IGIHE

Ibyo Google yemeye gufasha u Rwanda mu kubaka urwego rwarwo rw’ikoranabuhanga

0 18-11-2021 - saa 10:21, Philbert Girinema

Google yatangaje ko igiye gufatanya na Guverinoma y’u Rwanda binyuze muri Minisiteri y’Ikoranabuhanga na Inovasiyo mu bikorwa bigamije guteza imbere ikoranabuhanga mu gihugu.

Ubu bufatanye hagati y’impande zombi bugamije gufasha u Rwanda kubaka ubukungu bushingiye ku ikoranabuhanga no guhanga udushya.

Ingingo enye zizibandwaho muri iyo mikoranire harimo ukugeza ibikoresho by’ikoranabuhanga hirya no hino mu gihugu bikazageza n’aho Google ifasha u Rwanda mu gukomeza kubaka uburyo bwo kwishyurana hakoreshejwe ikoranabuhanga.

Binyuze muri ubwo bufatanye, Google yemeye ko igiye gutanga amahugurwa ku Banyarwanda 500 b’abahanga mu ikoranabuhanga ikazanashyiraho uburyo bwo gufasha ibigo bito bitanga serivisi z’ikoranabuhanga.

Ku ikubitiro ibizahabwa amahugurwa ni ibigo 15, akazatangwa binyuze mu mushinga wa Kigali Innovation City n’ubundi ugamije guteza imbere ikoranabuhanga no guhanga udushya.

Kigali Innovation City ni umushinga ugamije kurerera u Rwanda n’Isi abahanga mu bumenyi n’ikoranabuhanga. Impuguke zigaragaza ko mu bigo bikomeye byo ku Isi mu bijyanye n’ikoranabuhanga nibura 2% aribo bahanga iterambere ryabyo riba rishingiyeho, ari nabo bategura imishinga y’ibitangaza nyuma y’iminsi igakwira Isi twese tuyoboka.

Kigali Innovation City igamije kubaka ubushobozi bw’abantu nk’abo, intumbero y’u Rwanda ikaba ko rubasha kuzamura umubare w’abahanga bakaba bakava kuri 2% bakaba 10%.

Google izagira kandi uruhare mu kwihutisha ikoranabuhanga mu bucuruzi, aho nibura ibigo bito n’ibiciriritse 3000 bizafashwa kuyoboka inzira y’ikoranabuhanga.

Abakozi 1000 bashinzwe ibijyanye n’ikoranabuhanga bazajya bakurikirana iyi gahunda nabo bazitabwaho binyuze muri ubu bufatanye.

Mu bindi Google izafasha u Rwanda, ni ibijyanye no kuranga amerekezo yarwo hifashishijwe ikoranabuhanga rya Google Map ku buryo ibice byose byo mu mijyi bizaba byoroshye kubibona.

Google Map ni urubuga rwa internet rufasha umuntu kubona amerekezo y’ahantu runaka hifashishijwe Satellite. Iryo koranabuhanga iyo rimaze kunozwa neza, rishobora kwereka umuntu ko nko mu muhanda runaka harimo imodoka nyinshi ku buryo yakwirinda kuwunyuramo.

Mu 2020, byabarwaga ko Google Map ikoreshwa n’abantu barenga miliyari ku Isi buri mwaka.

Ibice biranga umuco w’u Rwanda, Google izagira uruhare mu gutuma bikoreshwa n’ikoranabuhanga, ku buryo inkuru zibivugaho zose ziba zibisobanura zinyuze mu ikoranabuhanga bitandukanye n’uko ubusanzwe habagaho umuntu uba usobanura ayo mateka. Ibi bizakorwa ku bufatanye n’Ingoro Ndangamurage y’u Rwanda.

Umuyobozi ushinzwe Ibikorwa bya Google mu Karere ka Afurika y’Iburasirazuba, Agnes Gathaiya, yatangaje ko iyo mikoranire n’u Rwanda ari intambwe ishimishije nyuma y’aho Umuyobozi wa Google, Sundar Pichai, yiyemeje gufasha ibikorwa by’ikoranabuhanga muri Afurika.

Ati “Tuzagira uruhare mu kubaka u Rwanda rukoresha ikoranabuhanga.”

Minisitiri w’Ikoranabuhanga na Inovasiyo, Ingabire Paula, yavuze ko u Rwanda rwishimiye ubu bufatanye kuko buzarufasha gukomeza intego yarwo yo kubaka ubukungu bushingiye ku ikoranabuhanga.

U Rwanda ni igihugu gikomeje kubaka ubukungu bushingiye ku ikoranabuhanga. Ubu internet mu gihugu iri ku kigero cya 95% mu gihe abayikoresha bangana na 62%.

Ku rundi ruhande, abaturarwanda bakoresha telefoni bari miliyoni 10 mu ntangiriro za 2020 gusa miliyoni 1,6 ni bo bakoreshaga izigezweho ari nayo mpamvu hashyizweho gahunda ya Connect Rwanda igamije kuzikwirakwiza mu gihugu.

U Rwanda rwihaye intego ko mu 2024, urubyiruko rwose ruri hagati y’imyaka 16 na 34 ruzaba ruzi neza gukoresha ikoranabuhanga mu gihe mu baturage bose abarikoresha kandi neza bazaba bangana na 60%.

Umuyobozi ushinzwe Ibikorwa bya Google mu Karere ka Afurika y’Iburasirazuba, Agnes Gathaiya, yatangaje ko bishimiye gukorana n'u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza