IGIHE

Kiyovu Sports yasuye urwibutso rwa Jenoside rwa Kigali (Amafoto)

0 13-04-2021 - saa 09:24, Eric Tony Ukurikiyimfura

Ku wa Mbere tariki ya 12 Mata 2021, abayobozi, abakinnyi n’abakunzi ba Kiyovu Sports basuye urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane zihashyinguye.

Kiyovu Sports ni imwe mu makipe yashegeshwe cyane na Jenoside yakorewe Abatutsi mu 1994 kuko yabuze abakinnyi, abakunzi, abatoza ndetse n’abayobozi.

Mu rwego rwo kubibuka no gukomeza kwifatanya n’abandi Banyarwanda bose Kwibuka ku nshuro ya 27 Abatutsi basaga miliyoni imwe bishwe muri Jenoside, ikipe ya Kiyovu Sports yasuye urwibutso rwa Kigali ruri ku Gisozi ku wa Mbere tariki ya 12 Mata 2021.

Yari iyobowe na Perezida wayo, Mvukiyehe Juvénal n’abo bakorana muri Komite Nyobozi, abayobora Inama y’Ubutegetsi yayo, abahahagarariye abafana na bamwe mu bakinnyi barangajwe imbere na kapiteni wayo, Kimenyi Yves.

Mvukiyehe Juvénal yavuze ko impamvu basuye urwibutso rwa Jenoside rwa Kigali ari ukugira ngo bahe agaciro Abatutsi bishwe muri Jenoside kandi batange ubutumwa bw’uko aba-sportifs bakwiye guharanira ko ibyabaye bitazasubira.

Ati “Ni igikorwa twifuza guha agaciro kugira ngo abantu nituba turi muri siporo twumve ko tudakwiye kujya mu bindi bikorwa bibi bityo rero muri Kiyovu Sports twifuje kugira ngo tubimburire abandi ba-sportifs bose duhe agaciro abacu bazize Jenoside mu 1994 cyane cyane ko umuryango wa Kiyovu Sports hari aba-sportifs bacu, hari abakinnyi bacu, hari abanyamuryango bacu bishwe muri Jenoside kandi ndetse hari n’abanyamuryango bacu bijanditswe muri ibyo bikorwa bibi muri Jenoside.”

Yakomeje avuga ko iki ari cyo gihe cyo kugira ngo n’abakinnyi b’abanyamahanga bakinira Kiyovu Sports bamenye amateka u Rwanda rwanyuzemo kugira ngo babone ubutumwa baha abo mu bihugu byabo.

Umunya-Nigeria Babuwa Samson umaze umwaka umwe ageze muri Kiyovu Sports ndetse akaba yarashakanye n’Umunyarwandakazi ubwo yakiniraga Sunrise FC, yavuze ko ibyabaye mu Rwanda mu myaka 27 ishize biteye ubwoba, ashimira Perezida Paul Kagame uburyo yafashije u Rwanda gusubira mu mahoro.

Ati “Ibyabaye mu myaka 27 ishize biteye ubwoba. Ndashaka gushimira Perezida Kagame uburyo yaharaniye cyane ko u Rwanda rwongera kugira amahoro, ni ikintu cyiza kuba abantu bose bunze ubumwe aka kanya.”

Bamwe mu bahoze ari abakinnyi n’abatoza ba Kiyovu Sports bishwe muri Jenoside barimo Kanyandekwe Norbert wari uzwi nka Pilote, Rudasingwa Martin bitaga Kunde, Nkusi Octatus bakundaga kwita Moro, Kagabo Innocent, Nyirinkindi Pacifique, Zingiro, Mayere watozaga abana ba Kiyovu Sports na Murenzi Innoncent bakundaga kwita Kukuni.

Ntawakwibagirwa kandi abakunzi bayo bayihozaga ku mutima bakayikunda mu bihe byose ndetse bakayihora inyuma nka: Gashagaza Gaspard, Higiro Innocent, Mukimbiri Eugène, Dominika na Tojo.

Ku wa Mbere tariki ya 12 Mata 2021, abayobozi, abakinnyi n’abakunzi ba Kiyovu Sports basuye urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane zihashyinguye
Umunya-Nigeria Babuwa Samson yavuze ko ibyabaye mu Rwanda mu myaka 27 ishize bidakwiye gusubira
Kiyovu Sports yasuye urwibutso rwa Jenoside rwa Kigali ku wa Mbere
Banamwana Camarade na Kalisa François bakora nk'abatoza bungirije muri Kiyovu Sports

Abahagarariye abandi muri Kiyovu Sports bashyira indabo ku mva zishyinguwemo inzirakarengane zisaga ibihumbi 250 ku Gisozi
Abatoza bungirije; Banamwana Camarade (imbere hagati), Kalisa (inyuma hagati) bari kumwe na Deo utoza abana ndetse na Minani Hemedi ukuriye abafana ( ubanza ibumoso)
Myugariro wa Kiyovu Sports, Irambona Eric, Jenoside yabaye afite umwaka umwe n'amezi make
Minani Hemedi uyobora abafana ba Kiyovu Sports
Umunyamabanga Mukuru wa Kiyovu Sports, Munyengabe Omar
Team Manager wa Kiyovu Sports, Kingundu Baba asoma amateka ya Jenoside mu rwibutso
Kimenyi Yves areba amafoto y'abazize uko baremwe
Kapiteni wa Kiyovu Sports, Kimenyi Yves
Muzehe Gaston yerekana abavandimwe be bishwe muri Jenoside
Perezida wa Kiyovu Sports, Mvukiyehe Juvénal, asinya mu gitabo cy'abasuye urwibutso rwa Kigali
Shaban Mohammed ushinzwe ubukangurambaga muri Kiyovu Sports
Uwari uhagarariye Ibuka mu Karere ka Nyarugenge

Amafoto: Kiyovu Sports

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza