IGIHE

Amwe mu makipe yikuye muri European Super League n’abayobozi bamwe baregura

0 20-04-2021 - saa 23:19, Eric Tony Ukurikiyimfura

Nyuma y’iminsi ibiri gusa hatangajwe irushanwa rishya rya European Super League, Manchester City na Chelsea ziravugwa mu makipe yamaze kuryikuramo nubwo zari muri 12 yari yemeye kurikina mu gihe abayobozi barimo uwa Manchester United, Ed Woodward, batangiye gutekereza kwegura.

Ku Cyumweru tariki ya 18 Mata 2021 ni bwo amakipe 12 arimo atandatu akomeye mu Bwongereza, atatu yo mu Butaliyani n’andi atatu yo muri Espagne, yatangaje ko yemeye kujya mu irushanwa rishya rya European Super League.

Ayo ni Liverpool, Arsenal, Chelsea, Manchester City, Manchester United, Tottenham, AC Milan, Atlético Madrid, FC Barcelone, Inter Milan, Juventus na Real Madrid.

Iri rushanwa n’amakipe yemeye kurikina, byamaganiwe kure n’abakunzi b’umupira w’amaguru mu bice bitandukanye by’Isi ndetse n’abayobozi barimo Minisitiri w’Intebe w’u Bwongereza, Boris Johnson, wavuze ko bazakora ibishoboka ngo barihagarike.

Nyuma y’uko ritangajwe, Florentino Pérez usanzwe ari Perezida wa Real Madrid ndetse akaba ari we wagizwe Umuyobozi waryo, yavuze ko “Rije gucungura umupira w’amaguru.”

Yavuze ko kandi “Amakipe yose yemeje kurijyamo yasinye amasezerano“ ku buryo bizeye ko rizaba.

Gusa, nyuma y’amasaha 48, birasa n’aho iri rushanwa ritakibaye kuko kuri uyu wa Kabiri, amakipe amwe yagaragaje ko ashobora kuryikuramo.

Manchester City yemeje ko yamaze kwikura muri iri rushanwa mu gihe na Chelsea iri mu nzira zo kubishyira ku ruhande.

Ubwo Forentino Pérez yari abajijwe n’ikinyamakuru L’Equipe niba kugenda kw’ayo makipe abiri bidasobanuye isenyuka rya Super League, yagize ati “Oya”.

Yongeyeho ko afite icyizere cy’uko amakipe ya Paris Saint Germain na Bayern Munich [kuri ubu yabyanze], azageraho akabiyungaho.

Ku rundi ruhande, abayobozi b’amakipe yemeye kujya muri iri rushanwa bari ku gitutu gikomeye ndetse bamwe batangiye gutekereza uburyo basezera.

Ugarukwaho cyane ni Ed Woodward wari umaze imyaka umunani ayobora Manchester United, ariko bikaba byatangajwe n’iyi kipe ko azasezera ku mpera z’uyu mwaka wa 2021.

Amakuru avuga ko uyu mugabo w’imyaka 49, yari asanzwe afite gahunda yo kwegura ku mirimo ye, ariko nyuma y’uko uyu mushinga ibyawo bisa n’ibijemo kidobya, icyemezo cye gishobora gushyirwa mu bikorwa hakiri kare.

Perezida w’Impuzamashyirahamwe y’Umupira w’Amaguru i Burayi (UEFA), Aleksander Čeferin, aherutse kuvuga ko “Woodward yari ashyigikiye gahunda yo kuvugurura Champions League” ni mu gihe umwe muri ba nyiri Manchester United, Joel Glazer, azaba umwe mu bayobozi bungirije ba European Super League.

Undi bivugwa ko yaba yeguye ni Andrea Agnelli uyobora Juventus ndetse akaba yaragizwe umwe mu bayobozi bungirije ba Super League, ariko iyi kipe yo mu Butaliyani yanyomoje ayo makuru.

Agnelli wayoboraga Ishyirahamwe ry’amakipe akomeye i Burayi (ECA) akegura ubwo hatangazwaga Super League, yashinjwe ubugambanyi n’abayobozi ba UEFA dore ko ari we wari ku mutwe wo kuvugurura uburyo Champions League ikinwamo, ikajya yitabirwa n’amakipe 36.

Izindi nkuru wasoma:

Abafana n'abandi bantu batandukanye bakomeje kwamagana irushanwa rishya rya European Super League
Florentino Pérez uyobora European Super League yavuze ko adahangayikishijwe no kugenda kw'amwe mu makipe
Ed Woodward umaze imyaka umunani ayobora Manchester United yamaze kumenyesha ba nyir'ikipe ko azasezera muri uyu mwaka
Andrea Agnelli uyobora Juventus yafashwe nk'umugambanyi nyuma yo kwegura ku buyobozi bw’Ihuriro ry’Amakipe y’i Burayi (ECA)
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza