IGIHE

Inyandiko ya Einstein ku byerekeye isanzure, igihe na rukuruzi yagurishijwe miliyoni 13$

0 24-11-2021 - saa 13:39, Muhonzire Sylvine

Inyandiko yakozwe n’umuhanga mu by’ubugenge, Albert Einstein, yatanze bwa mbere ibisobanuro ku bijyanye n’ukuntu rukuruzi (gravite) igira uruhare mu igenwa ry’igihe (isaha), yagurishijwe akayabo ka miliyoni 13$ muri cyamunara.

Iyi nyandiko y’amapaji 54 yagurishirijwe i Paris mu Bufaransa mu nzu igurisha ibintu muri cyamunara ya Christie’s, ikaba ari inyandiko imwe muri ebyiri Einstein yanditse afatanyije n’umusuwisi Michele Besso hagati ya 1913 na 1914.

Izi nyandiko ziswe theory of relativity zabitswe neza na Besso umaze umyaka 66 yitabye Imana, aho zasobanuye neza isano iri hagati y’igihe dukoresha, isanzure ndetse n’imikorere ya rukuruzi y’Isi. Zashyizwe ku mugaragaro mu 1915.

Inzobere mu bijyanye no kugurisha cyamunara mu nzu ya Christie’s, Vincent Belloy, yashimiye cyane Besso wabitse iyi nyandiko kuko ari gake cyane abantu bashobora kubona inyandiko zanditswe na Einstein mbere ya 1919.

Ati “Inyadiko z’ibikorwa bya Einstein za mbere ya 1919 ni nke cyane kuko ni umuntu utarakundaga kwandika ibintu byinshi rero kuba dufite iyi nyandiko ye ya kera ni ibintu bitangaje cyane.”

Belloy avuga ko imibare yakozwe na Einstein kugira ngo habeho iriya ‘theory of relativity’ yandikishijwe ikaramu y’umukara ku rupapuro rw’umuhondo ndetse ikanerekana amakosa yagiye akora mbere y’uko we na mugenzi we Besso bagera ku mwanzuro w’iyi siyansi.

Iyi nyandiko yari yahuje abantu baturutse hirya no hino ku Isi, bazi akamaro ko kubona inyandiko ya siyansi yanditswe mu mukono wa Einstein ubwe. Gusa uwayiguze ntabwo yigeze atangazwa.

Igurishwa ry’iyi nyandiko rije rikurikira iry’indi nyandiko (formule) yavumbuwe na Einstein ya E=mc2 (E-Ingufu, m-Uburemere bw’ikintu runaka, c-umuvuduko w’urumuri) yerekana isano riri hagati y’ingufu z’ikintu n’uburemere bwacyo, ikaba yaragurishijwe muri Gicurasi muri Leta Zunze Ubumwe za Amerika kuri miliyoni 1.2$.

Inyandiko ya 'Theory of Relativity' yashyizwe ku mugaragaro mu 1915
Inyandiko ya Einstein yari yanditse ku rupapuro rw'umuhondo handikishijweho ikaramu y'umukara
Iyo nyandiko yari iri ku mapaji 54 akaba yarayifatanyije na Michele Besso hagati ya 1913 na 1914
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza