IGIHE

Umunyemari ‘Ndagije’ yavuze ku mubano we na RNC, uko yahuye na Rutabana n’iyicwa rya Baziga

0 12-01-2022 - saa 07:06, Ishimwe Israel

Ndagijimana Benjamin uzwi nka Ndagije ni umwe mu bacuruzi bazwi mu Mujyi wa Kigali mu myaka yo hambere. Kuri ubu atuye muri Mozambique aho akorera ubushabitsi.

Mu 1978, Ndagije yari umushoferi w’amakamyo, akorera ingendo mu mijyi irimo Mombasa muri Kenya.

Uyu musaza wari ufite imyaka 33 mu gihe cya Jenoside yakorewe Abatutsi, yari atuye i Remera. Ku bw’amahirwe yaje kuyirokoka nyuma yo guhungira muri Hôtel des Mille Collines aho yamaze iminsi itatu, aza kuhava agana mu cyahoze ari Butare, ari naho avuka.

Ku wa 11 Mata 1994, ni bwo yinjiye mu Burundi ariko akomereza urugendo rwe ku Rusumo aho yasanze amakamyo ye yatwaraga lisansi ayasubiza i Dar es Salaam.

Yahise ajya kuba i Nairobi muri Kenya, ariko aza kuhava ataha mu Rwanda nyuma ya Jenoside yakorewe Abatutsi.

-  Kayumba Nyamwasa ni we watumye Ndagije ava mu Rwanda

Nyuma ya Jenoside yakorewe Abatutsi mu 1994, Guverinoma y’Ubumwe yari ifite inshingano zikomeye zo kugisana kuko cyari cyangiritse mu mpande zose no guhangana n’abacengezi.

Ndagije mu kubara inkuru avuga ko akigera mu Rwanda avuye muri Kenya, yahamagawe n’abantu bamujyana guhura na Kayumba Nyamwasa.

Ati “Umunsi umwe ndi iwanjye, nabonye imodoka za gisirikare ebyiri ziraje, n’imbunda. Ndavuga nti ‘ndapfuye’. Havuyemo abasirikare babiri, baravuga bati ‘afande arakudutumye’. Bambwiye gufata imodoka yanjye nkagenda hagati yabo.’’

Muri ako kanya, muri imwe mu modoka havuyemo umusivili witwa Rusagara Joseph, amwongorera ko Afande Kayumba Nyamwasa ari we umushaka.

Ati “Umutima warateraga ariko sinari muzi. Tukigera iwe mu rugo Kayumba yasohotse yambaye ipantaro y’itisi, ishati y’amaboko magufi na kambambili. Yatunguwe no kumbona, ampa ikaze. Yambwiye ko yatekerezaga ko ndi umusaza.’’

Mu biganiro bagiranye, yamubajije aho aba n’ibyo akora, undi amusubiza ko atuye i Nairobi.

Ati “Yangiriye inama yo gusubira i Nairobi kuko igihugu kitaratekana, ambwira ko umutekano nugaruka nzabimenya. Ati hano wahura n’umujura, akakwica, akakugirira nabi, bikandikwa kuri Leta.’’

Ndagije wari uri kubaka inzu ye ku Kicukiro, yagize imitima ibiri kuko yumvaga atayisiga ituzuye. Yahisemo kubanza kuzuza inzu ye.

Nyuma yaje gusubira i Nairobi ariko asanga ubuzima bwaho bugoye, ahitamo kujya muri Mozambique.

-  Iby’umubano wa Ndagije na mukuru we uba muri RNC

Ndagije avukana na Safari Stanley; uyu wa kabiri yabaye Senateri mu myaka yashize. Yatangiriye politiki mu Ishyaka rya MDR ariko rimaze guseswa mu 2003 ashinga PSP (Parti de la Prospérité et de la Solidarité).

Mu Rwanda, Urukiko Gacaca rwa Cyarwa rwahamije Safari icyaha cya Jenoside. Safari yayobotse RNC ya Kayumba Nyamwasa nyuma yo guhunga igihugu anyuze muri Uganda.

Ndagije ni we wamwakiriye ku Mupaka wa Kenya na Uganda witwa Busia. Yavuye aho ahita amufasha kwerekeza muri Afurika y’Epfo.

Bagiranye ibiganiro bitandukanye ariko baza gushwana ku buryo bamaze imyaka itandatu batavugana. Mu mpera z’umwaka ushize ni bwo bongeye kuvugana ariko ntibakomoze kuri politiki.

Ati “Safari yambwiye ko Kayumba yamubajije nimero zanjye ariko arazimwima akeka ko ari bya bindi byo kwambura abantu amafaranga.’’

Ndagije avuga ko icyo gihe Kayumba yabwiye mukuru we ko yazamuha nimero za Frank Ntwari akaba ari we bavugana kuko Nyamwasa we ‘telefoni ze zumvirizwa’.

Ati “Frank Ntwari yanyohereje ubutumwa, ambwira ko ari we woherejwe tuzavugana.’’

Ndagije we yangaga kwiyegereza abo bantu ngo batamwambura amafaranga ye.

Ati “Umuntu wese ufite ifaranga baramwegera. Buri wese arindwa n’umutimanama we. Nka hariya usibye RNC, abandi bashyushye ni FLN. Habamo n’ubutekamutwe, umuntu ashobora kuvuga ko afite ingabo agasahura amafaranga.’’

Ndagijimana Benjamin uzwi nka Ndagije yaherukaga mu Rwanda mu 1998, yarusuye ashaka kureba iterambere rumaze kugeraho ndetse arateganya kurutangizamo ishoramari

-  Ndagije yararashwe, bitwererwa u Rwanda

Ndagije w’imyaka 62 agendana isasu mu mugongo, nyuma yo kuraswaho n’amabandi atamenye irengero ryayo.

Ati “Bakindasa, Abanyarwanda bo hanze bavuze ko ari Kigali yandashe kandi ari abajura, banasize telefoni yabo. Nagiraga inkeke ko abantu bazatekereza ko ari njye wabivuze.’’

Yagiye kwivuriza mu Burayi abwirwa ko agomba kubana n’iryo sasu, kuko kurimukuramo byari gutuma agendera mu kagare.

Nyuma yo koroherwa, Kayumba Nyamwasa ni bwo yamuhamagaye. Nimero ye yayihawe na mukuru we Safari kuko we yari yaramaze kwiyunga na RNC.

Ati “[Kayumba ati] Safari ntiyari yarambwiye ko wageze muri Mozambique. Ese na we Kigali irashaka kukwica ko ari bo birirwa barasa abantu. Ndamubwira nti ‘sinavuga ko ari Kigali kuko biracyari mu iperereza.’’

Ntiyakomeje kuvugana na Kayumba ahubwo yamubwiye ko Safari azajya amusobanurira imikorere ya RNC ndetse amubwira ko nabona n’inkunga yayibaha.

Nyuma y’igihe yaje guhura na Ben Rutabana, bigizwemo uruhare na mugenzi we w’umucuruzi.

Ati “Ben yatangiye kunsobanurira ko yaje gukusanya amafaranga y’imirimo bashaka gukora muri Uganda. Yambwiye ko ikintu bagezeho ari ukubaka amashuri noneho akaba ari ho bazajya batoreza igisirikare. Ati nawe twari tuje kukwaka imfashanyo. Namubwiye ko ibyo bintu ari byiza ariko mubwira ko nzabaha 3000$, ariko wowe umbwire uwo nzayaguhera nyegeranye.’’

Ndagije ngo icyo gihe yabwiye Rutabana atyo ashaka kumwikuraho ndetse ntibongeye kuvugana kuko byahise bitangazwa ko yaburiwe irengero.

-  Yasobanuye uko yinjiye muri dosiye y’abakurikiranyweho urupfu rwa Baziga

Muri Kanama 2019, Louis Baziga wari Umuyobozi wa Diaspora Nyarwanda muri Mozambique, yishwe arasiwe mu Mujyi wa Maputo ahitwa Matola. Yari mu modoka ye yitwaye hanyuma yitambikwa n’izindi ebyiri zirimo abantu batatu bafite imbunda nini n’intoya, bamumishaho amasasu.

Icyo gihe abantu batandatu ni bo bashyizwe mu majwi mu rupfu rwe. Barimo Eric-Thierry Gahomera wareberaga inyungu z’u Burundi muri Mozambique; Ndagijimana Benjamin [Ndagije], Diomède Tuganeyezu wahoze muri FAR n’abapasiteri barimo John Hakizimana na we byavuzwe ko akorana na RNC na Kanyarushoki.

Ndagije yasobanuye ko intandaro ya byose ari amakimbirane yavutse mu Itorero ADEPR muri Mozambique. Ayo makimbirane ngo yari ashingiye ku kuba Baziga yaraguze ikibanza kizubakwamo urusengero ariko baza kumutega.

Ati “Umunsi umwe nahamagawe n’abantu babiri, bansaba kubafasha mu guhuza impande zombi. Twakoze inama, irangiye mbabwira ko niba banyemerera twazashaka urundi ruhande ngo twumve icyo batekereza. Narabaterefonnye, bambwira aho tuzahurira, turaganira. Mbasaba ko bagomba kumvikana nk’abakirisitu.’’

Icyo gihe bamubwiye ko bitashoboka kuko impande zombi zari ziyambaje inkiko ngo abe ari zo zikemura icyo kibazo.

Mu gihe hari hagitegerejwe ko urukiko rufata umwanzuro kuri iyi dosiye, ni bwo Baziga yishwe arashwe.

Mu gukora iperereza na Ndagijimana yatawe muri yombi nk’umuntu wari umaze igihe agaragara muri iyo dosiye yo kugerageza guhuza impande zirebwa n’ikibazo.

Yasobanuye ko nyuma y’urupfu rwa Baziga, we, Diomède Tuganeyezu na Revocat Karemangingo bagejejwe mu rukiko, banafungwa ibyumweru bitatu ariko baza kurekurwa.

Iperereza ryakozwe ntacyo ryagezeho cyane ko n’abapolisi bari muri dosiye bavugaga ko bahawe amafaranga ngo bivugane Baziga, babajijwe uko byagenze bakanyuranya indimi.

Ndagije acuruza Pièce de rechanges muri Mozambique. Yavuze ko nta bwoba atewe n’uko azakirwa nasubira muri Mozambique kuko azi neza abo babanye.

Ati “Aho kwihisha Leta, nzihisha imitwe y’iterabwoba. Nonese ari bo na Leta igikomeye ni nde? Ni bo ngomba guhunga aho guhunga igihugu. Ngomba kumenya uko ndinda umutekano wanjye.’’

Nubwo aterura avuge niba yarabaye muri RNC ariko ashimangira ko yabavugishaga ashaka kubumva. Ati “Ibyiza ni uko mvuga ukuri kwanjye. Kuki nemera nkicara imbere yanyu mbeshya, ngomba kuvugisha ukuri.’’

Ndagije yavuze ko yihaye intego yo gufasha Abanyarwanda gutaha binyuze mu kubaganiriza no kubavana ‘mu buyobe’.

Yatangaje ko mu Rwanda yahaherukaga mu myaka 24, yasuye ibice bitandukanye by’igihugu asanga ari amahoro, abaturage batuje ndetse n’iterambere rirushaho kwaguka. Na we aratekeganya gutangiza ishoramari imbere mu gihugu ndetse akaba ari ho azajya amara igihe kinini.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza