IGIHE

Arsenal na Manchester United mu makipe yageze muri ½ cya Europa League (Amafoto)

0 16-04-2021 - saa 08:18, Eric Tony Ukurikiyimfura

Arsenal yitwaye neza ku kibuga cya SK Slavia Prague, iyihatsindira ibitego 4-0 byayifashije kuyisezerera muri ¼ cya Europa League ku bitego 4-1, isanga Villarreal muri ½ mu gihe undi mukino uzahuza Manchester United na AS Roma tariki ya 29 Mata n’iya 6 Gicurasi 2021.

Ikipe y’Umutoza Mikel Arteta nta kosa yagombaga gukorera muri Repubulika ya Tchèque nyuma y’uko yari yanganyirije igitego 1-1 mu rugo mu mukino ubanza wabaye mu cyumweru gishize.

Iminota 24 yari ihagije ngo igarurire icyizere abakunzi bayo ndetse yizere kongera kugera muri ½ nk’uko yabikoze mu 2019 ubwo yakinaga umukino wa nyuma.

Nyuma y’igitego cyatsinzwe na Emile Smith Rowe ku munota wa 14, ariko ikoranabuhanga ryifashishwa mu misifurire [VAR] rikemeza ko habayeho kurarira, Nicolas Pépé yafunguye amazamu nyuma y’iminota ane, aherejwe na Smith Rowe.

Arsenal yari ku rwego rwo hejuru mu ijoro ryo ku wa Kane, yatsinze igitego cya kabiri kuri penaliti yinjijwe na Alexandre Lacazette wari wahawe igitambaro cya kapiteni nyuma y’uko Aubameyang arwaye malaria. Aha, hari ku ikosa ryakorewe kuri Bukayo Saka ku munota wa 21.

Nyuma y’iminota itatu, Bukayo Saka yatsinze igitego cyiza ku mupira yahawe na Calum Chambers, ageze ku murongo w’urubuga rw’amahina atera ishoti rikomeye ryaruhukiye mu izamu.

Nubwo Slavia Prague yagerageje gusatira cyane mu gice cya kabiri, byarangiye Arsenal ibonye igitego cya kane ku munota wa 77, cyinjijwe na Alexandre Lacazette waherejwe na Nicolas Pépé.

Gutsinda uyu mukino byafashije Arsenal gukomeza ku bitego 4-1 ndetse izahura na Villarreal itozwa na Unai Emery watoje Abarashi, yo yakuyemo Dinamo Zagreb nyuma yo kuyitsinda ibitego 2-1 bikaba ibitego 3-1 mu mikino ibiri.

Manchester United yongeye gutsinda Granada FC ibitego 2-0 bya Edinson Cavani na Jesus Vallejo witsinze, iyisezerera ku bitego 4-0 ndetse izahura na AS Roma yasezereye Ajax ku bitego 3-2 nyuma yo kunganya igitego 1-1.

Imikino ibanza izaba tariki ya 29 Mata mu gihe iyo kwishyura izaba tariki ya 6 Gicurasi 2021. Manchester United na Villarreal ni zo zizabanza kwakira imikino ibanza.

Emile Smith Rowe yatsinze igitego cyanzwe mu minota ya mbere
Nicolas Pépé yafunguye amazamu ku munota wa 18 aherejwe na Smith Rowe
Pépé areba umupira we ujya mu izamu nyuma yo kuwutanga umunyezamu
Alexandre Lacazette yatsinze igitego cya kabiri kuri penaliti
Lacazette wari wasimbuye Aubameyang urwaye malaria, nka kapiteni, yishimira igitego
Pepe na Ceballos bishimira igitego hamwe na Lacazette
Bukayo Saka yashimangiye intsinzi ya Arsenal ku munota wa 24, ku ishoti yatereye ku murongo w'urubuga rw'amahina
Bukayo Saka yishimira igitego cyiza yatsinze
Umutoza Mikel Arteta avugana n'umusifuzi wa kane kuri uyu mukino
Alexandre Lacazette yatsinze igitego cya kane mu gice cya kabiri
Arsenal yakomeje muri 1/2, aho izahura na Villarreal y'umutoza Unai Emery wayitoje
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza