IGIHE

Imyambaro ya Tanga Designs ikomeje kurikoroza

0 13-10-2021 - saa 08:43, Uwiduhaye Theos

Gikundiro Joyeuse washinze inzu ihanga imyambaro yise Koni Clothing yashinje mugenzi we Niyitanga Olivier washinze inzu ihanga imideli ya Tanga Designs, kumukopera ishusho y’imyambaro aheruka kuvuga ko Dolce & Gabbana yamwiganye.

Iyi myambaro Gikundiro avuga ko yakopewe ni iyo Tanga Designs yashyize hanze muri Nzeri 2020 yise ‘Inyambo Collection’ ifite ishusho imeze nk’amababa y’ibinyugunyugu mu ntugu.

Yabwiye IGIHE ko yagakwiriye guhabwa agaciro nka nyir’igitekerezo.

Ati “Nari nakoze ikanzu y’ubwoko bumwe imeze gutya. Nari nayikoze nshaka guha agaciro abahanga imyambaro mu Rwanda. Nabonye yatangiye kwataka Dolce & Gabban ndavuga nti ni gute atajya atekereza ku guha agaciro ibintu byatumye ahanga, akaba yishyizemo abandi avuga ko ari abajura.”

Uyu mukobwa avuga ko yashyize hanze imyambaro ye muri Kanama 2020, mu gihe mugenzi we yabikoze muri Nzeri 2020.

Niyitanga we avuga ko uyu mukobwa amubeshyera kuko atanamuzi ahubwo ajya abona yirirwa amukurikira agakurikirana ibintu byose yashyize hanze cyangwa ibyo yitegura gukoraho.

Ati “Uwo mukobwa arambeshyera ntabwo ibyo avuga aribyo kuko imyambaro avuga ko namukopeye natangiye umushinga wayo muri Nyakanga umwaka ushize ndetse ntangira kugaragaza ko hari umushinga ndi gukoraho w’imyenda izaba ifite imisusire nk’iy’amababa y’ikinyugunyugu cyangwa se amatwi y’inzovu. Ari mu bantu bakunze kunkurikira ahubwo niwe wanshishuye.”

Uyu musore anavuga ko kubera uko mukobwa amukurikira cyane kandi ashobora kuba akunda ibyo akora bitamutangaza yisanze asigaye akora ibintu nk’ibye.

Ati “Ntabwo namurenganya kuko arankurikira cyane kandi biragaragara ko ari mu bafana banjye ntibyantangaza rero yisanze yakoze ibintu nk’ibyanjye.”

Avuga ko abantu benshi bamuzi basanzwe bari ko afite umwihariko wo gukora imyambaro cyane amakanzu afite ibitugu binini, ku buryo umwambaro nk’uwo yakoze atari igitangaza.

Ikindi avuga kigaragaza ko abeshyerwa ni uburyo ikanzu ya Koni Clothing bavuga ko yibye uko idoze, ari ibintu baterateranyije bagafata ibitambaro bigaragara ko bitigeze bibafata umwanya munini wo kudoda.

Mu ishize Tanga Designs nawe, yashinje Dolce & Gabbana yo mu Butaliyani kwigana imyambaro ye. Iyi myambaro ya Dolce & Gabbana ni iyo yise ‘DGSS22’ yagenewe abagore n’abakobwa.

Niyitanga avuga ko uyu mukobwa umushinja kumwiba amubeshyera
Iyi ni imyambaro Dolce & Gabbana iheruka gushyira hanze
Tanga Designs yijunditse Dolce & Gabbana ayishinja kwigana imyambaro ye
Gikundiro yashinje mugenzi we kumwiba iyi myambaro
Gikundiro ashinja Niyitanga kwigana imyenda ye
Gikundiro avuga ko uko iyi myambaro ishushe yabishishuwe na Tanga Designs
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza