IGIHE

U Rwanda rwitabiriye ku nshuro ya kane Imurikagurisha Mpuzamahanga ry’indabo mu Buholandi (Amafoto)

0 7-11-2019 - saa 21:27, Karirima A. Ngarambe

Ibigo by’abikorera bashoye amafaranga mu buhinzi bw’indabo zitandukanye bikorera mu Rwanda byagaragaje ibikorwa byabyo mu imurikagurisha mpuzamahanga ry’indabo [International Floriculture Trade Fair-IFTF2019] riri kubera mu Buholandi.

U Rwanda ruhagarariwe n’ibigo birimo “Bella Flowers” ihagarariwe na Muganga Walter, Victor Omuga na Bloom Hills Rwanda Ltd ihagarariwe na Shungo Harada ari nawe uyiyobora.

Iri murikagurisha ry’iminsi itatu u Rwanda rwitabiriye ku nshuro ya kane riri kubera mu Mujyi wa Fijvehuizen hafi y’uwa Amsterdam, aho ryatangiriye ku wa 6 Ugushyingo mu gihe rizashyirwaho akadomo ku wa 8 Ugushyingo 2019.

Ibigo byaryitabiriye byafashijwe n’ Ikigo cy’Igihugu gishinzwe kohereza mu mahanga ibikomoka ku Buhinzi n’Ubworozi mu Rwanda (NAEB) na Ambasade y’u Rwanda mu Buholandi.

Mu kiganiro IGIHE yagiranye na Ambasaderi w’u Rwanda mu Buholandi, Jean Pierre Karabaranga, yavuze ko iri murikagurisha ari amahirwe yo gukomeza kwerekana umwihariko w’igihugu mu ruhando rw’amahanga.

Yakomeje ati “Turi hano nk’ikipe y’u Rwanda igizwe na NAEB, Ambasade y’u Rwanda n’abashoye imari mu buhinzi bw’indabo kugira ngo dukomeze twereke amahanga ko dushoboye kuba twabagezaho igihingwa cy’Indabo nziza zituruka mu Rwanda.’’

Yongeyeho ko indabo ari igihingwa cyinjiza amafaranga mu gihugu bityo Abanyarwanda bakwiye kucyitaho bakakimenya ko ku rwego mpuzamahanga cyihagazeho.

Ambasaderi Karabaranga yashimiye ibigo bidahwema kumurika indabo ndetse yizeza ko Leta y’u Rwanda izakomeza kubaba hafi.

Yanishimiye intambwe yatewe mu gukomeza kugikorera ubuvugizi no kwagura nyabyo ibikorwa byose bijyanye n’indabo.

Muganga Walter uhagarariye Bella Flowers yavuze ko intego yatumye bitabira imurikagurisha ari ukurushaho kwagura ibikorwa byabo.

Ati “Turi hano ngo twerekane ko mu Rwanda dufite ubushobozi bwo guhinga indabo zishobora gupiganwa ku masoko mpuzamahanga ku biciro byiza kandi tukinjiza amadovize mu gihugu cyacu.’’

Yavuze ko mu buryo bw’umwihariko muri uyu mwaka bamuritse ubwoko bugera kuri 18 bw’indabo z’amaroza bwose bushobora koherezwa mu mahanga.

Ati “Mu mwaka ushize twari dufite amako 16 gusa kandi turifuza ko umwaka utaha tuzazamura hegitari twahingagaho zigere kuri 45 zivuye kuri 40 twahingaga kuri ubu. Twiyemeje rero kongera ingano kuko tubona ko isoko rihari ryo kohereza indabo mu mahanga.’’

Shungo Harada yavuze ko bakoze ubushakashatsi bahinga indabo zitaboneka henshi ku buryo ubu mu Rwanda zihari kandi zakunzwe.

Ati “Muri iri murikagurisha benshi baza batugana bibaza uko twe tuzibona bikabatangaza, kandi ni indabo zihenda ururabo rumwe rugura nk’ibihumbi 10.000 Frw.’’

Umuyobozi muri NAEB, Cynthia Mata Uwacu, yavuze ko imurikagurisha ry’indabo rifasha gukomeza kongera abaguzi n’abafatanyabikorwa mu buhinzi bwazo.

Ati “Tuzakomeza kubishyiramo imbaraga mu kugira uruhare mu ruhando rw’amahanga mu kwerekana ubwiza bw’indabo zihingwa mu Rwanda kuko ni n’uburyo bwiza bwo gukomeza kwerekana ko natwe ushoboye no gukora ubuvugizi bw’ibikorwa byacu muri rusange.’’

Ubuhinzi bw’indabo ni ishoramari ryunguka kandi rimaze guhabwa agaciro mu Rwanda, kuko rishobora kwinjiza amadovize mu gihugu ndetse n’Abanyarwanda batari bake rikabaha imirimo.

Mu mwaka w’ingengo y’imari wa 2017/18, umusaruro w’indabo u Rwanda rwohereza mu mahanga wanganaga na toni 144.

Muganga Walter aganira n'abasuye indabo z'u Rwanda
Ni ihuriro ry'ibigo by'inshi bituruka mu bihugu bitandukanye n'ibigo by'indege by'ikorera cyangwa bitwara indabo n'abantu
Shunga Harada aganira n'abakozi ba Ambasade y'u Rwanda mu Buholandi
Shungo Harada wa Bloom Hills Rwanda Ltd afata ifoto y'urwibutso n'Abayapani baje gusura ibikorwa bye mu Rwanda
Victor Omuga wa Bella Flowers iri mu bigo bihagaze neza mu bucuruzi bw'indabo mu Rwanda
Amb. Karabaranga na Uwacu Cynthia baganira n'umwe mu banyamahanga wasuye ahari stand y'u Rwanda
Ambasaderi w'u Rwanda, Karabaranga Jean Pierre aganira na Ambasaderi wa Kenya mu Buholandi
Cynthia Uwacu aganira n'abaje gusura Stand y'u Rwanda
Cynthia Uwacu yabwiye umunyamakuru wa IGIHE ko iri murikagurisha ribafasha kurushaho kumenyekanisha ibyo bakora ku ruhando mpuzamahanga
Ambasaderi Karabaranga n'abo bafatanyije gufungura imurikagurisha ry'indabo z'u Rwanda bafashe ifoto y'urwibutso
Uwacu yakira abasuye aho u Rwanda rumurikira ibikorwa byarwo
Abafatanyabikorwa baganirira kuri stand y'u Rwanda mu Imurikagurisha ry'Indabo mu Buholandi
Abasuye aho u Rwanda rwamurikiye indabo banifotoreje ku gihangano gishushanya ingagi zo mu Birunga
Amb. Karabaranga atanga ibisobanuro ku basuye aho ibigo bihagarariye u Rwanda biri kumurikira
Abitabira Imurikagurisha Mpuzamahanga ry’indabo mu Buholandi baba bagenewe aho bafatira icyo kunywa no kurya

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza