IGIHE

Facebook imaze gufunga konti miliyari 5.4 muri uyu mwaka

0 14-11-2019 - saa 10:53, IGIHE

Facebook, Inc. yatangaje ko muri uyu mwaka imaze gufunga konti miliyari 5.4 za baringa, nubwo hakiri umubare munini ukiri mbubuga nkoranyambaga zayo.

Ni umubare wazamutse cyane ugereranyije na miliyari 3.3 za konti za baringa zasibwe mu mwaka ushize wose, mu gihe uyu utaranarangira.

Bibarwa ko nibura mu bagera kuri miliyari 2.5 bakoresha Facebook, buri kwezi haba harimo 5% bakoresha konti za baringa, nubwo iki kigo cyatangiye gukoresha ikoranabuhanga rifasha mu gutahura bene izo konti zigifungurwa.

Ni igikorwa kigaragaza imbogamizi urwo rubuga rufite nko muri Leta Zunze Ubumwe za Amerika hateganyijwe amatora ya perezida mu mwaka utaha. Ni ibintu abahanga bahamya ko bishobora kuzaha urwaho ikwirakwizwa ry’impuha zishobora kuyobya cyangwa zikagira uruhare mu kugena ibiva mu matora, nk’uko byagenze mu 2016.

Umuyobozi Mukuru wa Facebook, Mark Zuckerberg, yabwiye abanyamakuru kuri uyu wa Gatatu ko umubare munini wa konti zasibwe ugaragaza uburyo iki kigo cyahaye umwihariko icyo kibazo.

Ati "Kubera ko umubare ari munini ntabwo bivuze ko hari ya makuru abangamye ku bwinshi. Ahubwo bivuze ko turimo gukora ibishoboka byose ngo dutahure ayo makuru, niyo mpamvu umubare [wa konti zasibwe] wabaye munini.”

Iyi niyo raporo ishyira ibintu mu mucyo igiye hanze irimo n’amakuru avuga kuri Instagram. Ivuga ko hagati ya Mata na Nzeri, Facebook yasibye ubutumwa miliyoni eshatu bwarenze ku mabwiriza abuza ubutumwa bujyanye no gucuruza ibiyobyabwenge. Hari kandi ubutumwa 95000 bwajyanaga n’icuruzwa ry’imbunda.

Kuri Facebook hasibwe ubutumwa miliyoni zirindwi bwabibaga urwango hagati ya Nyakanga na Nzeri, aho bwiyongereye kuri 60% ugereranyije n’ubwatahuwe hagati ya Mata na Kamena.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza