifata ku buryo hazatoranywamo amakipe 20 azakina iri rushanwa cyane ko amakipe yo mu Majyaruguru ya Afurika agaragara nk’akomeye kurusha ayo mu bindi bice byose by’uyu mugabane ugizwe n’amashyirahamwe y’imikino 56 nyamara nta gihugu gishobora kurenza amakipe abiri muri Super League.

Umupira w’amaguru ntabwo ari wo mukino wonyine ugiye kubamo irushanwa ryihariye rihuza amakipe y’ibigugu muri Afurika, dore ko no muri Basketball, muri Gicurasi, u Rwanda ruzakira irushanwa rya Basketball Africa League (BAL) rizahuza amakipe 12 yahize ayandi.

Gusa, aho habanje gukorwa amajonjora abiri, amakipe 12 azakina iryo rushanwa amenyekana bigaragara ko yabikoreye.

Ikigoye mu mupira w’amaguru ni uburyo hazatoranywa amakipe mu bice byose bya Afurika kandi bizwi neza ko akomeye menshi aherereye mu Majyaruguru.

Umukino wa nyuma wa CAF Champions League ya 2020, wakinwe na Al Ahly na Zamalek, zombi zo mu Mujyi wa Cairo mu Misiri.

Al Ahly yegukanye igikombe cya cyenda muri iri rushanwa itsinze ibitego 2-1 mu gihe Zamalek, yo yaritwaye inshuro eshanu. Mu myaka ine iheruka, imikino ya nyuma y’iri rushanwa yitabiriwe n’amakipe yo mu Misiri, Maroc na Tunisia.

Ibihugu byo muri Afurika yo munsi y’ubutayu bwa Sahara byagize amakipe yageze ku mukino wa nyuma mu myaka 10 ishize ni Afurika y’Epfo na Repubulika Iharanira Demokarasi ya Congo.

Nubwo iyi African Super League yavuga ko buri gihugu gihagararirwa n’ikipe imwe, hari byinshi bitayikina.

Hari n’abibaza umusaruro iyi League yatanga kuko abanyafurika benshi bakunda umupira w’i Burayi. Ni nde wajya kureba Kaiser Chiefs ikina na Wydad Casablanca kandi hari Arsenal na Chelsea ?

Ikindi kibazwa ni uburyo amakipe yakungukira muri iri rushanwa cyane ko amenshi ahombera muri Champions League nk’aho ikipe imwe ishobora gukoresha hafi miliyoni 50 Frw yitegura umukino umwe kandi ikavamo nta cyo ikuyemo.

Perezida wa FIFA, Gianni Infantino, yavuze ko bashyigikiye umupira wa Afurika kugira ngo utere imbere
Perezida wa CAF, Dr Patrice Motsepe, ashyikigiwe na Gianni Infantino uyobora FIFA
Infantino ari mu bagaragaje ko badashyigikiye European Super League nubwo yifuza ko habaho African Super League
Amakipe yo mu Majyaruguru ya Afurika agaragaza ko ntaho ahuriye mu bushobozi n'ayo mu bindi bice by'uyu mugabane
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza