IGIHE

Gasogi United yatangiye umwiherero n’abakinnyi 18 (Amafoto)

0 17-10-2020 - saa 11:24, Eric Tony Ukurikiyimfura

Abakinnyi n’abatoza ba Gasogi United batangiye umwiherero mu Karere ka Bugesera mu rwego rwo kwitegura umwaka mushya w’imikino wa 2020/21 uzatangira tariki ya 4 Ukuboza.

Ku wa Gatanu nibwo Gasogi United yerekeje mu mwiherero hamwe n’abakinnyi 18, ni nyuma y’uko abakozi bayo bapimishijwe COVID-19 ku wa Gatatu.

Mu bakinnyi batandatu batajyanye n’abandi harimo Abanye-Congo Bola Lobota Emmanuel na Hervé Beya Beya, Umunya-Liberia Herron Berrian Scarla n’Umurundi Ndikumana Trésor, bose bakiri mu bihugu byabo.

Iradukunda Jean Bertrand n’umutoza wungirije, Kirasa Alain, bombi bari mu ikipe y’Igihugu mu gihe umunyezamu wa gatatu, Mfashingabo Didier, ari mu mwiherero w’ikipe ya Etoile de l’Est azabanza gusozamo umwaka w’imikino wa 2019/20 mu Cyiciro cya Kabiri.

Umutoza mushya wa Gasogi United, Cassa Mbungo André, yabanje kuganira n’abakinnyi abaha gahunda bazagendera mu mwiherero.

Umuyobozi w’iyi kipe, Kakooza Nkuriza Charles (KNC), aherutse gutangaza ko muri uyu mwaka mushya w’imikino bazaba bahataniye igikombe.

Ati “Ubundi ni nde wababeshye ko igikombe ari icya APR FC na Rayon Sports mbere [Shampiyona] y’uko iba? Ari ibyo twebwe ntabwo twaza gukina, twabireka mukajya mugiha abo mwakigeneye.”

“Ibi rero ni ubutumwa, nibihangane. Njye nababwiye ko nibiba ngombwa iki gikombe tuzakivanaho indiba, batware ikidafite indiba.”

Gasogi United yabaye iya cyenda mu mwaka wa mbere ikina Shampiyona y’Icyiciro cya Mbere.

Gasogi United yagiye mu mwiherero ku wa Gatanu
Umunyezamu Cuzuzo Gaël asohoka mu modoka
Gasogi United yatangiye kwitegura Shampiyona izatangira tariki ya 4 Ukuboza
Kapiteni wa Gasogi United, Kazindu Bahati Guy, ubwo bageraga mu mwiherero mu Bugesera
Rugangazi Prosper yambaye agapfukamunwa kagaragaza nimero 21 yambara mu kibuga
Rutahizamu w'Umurundi, Iddy Museremu, ni umwe mu bakinnyi bashya baguzwe muri Gasogi United
Abakinnyi n'abatoza bakoze inama ku wa Gatanu
Umutoza Cassa Mbungo André aganiriza abakinnyi

Amafoto: Gasogi United

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza