IGIHE

Jean-Claude Hérault wabaye Umuyobozi w’amasiganwa ya Tour du Rwanda yitabye Imana

1 15-04-2021 - saa 14:04, Eric Tony Ukurikiyimfura

Umufaransa Jean-Claude Hérault wabaye Umuyobozi w’Amasiganwa ya Tour du Rwanda kuva mu 2010 kugeza mu 2018, yitabye Imana kuri uyu wa Kane afite imyaka 78.

Ikinyamakuru L’Equipe cyo mu Bufaransa, cyanditse ko uyu mugabo yazize COVID-19.

Jean-Claude Hérault ufatwa nk’umwe mu bagize uruhare rukomeye mu iterambere ry’umukino w’Amagare muri Afurika, yabaye Umuyobozi w’Amasiganwa ya Tour du Rwanda hagati ya 2010 na 2018.

Ishyirahamwe ry’Umukino w’Amagare mu Rwanda (FERWACY) ryamwifurije kuruhukira mu mahoro.

Bayingana Aimable wayoboye FERWACY imyaka 11 kugeza mu 2019, yavuze ko yababajwe n’urupfu rw’uyu mugabo wagize uruhare mu iterambere rya Tour du Rwanda mpuzamahanga.

Ati “Nababajwe cyane no kumenya urupfu rwa Jean-Claude Hérault. Yagize uruhare mu iterambere rya Tour du Rwanda mpuzamahanga kuva 2010 haba ku ruhande rwa tekiniki ndetse no ku ruhande rwo kuyimenyekanisha tubikesha ubunararibonye abifitemo. Ndihanganisha umuryango we. Aruhukire mu mahoro.”

Jean-Claude Hérault yakoze kandi mu bijyanye no gushakira amasoko isiganwa rya Tour de France mu myaka ya 1980, nyuma akorana na Jean-Marie Leblanc mu myaka ya 1990 mu gihe yatangiye kujya mu bya tekiniki mu myaka ya 2000 ndetse akaba yarabaye umuyobozi wungirije w’iri siganwa rifatwa nk’irikomeye ku Isi.

Afatanyije na ASO, Jean-Claude Hérault yagize uruhare mu itangizwa ry’amasiganwa atandukanye muri Afurika nka Tour du Faso mu 2001 mu gihe hamwe na Philippe Crépel batangije La Tropicale Amissa Bongo muri Gabon na Tour International de la Paix muri Côte d’Ivoire.

Jean-Claude Hérault wabaye Umuyobozi w’amasiganwa ya Tour du Rwanda yitabye Imana
Umufaransa Jean-Claude Hérault yayoboye amasiganwa ya Tour du Rwanda hagati ya 2010 na 2018
Hérault asoma igitabo cy'amasiganwa ya Tour du Rwanda
Jean-Claude Hérault wari ufite imyaka 78, yitabye Imana azize COVID-19
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza