IGIHE

Uko imiterere y’inguzanyo y’u Buhinde yadindije umushinga wo kuhira i Kirehe wa miliyoni $120

0 14-09-2020 - saa 12:35, Rabbi Malo Umucunguzi

Inteko Ishinga Amategeko – Umutwe w’Abadepite – yabajije Ikigo cy’Ubuhinzi n’Ubworozi (RAB) impamvu zadindije umushinga wo kuhira no gukoresha imashini, ibisobanuro byinshi biganisha ku miterere y’inguzanyo yatanzwe na Banki y’u Buhinde Ishinzwe guteza imbere ibyoherezwa mu Mahanga, Exim Bank.

Kuri uyu wa Mbere nibwo Komisiyo y’Inteko Ishinga Amategeko ishinzwe gukurikirana Imikoreshereze y’Imari n’Umutungo by’Igihugu, PAC, yatangiye kubariza mu ruhame abayobozi b’ibigo bitandukanye, amakosa yagaragaye muri raporo y’Umugenzuzi Mukuru w’Imari ya Leta. Ku ikubitiro hakiriwe RAB.

Kimwe mu bibazo byabajijwe RAB harimo ikijyanye n’umushinga wo kuhira no gukoresha imashini buhinzi mu Karere ka Kirehe, wagombaga gukorwa ku nguzanyo yatanzwe n’u Buhinde. Ni umushinga ufite agaciro ka miliyoni $120 wo kuhira imyaka ku buso bwa hegitari 7000, wakererewe ku gihe wagombaga gutangiriraho.

Umuyobozi Mukuru wa RAB, Dr Patrick Karangwa, yavuze ko uyu mushinga ufite ibibazo bitari bike bijyanye no gukererwa watangiye ku nguzanyo ya Exim Bank y’Abahinde.

Ati “Umushinga wahuye n’ibibazo nka bitatu cyangwa bine ikomeye. Icya mbere, umushinga ukozwe ku buryo 75% by’ibikoresho umushinga ukoresha bigomba kuva mu Buhinde, ari nabo batanze inguzanyo, 25% bikava ahandi, noneho mu mirimo, ugasanga ari imirimo yroheje mu kuhira.”

“Kugeza kuri 75% y’ibiva mu Buhinde, biragorana kuko utageza ubwo wavana umucanga n’isima mu Buhinde bitakoroha, kereka ari imirimo y’ibyuma. Twagiye tugongwa rero n’icyo kibazo kuko hagomba kubanza kuba ibiganiro nko bimanuke, kuko niyo yari amabwiriza ya Exim Bank y’u Buhinde.”

Dr Karangwa yavuze ko mu biganiro bifuza ko wenda ibikoresho bizava mu Buhinde byagabanywa bikagera kuri 65%, kuko utakora ikidamu cyo kuhira kigizwe n’ibiva mu Buhinde ngo bishoboke.

Gusa ngo nabyo bisaba ibiganiro, nabyo bigatwara amezi menshi cyane, kuko bisaba kwandika ukazategereza gusubizwa.

Yavuze ko ikindi kibazo cyabaye, hagendaga habamo ibikoresho byazanwaga bivanywe mu Buhinde ariko bitujuje ubuziranenge, aho hari nk’imitarimba yaje, Ikigo Gitsura Ubuziranenge kivuga ko itujuje ubuziranenge, isubizwayo kuko itari ifite ikirango cy’aho yakorewe n’ibindi.

Ati “Ikindi mu ntangiriro habaye gukererwa bishingiye ku byerekeye imisoro, aho mu ntangiriro zawo byavugwaga ko imisoro isonewe kuri uyu mushinga, ariko bigezemo hagati biza kugaragara ko idasonewe, bigomba ibiganiro kuri ibyo byo gusonerwa, nabyo byatwaye amezi menshi.”

Dr Karangwa yavuze ko ikindi gikomeye ngo ni uko ibigo byazanwaga n’Abahinde ngo bashyire mu bikorwa umushinga kuko nabyo byagombaga kuva mu Buhinde, hagendaga hagaragaramo ibitujuje ibyangombwa.

Ati “Ibigo byo mu Buhinde, byagiye bikomanyirizwa mu masoko, ikigo kikaza, cyamara kugera hano tukumva ngo cyavanywe ku rutonde, ndetse hari n’icyavanywe ku rutonde na RPPA cyananiwe ahandi, twagiye tugirana ikibazo n’ibigo by’Abahinde bikora nabi.”

Yavuze ko hafashwe ingamba zo gushaka umurongo mushya w’uburyo ibibazo byakemukamo, ku buryo bitazarenza umwaka utaha ibibazo byose bitaravanwa mu nzira.

Perezida wa Komisiyo ya PAC, Depite Muhakwa Valens, yavuze ko amakosa atagomba kujya ku ruhande rumwe rw’abakoze ku masezerano yo guhabwa inguzanyo, kuko amafaranga atashoboraga gufatwa hatarebwe ku mbogamizi ziri mu ishyirwa mu bikorwa ry’umushinga.

Dr Karangwa yemeye ko nabo hari amakosa bakoze kuko iyo bitaba, ibyo bibazo byose byagombaga kugaragazwa mbere ariko harimo gushakwa uburyo icyo kibazo cyakosorwa.

Perezida wa PAC, Depite Muhakwa Valens, ayoboye imirimo ya Komisiyo
Abadepite bagize PAC bahata ibibazo abayobozi ba RAB ku makosa yagaragajwe n'Umugenzuzi Mukuru w'Imari ya Leta
Iki gikorwa kirimo kuba mu buryo bw'ikoranabuhanga, abadepite bari mu Nteko naho abayobozi bakuru b'ibigo bari mu biro byabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza