IGIHE

Urwibutso kuri ‘Camp Zaïre’, irembo Abanye-Congo benshi banyuzemo binjira mu Rwanda (Amafoto&Video)

0 29-07-2020 - saa 14:29, Ishimwe Israel

Si igitangaza ko abana b’abaturanyi bahabwa amazina asa cyangwa afitanye isano rya bugufi! Iyi migirire yaranagutse igera ku hantu aho usanga hari uduce cyangwa ibihugu bifite amazina yo mu baturanyi ba hafi cyangwa aba kure.

Urugero rwa hafi ni ‘Camp Zaïre’. Aka ni agace gaherereye mu Kagari ka Kinunga, Umurenge wa Gikondo mu Karere ka Kicukiro mu Mujyi wa Kigali.

Izina kahawe ntiryaje nk’impanuka kuko rifitanye isano n’abaturage benshi biganjemo Abanye-Congo bagatuyemo kuva hambere.

Aka gace kiswe Zaïre, izina rya kera ryahinduwemo Repubulika Iharanira Demokarasi ya Congo ryakoreshwaga kuva mu 1971 kugeza mu 1997. Bivugwa ko izina ryatanzwe mu 1971 ubwo igihugu n’Umugezi wa Congo byahindurirwaga amazina na Perezida Joseph-Désiré Mobutu wanahinduye irye zina.

Mobutu yiyise Sese Seko Nkuku Ngbendu Wa Za Banga nk’izina rishimangira ko afite ubudahangarwa mu kurwana intambara zikomeye.

Mu 1997, General Laurent Kabila, yafashe ubutegetsi muri Zaïre, ahindura izina ry’igihugu acyita Repubulika Iharanira Demokarasi ya Congo, ariko Camp Zaïre, yo yagumanye iryo zina.

Abatuye muri aka gace bagenekereza ko izina Camp Zaïre rifite umuzi mu myaka yo mu 1960. Ryatanzwe ubwo Abanye-Congo binjiye mu Rwanda bari gushaka imibereho n’abari abashumba, bahageze barahirwa bagura amasambu i Gikondo, barahororokera.

Igihe cyarageze buri Munye-Congo ugeze mu Rwanda akahahingukira kuko hari bagenzi be, bahuje ururimi n’umuco ku buryo bimufasha kuhisanga, Umuryango w’Abanye-Congo ugenda waguka.

Camp Zaïre yarashyushye, indirimbo z’i Kinshasa, Goma na Bukavu ziracurangwa, Igiswahili n’Ilingala byiganza mu ndimi zivugwa i Gikondo, izina rihama ubwo!

Amateka avuga ko abatangiye kuhatura bwa mbere bari bavuye mu Kanogo mu 1980 ubwo ako gace kari gatangiye gusenywa. Muri icyo gihe icupa rya Primus ryaguraga amafaranga 30 Frw.

Camp Zaïre yagize amateka ahambaye kugeza ubwo igihe Mobutu yasuraga u Rwanda, we na mugenzi we Habyarimana bari inshuti magara, bavuye ku Kibuga Mpuzamahanga cy’Indege cya Kigali i Kanombe bagiye kuganiriza Abanye-Congo baho.

Uwagakandagizagamo ikirenge yasaga n’uwageze mu kindi gihugu, bitewe n’impinduka mu mivugire, imyambarire, ururimi kugeza ku mafunguro n’uburyo ategurwa.

Mu rwibutso bamwe mu Banyarwanda babanye n’Abanye-Congo cyane bavuga ko aba baturanyi bihariye mu gutegura amafunguro kuko nko ku mugoroba aho ‘wanyuraga mu ngo wumvaga impumuro z’isombe n’inyama byatamiriye hose.’

Nzabandora Antoine wageze muri Camp Zaïre muri Nyakanga 1994, yabwiye IGIHE ko mbere aka gace kitwaga Kigugu.

Ati ‘‘Hari abantu b’ababumbyi, abasangwabutaka. Abanye-Congo barimutse barahatura ari benshi. Bituma bahita gutyo kubera ubwinshi bw’abahatuye.’’

Yakomeje ati “Nasanze hari Abanye-Congo bake, nasanze aria bantu babana, bagira urukundo. Ni abantu utahagera ngo bakwime ibiryo. Kuri iyi saha hasigaye amatongo, abantu bagiye batatana.’’

Nzabandora Antoine amaze imyaka isaga 26 atuye muri Camp Zaïre aho yageze muri Nyakanga 1994

-  Camp Zaïre yacukije benshi, isigayemo abantu mbarwa

Abatuye muri Camp Zaïre mu myaka yo hambere ubu bimukiye mu bindi bice bitandukanye by’igihugu ndetse abasigayemo nabo bari kwimurwamo.

Muhindo Katembo ukora ibijyanye n’ubucuzi yishimira imibereho ye muri Camp Zaïre.

Uyu mugabo ufite umugore w’Umunyarwanda babyaranye abana bane yageze mu Rwanda mu 2001, abanza gutura i Remera mbere yo kwimukira muri Camp Zaïre mu 2016.

Yagize ati ‘‘Aha Nahageze hacyubatse, hari inzu nyinshi, hari Abanye-Congo ariko bagurishije inzu zabo baragenda. Hari umuganga witwa Dr Kasinga wahaguze. Bo bahageze kera ariko njye mpamaze imyaka ine.’’

Muhindo yavuze ko yumvikana n’abaturanyi be ndetse n’abayobozi nta kibazo bafitanye.

Ati ‘‘Nta Munye-Congo uhohoterwa kereka abajura, niba uri umujura bazagufunga ariko njye ntawe umpohohotera. Hano turakora neza, abana bacu bariga, tubishyurira mituweli, nta tandukaniro rihari ugereranyije n’Abanyarwanda.’’

Muhindo Katembo ari mu Banye-Congo bake bagituye muri Camp Zaïre, aho amaze imyaka ine7

Avuga ko nubwo Abanye-Congo benshi bari baturanye bahavuye ariko yakomeje ubuzima bwe nk’ibisanzwe.

Ati ‘‘Urwibutso rukomeye mfite kuri Camp Zaïre, icya mbere ni umubano mwiza n’abaturanyi. Icya kabiri, ntubona ko ndi hano, abandi bose barabasenyeye, ariko negereye Kasinga ndamubwira nti mfasha, ntiyabyanze yarambwiye ati ‘Zayirwa’ komeza ukore akazi, nubona abantu bo kwigisha ubigishe. Urwo ni urwibutso rwiza rwo kubana n’abantu neza. Mu by’ukuri nishimira ko abantu ba Camp Zaïre babana neza n’abandi kandi ntibagirane ikibazo.’’

Mu kazi ke ashobora kurera abana no kubishyurira mituweli ndetse yaguze ibibanza birimo bibiri afite i Goma ariko abikesha.

Habarurema Alexandre, wavukiye muri Congo afite se w’Umunyarwanda, ari mu batuye Camp Zaïre ariko ubu yimukiye muri Afurika y’Epfo.

Avuga ko ubwo yasozaga amasomo ya Kaminuza yaguze ubutaka muri aka gace kuko hari Abanye-Congo benshi, ahisanga.

Agira ati ‘‘Aha hari Parc Industriel de Gikondo aho benshi bakoraga mu bijyanye na tekiniki. Hari umubano mwiza w’Abanyarwanda n’Abanye-Congo, byanagize ingaruka ku bijyanye n’ururimi kuko bamwe mu Banyarwanda batangiye kuvuga Igiswahili.’’

Habarurema Alexandre yavukiye muri Repubulika Iharanira Demokarasi ya Congo kuri se w’Umunyarwanda na nyina w'Umunye-Congo. Yatuye Camp Zaïre anahagira ubutaka bwe bwite

Guturwa kw’aka gace byasembuye umubano mwiza hagati y’Abanyarwanda n’Abanye-Congo binatuma, bamwe batangira kuvuga Ikinyarwanda, abandi bimakaza Igiswahili mu mirimo yabo.

Habarurema yavuze ko Camp Zaïre ifite ikintu cyihariye kijyanye n’ubumwe hagati y’abayituyemo.

Ati ‘‘Abantu nta bibazo bafite, ibihari ubu ni ibyo guhabwa ingurane nubwo utamenya niba abantu babifata kimwe kuko bakwemeza gufata amafaranga. Mu gihe hari hatangiye kuba heza, haje imihanda ubu nibwo bagutegeka kuhava. Si inkuru nziza gusa hari ikintu kizasigara mu bantu, gutekereza aho bakuwe kandi baraharerewe bakiri abana.’’

Iyo utembereye muri Camp Zaïre usanga ahari inyubako, inyinshi zarashyizwe hasi ndetse abahasigaye bavuga ko haguzwe hagiye gukorerwa ibindi bikorwa.

Ubu biragoye kuhagorobereza ngo wumve za ndirimbo zifite umwihariko wo muri RDC ziri mu Ilingala n’Injyana ya rumba z’abahanzi bakunzwe nka Wenge Musica, J.B. Mpiana, Werrason, Pepe Kale, Fally Ipupa n’abandi.

‘Camp Zaïre’ ifatwa nk'irembo Abanye-Congo benshi banyuzemo binjira mu Rwanda
Kwinjira mu Camp Zaïre unyura mu tuyira duto twiganjemo uturi hagati y'inzu
Inyubako ziri muri aka gace zigaragara nk'iziciriritse
Bamwe bamaze guhabwa ingurane barimuka ndetse aho bari batuye hatangiye kumera ibyatsi
Mu myaka yo hambere, aka gace wasangaga karimo Abanye-Congo benshi ndetse n'ibikorwa byari bihiganje byagushaga ku muco wabo
Abatuye muri aka gace hari ahantu bubakiwe akazu k'amazi bavomaho ku badafite robine mu ngo zabo
Muri aka gace hakorerwa ubucuruzi buciriritse, aha ubona ni aho ushobora kugurira amakara yo gutekesha ku badafite gaz
Camp Zaïre ni agace kakunzwe guturwamo n'Abanye-Congo benshi byanatumye bakitirira iryo zina ryo mu baturanyi bo mu Burengerazuba bw'u Rwanda
Camp Zaïre haraguzwe ndetse abari bahatuye batangiye kwimurirwa mu tundi duce dutandukanye
Muri Camp Zaïre hatangiye gusenywa ndetse hateganywa gushyirwa ibikorwa remezo bitandukanye
Abatuye Camp Zaïre bahuriza ku 'bumwe' nka kamwe mu turango twarangaga Abanye-Congo bahanyuze n'abaturanyi babo
‘Camp Zaïre’ ni agace gaherereye mu Kagari ka Kinunga, Umurenge wa Gikondo mu Karere ka Kicukiro
Inyubako nyinshi zazamurwaga muri aka gace ni izisanzwe, ntibyari koroha kuhabona inzu igerekeranye
Umuhanda uva mu Mujyi rwagati na Nyabugogo ugana Rwandex uri munsi y'agace ka Camp Zaïre waratunganyijwe uhabwa ubwiza budasanzwe
Abanye-Congo bo muri Camp Zaïre bagaragaje ko batangiye kwimurwa mu gihe aho batuye hatangiye guhindurirwa isura
Muri aka gace hatuye abantu benshi biganjemo Abanye-Congo

Amafoto: Niyonzima Moïse

Video: Uwacu Lizerie, Hakizimana Alain

Editing: Mushimiyimana Azeem

Narration: Nkurunziza Ferdinand

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza