IGIHE

Barça yegukanye Copa del Rey, Chelsea ibuza Guardiola gukora amateka, Sheffield iramanuka… avugwa mu mikino i Burayi

0 18-04-2021 - saa 12:20, Eric Tony Ukurikiyimfura

FC Barcelone yegukanye igikombe cya mbere mu myaka ibiri nyuma yo guterura icya Copa del Rey ubwo yatsindaga Athletic Bilbao ibitego 4-0 ku mukino wa nyuma wabaye ku wa Gatandatu.

Lionel Messi uri gusatira impera z’amasezerano ye muri FC Barceone, yatsinze ibitego bibiri muri bine byabonetse mu minota 12 gusa.

Byasabye FC Barcelone gutegereza umunota wa 60 ubwo Antoine Griezmann yafunguraga amazamu ku mupira wahinduwe na Frenkie de Jong ndetse uyu Muholandi, atsinde icya kabiri nyuma y’iminota itatu.

Ku munota wa 68, Messi yakinanye neza na Frenkie de Jong wamuhereje umupira wa nyuma agatsinda igitego cya gatatu, mbere yo gutsinda icya kane ku wa 72, aherejwe na Jordi Alba.

Iki gikombe ni cyo cya mbere umutoza Ronald Koeman yegukanye mu gihe kandi ari icya mbere iyi kipe yatwaye kuva mu 2019.

FC Barcelone iracyafite amahirwe ku gikombe cya Shampiyona igomba guhanganira na Atlético Madrid ndetse na Real Madrid ziyirusha amanota abiri na rimwe mu gihe hasigaye imikino umunani.

Ku ruhande rwa Athletic Bilbao, ni umukino wa nyuma wa kabiri wa Copa del Rey yatsinzwe mu cyumweru kimwe, ni nyuma y’uko tariki ya 3 Mata, yari yatsinzwe na Real Sociedad mu wa 2020 wari warasubitswe.

Abakinnyi ba FC Barcelone bishimira igitego cya gatatu cyatsinzwe na Lionel Messi
Kapiteni wa FC Barcelone, Lionel Messi, ashyikirizwa igikombe cya Copa del Rey
FC Barcelone yegukanye igikombe cya mbere mu myaka ibiri

=====================================================

Chelsea yabujije Manchester City kwegukana ibikombe bine uyu mwaka

Ibifashijwemo n’igitego cya Hakim Ziyech, Chelsea yashyize iherezo ku cyizere cya Manchester City yifuzaga gukora amateka yo kwegukana ibikombe bine muri uyu mwaka w’imikino wa 2020/21.

Chelsea yatsinze Manchester City igitego 1-0, iyisezerera muri ½ cya FA Cup cyakiniwe kuri Stade Wembley ku wa Gatandatu.

Amakipe yombi yageze muri ½ cya UEFA Champions League, ariko Manchester City itozwa na Pep Guardiola, ifite amahirwe yo kwegukana Premier League na League Cup izahuramo na Tottenham ku mukino wa nyuma uzaba tariki ya 25 Mata.

Nubwo yari yangiwe igitego yabanje gutsindwa hakagaragazwa ko yaraririye, Hakim Ziyech yatsindiye Chelsea ku mupira wavuye kuri Timo Werner ku munota wa 55.

Gutsinda byatumye Chelsea igera ku mukino wa nyuma wa FA Cup, aho izahura n’ikipe ikomeza hagati ya Southampton na Leicester City, zo zisobanura kuri iki Cyumweru i Wembley.

Hakim Ziyech na Timo Werner bishimira igitego
Chelsea yageze ku mukino wa nyuma wa FA Cup itsinze Manchester City

=====================================================

Sheffield United yasubiye mu Cyiciro cya Kabiri (Championship)

Gutsindwa na Wolves igitego 1-0 cya Willian José mu mukino wabaye mu ijoro ryo ku wa Gatandatu, byatumye Sheffield United isubira mu Cyiciro cya Kabiri mu Bwongereza.

Mu mikino 32 ya Premier League imaze gukina, Sheffield United ifite amanota 14 kandi irushwa 19 na Burnley na Brighton ziri ku mwanya wa 16 n’uwa 17 mu gihe hasigaye imikino itandatu y’amanota 18.

Iyi kipe yabaye iya mbere imanutse muri eshatu zizava muri Premier League muri uyu mwaka w’imikino. Fulham yakirwa na Arsenal kuri iki Cyumweru ndetse na West Bromwich, zombi zirasabwa kwitwara neza mu mikino isigaye kugira ngo zirinde ko zamanukana nayo.

Ku rundi ruhande, Norwich City ni yo kipe yamaze kumenyekana izazamuka muri Premier League mu mwaka utaha w’imikino, ikaba yabigezeho ku wa Gatandatu nyuma y’umwaka umwe imanutse.

Sheffield United yasubiye mu Cyiciro cya Kabiri nyuma yo gutsindwa umukino wa 26 muri 32 imaze gukina

=====================================================

Hansi Flick yasabye kuva muri Bayern Munich

Umutoza mukuru wa Bayern Munich, Hansi Flick, yavuze ko yabwiye iyi kipe ko ashaka kuyivamo ku mpera z’uyu mwaka w’imikino.

Flick usanganywe amasezerano azageza muri Kamena 2023, yabivuze nyuma y’umukino ikipe ye yatsinzemo Wolfsburg ibitego 3-2 ku wa Gatandatu, igashyiramo ikinyuranyo cy’amanota arindwi iri ku mwanya wa mbere.

Uyu mugabo w’imyaka 56 wabanje kuba umutoza wungirije, yagizwe umutoza mukuru wa Bayern Munich mu Ugushyingo 2019 ndetse yegukanye Bundesliga na UEFA Champions League mu mwaka wa mbere.

Kuri ubu, bivugwa ko yifuzwa mu ikipe y’Igihugu y’u Budage kugira ngo azajye gusimbura Joachim Low uzasezera nyuma y’imikino ya nyuma y’Igikombe cy’u Burayi izaba mu mpeshyi.

Gusa, mu kiganiro yagiranye na Televiziyo y’u Budage, Hansi Flick yabiteye utwatsi, avuga ko nta biganiro birabaho.

Ati “Ahazaza ntabwo haramenyekana neza. Nta biganiro birabaho bijyanye n’ibyo.”

Flick yageze muri Bayern Munich agiye kungiriza Niko Kovac mu 2019, ayisigarana nk’uw’agateganyo ubwo uyu munya-Croatia yari amaze kwirukanwa.

Mu mezi 16 amaze ayitoza, yatwayemo ibikombe bitandatu birimo n’Igikombe cy’Isi cy’Amakipe cyakinwe muri Gashyantare uyu mwaka nubwo aheruka gusezererwa na Paris Saint-Germain muri UEFA Champions League.

Umutoza Hansi Flick yasabye kuva muri Bayern Munich ku mpera z'uyu mwaka w'imikino
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza