IGIHE

Mike Tyson yasabwe kuba Ambasaderi w’urumogi muri Malawi

0 25-11-2021 - saa 09:46, IGIHE

Leta ya Malawi yegereye umunyabigwi mu iteramakofe, Mike Tyson, imusaba kuyibera ambasaderi w’igihingwa cy’urumogi hagamijwe kurushaho gukurura abashoramari.

AFP yanditse ko ubusabe bwa Malawi bwashyikirijwe Tyson mu ntangiriro z’uku kwezi binyuze mu ibaruwa yandikiwe.

Tyson yitezweho kongera ubunararibonye no gufasha mu kugeza ku isoko ibikomoka kuri iki gihingwa cyane ko ari umwe mu banyamuryango b’Ishyirahamwe ryigenga rikorera ubuvugizi igihingwa cy’urumogi muri Amerika ariko ntarasubiza ku busabe yahawe.

Mu 2020 ni bwo Malawi yemeye ko urumogi rukoreshwa mu buvuzi ndetse no mu nganda ariko ikumira abantu kurukoresha ku giti cyabo. Ni icyemezo cyafashwe bishingiye ku kuba ibindi bihugu bya Afurika bikomeza guhanga amaso inyungu ziri muri iki gihingwa.

Abasesenguzi bagaragaza ko abashaka gutuganya iki gihingwa bazitirwa no kubona ibyangombwa bibemerera gukora ubwo bucuruzi ndetse hakaba hakiri abashoramari n’abakiliya bake.

Umuvugizi wa Minisiteri y’Ubuhinzi muri Malawi, Gracian Lungu, yatangaje ko guverinoma y’igihugu cye yizera ko mu gihe Tyson yashyigikira ubucuruzi bwabo bushingiye ku rumogi byatuma abashoramari n’abaguzi babagana.

Yagize ati “Twahuye n’ibibazo ndetse ibikorwa byakomeje kugenda biguru ntege.’’

Tyson watekerejweho mu gufasha Malawi inshuro nyinshi yumvikanye asaba ko ikoreshwa ry’urumogi ryemerwa ndetse mu kwezi gushize yatangije ubucuruzi bwe bwite ‘brand’ bwarwo.

Kuva mu myaka ya kera yari afite inyota yo kubaka ahantu nyaburaga hazajya hatemberera abakunda kwinywera ako ku mugongo w’ingona.

Kuva Leta ya California yakwemeza ko kunywa urumogi atari icyaha mu 2018, Tyson ni umwe mu bagaragaje ko bahabwa amahoro no kurutumura ndetse anarushoramo imari. Afite ikigo cyitwa Tyson Ranch gicuruza ibikomoka ku rumogi.

Amakuru BBC yatangaje yo avuga ko Tyson yasubije ubutumire bwa Malawi ndetse yiteguye gukorana n’iki gihugu yemeye ko agomba gusura.

Ubusabe bwa Malawi bwo kwifashisha Tyson bwakuruye impaka kuko Guverinoma yatangiye gushinjwa kwinjira mu mikoranire n’uwahamijwe ibyaha by’ubusambanyi kandi ivuga ko yashyize imbaraga mu guhangana n’ihohoterwa rikorerwa abagore.

Mu 1992, Tyson w’imyaka 55, yahamijwe icyaha cyo gufata ku ngufu umugore w’imyaka 18. Yakatiwe gufungwa imyaka itandatu muri gereza, amara n’indi ine afungishijwe ijisho. Yafunguwe mu 1995.

Lungu yashimangiye ko abavuga ko imikoranire ya Malawi na Tyson idakwiye bibeshya kuko uyu mugabo yafunguwe kubera imyitwarire myiza yari afite kandi ntiyigeze akora ikindi cyaha.

Michael Gerard Tyson uzwi nka "Iron Mike", "Kid Dynamite" na "The Baddest Man on the Planet", afatwa nk’umukinnyi w’ibihe byose mu iteramakofe mu cyiciro cy’abaterura ibiremereye.

Mu 2019 yigeze gutangaza ko anywa urumogi rufite agaciro k’ibihumbi $40 ku kwezi.

Mu 2000 yaciwe amande y’ibihumbi 200$ nyuma yo kwanga kujya gukorerwa isuzuma ry’ibiyobyabwenge.

Inyigo zimwe na zimwe zerekanye ko kunywa urumogi byongera ibyago byo kurwara indwara zo mu mutwe.

Mike Tyson yasabwe kuba ambasaderi w’urumogi muri Malawi
Uyu mugabo wabaye rurangiranwa mu mukino w'iteramakofe asanzwe yariyeguriye ibikorwa by'ubucuruzi bw'urumogi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza